1 इसके कुछ साल बाद, जिब यहोवा नै इस्राएलियाँ ताहीं उनके च्यांरु और के बैरियाँ तै आराम दिया, अर यहोशू बूढ़ा अर घणी उम्र का होग्या, 2 फेर यहोशू सारे इस्राएलियाँ तै, यानिके पुरनियां, खास आदमियाँ, न्यायियाँ, अर सरदारां नै बुलवाकै कहण लाग्या, "मै तो इब बूढ़ा अर घणी उम्र का होग्या सूं; 3 अर थमनै देख्या के थारे परमेसवर यहोवा नै थारै खात्तर इन जात्तां के माणसां कै गैल के-के करया सै, क्यूँके जो थारी और तै लड़दा आया सै वो थारा परमेसवर यहोवा सै। 4 देक्खो, मन्‍नै इन बची होई जात्तां ताहीं चिट्ठी गेर-गेरकै थारे गोत्रां का हिस्सा कर दिया सै; अर यरदन तै लेकै पश्‍चिम की और कै बड़े भूमध्‍यसागर* तक रहण आळी उन सब जात्तां ताहीं भी इसाए दिया सै, जिन ताहीं मन्‍नै काट गेरया सै। 5 अर थारा परमेसवर यहोवा उन ताहीं थारे स्याम्ही तै उनके देश म्ह तै लिकाड़ देवैगा; अर थम अपणे परमेसवर यहोवा के वचन कै मुताबिक उनके देश के अधिकारी हो जाओगे।" 6 ज्यांतै घणा हियाव बाँधकै, जो कुछ मूसा की नियम-कायदा की किताब म्ह लिख्या सै उसके पूरा करण म्ह चौकसी करियो, उसतै आस्सै-पास्सै न्ही मुड़णा। 7 ये जो जात तेरे बीच रहगी सैं इनकै बिचाळै ना जाईये, अर ना इनके देवत्यां के नाम्मां की चर्चा करिये, अर ना उनकी कसम खुवाईये, अर ना उनकी उपासना करिये, अर ना उननै दण्‍डवत करिये, 8 पर जिसा आज कै दिन ताहीं थम अपणे परमेसवर यहोवा की भगति म्ह मगन रहो सो, उसाए रह्या करियो। 9 यहोवा नै थारे स्याम्ही तै बड़े-बड़े अर बलवन्त जात के माणस लिकाड़े सैं; अर थारे स्याम्ही आज कै दिन ताहीं कोए ठहर न्ही सक्या। 10 थारे म्ह तै एक माणस हजार माणसां नै भगावैगा, क्यूँके थारा परमेसवर यहोवा अपणे वचन कै मुताबिक थारी और तै लड़ै सै। 11 ज्यांतै अपणे परमेसवर यहोवा तै प्रेम राक्खण की पूरी चौकसी करिये। 12 क्यूँके जै थम किसे तरियां तै यहोवा तै मुड़कै इन जात्तां के बाकी माणसां नै मिलण लागो जो थारै बीच बचे होए रहवै सैं, अर इनतै ब्याह शादी करकै इनकै गैल समधियाना रिश्ता जोड़ो, 13 तो जरुर जाण ल्यो के आग्गै तै थारा परमेसवर यहोवा इन जात्तां के माणसां नै थारै स्याम्ही तै न्ही लिकाड़ैगा; अर ये थारै खात्तर जाळ अर फंदे, अर थारी पसळी खात्तर कोड़े, अर थारी आँख्यां म्ह काण्डे ठैहरेंगी, अर अन्त म्ह थम इस आच्छी धरती पै तै जो थारे परमेसवर यहोवा नै थारे ताहीं दी सै नाश हो जाओगे।

14 "सुणो, इब दुनिया के और माणसां की तरियां मेरा भी दुनिया तै जाण का बखत आ लिया सै, अर थम सब अपणे-अपणे दिल अर मन म्ह जाणो सो, के जितनी भलाई की बात म्हारे परमेसवर यहोवा नै म्हारे बारै म्ह कही उन म्ह तै एक भी बिना पूरी होए न्ही रही; वे सारी की सारी थारै पै घटी सैं, उन म्ह तै एक भी बिना पूरी होए न्ही रही। 15 तो जिसी थारे परमेसवर यहोवा की कही होई सारी भलाई की बात थारे पै घटी सैं, उसे तरियां यहोवा विपत्ति की सारी बात भी थारै पै ल्यावैगा अर थमनै इस आच्छी धरती कै उप्पर तै, जिस ताहीं थारे परमेसवर यहोवा नै थारे तै दिया सै, सत्यानाश कर देवैगा। 16 जिब थम उस करार नै, जिस ताहीं थारे परमेसवर यहोवा नै थारे तै हुकम देकै अपणे गैल करया सै, उलंघण करकै पराए देवता की उपासना अर उननै दण्‍डवत करण लागो, फेर यहोवा का छो थारै पै भड़कैगा, अर थम इस आच्छे देश म्ह तै जिस ताहीं उसनै थारे तै दिया सै तावळी तै नाश हो जाओगे।"