1 ओ इस्राएलियो, ये वचन सुणो जो यहोवे तुसा रे बारे दे बोली राखेया ए, मतलब तेस सारे कराने रे खलाफ जेसखे आऊँ मिस्र देशो ते ल्याई राखेया: 2 "तरतिया रे सारे कुलो बीचा ते मैं बस तुसा पाँदे ई मन लगाई राखेया, इजी बजा ते मां तुसा रे सारे बुरे कामा री सजा देणी। 3 जे दो माणूं आपू बीचे सहमत नि ओ, तो क्या सेयो कट्ठे चली सकोए? 4 क्या शेर बिना शिकारो ते बणो दे गरजणे? क्या जवान शेर बिना कुछ पकड़े आपणी गुफा ते गरजणा? 5 क्या चिड़िया बिना फन्दा लगाए फसणी? क्या बिना कुछ फसे फन्दा जमीना ते चखणा? 6 क्या केसी शईरो दे रड़सिंगा बजाणे ते लोक नि कांबणे? जदुए तक परमेशर केसी शईरो पाँदे बिपदा नि पेजो क्या तेस शईरो दे कोई मुसीबत पड़नी? 7 ईंयाँ ई परमेशर यहोवा आपणे दास भविष्यबक्तेया पाँदे आपणा दु:ख बिना बताए कुछ नि करना।* 8 शेर गरजेया, कुण नि डरना? परमेशर यहोवा बोलेया, केस भविष्यबाणी नि करनी?"

9 अशदोद शईरो रे मईल ओर मिस्र देशो रे मईलो पाँदे प्रचार करी की बोलो, "सामरिया रे पाह्ड़ो पाँदे कट्ठे ऊई की देखो कि तेस शईरो दे कितणी बड़ी मुसीबत ए, देखो, एथो रे लोक कितणे पाप करने लगी रे।" 10 परमेशरो री ये बाणी ए, "जो लोक आपणे मईलो दे उपद्रव ओर चोरिया रा तअन कट्ठे करी की राखोए, सेयो सीदे काम करना नि जाणदे।" 11 इजी बजा ते परमेशर यहोवा ईंयाँ बोलोआ, "दुश्मणा तुसा री जमीना पाँदे कब्जा करी लणा। तिना तुसा रे बचणे वाल़ी जगा टाल़ी देणियां। तिना तुसा रे किले लूटी लणे।"

12 परमेशर ईंयाँ बोलोआ, "जेबे शेर पेडा पाँदे अमला करोआ, तो कदी-कदी ग्वाल़ा शेरो रे मुंए ते दो खुटिया या कानो रा एक टुकड़ा ई छुड़ाई पाओआ। ईंयाँ ई सामरिया दे रणे वाल़े कुछ इस्राएली लोक बची सकणे, ओर तिना सिर्फ एक मांजा ओर एक टखणो रा इस्सा ई बचाई सकणा।" 13 सेना रे परमेशर यहोवे री ये बाणी ए, "देखो, याकूबो रे कराने रे खलाफ गवाई देयो, 14 जेस बखते मां इस्राएलो खे तेसरे पापो री सजा देणी, तेस बखते ई मां बेतेलो रिया बेदिया बी तोड़ी देणियां ओर बेदिया रे सींग टूटी की जमीना दे छूटी जाणे। 15 मां तिना रे सारे कअर नाश करी देणे, सेयो कअर जिना दे सेयो ठण्डी रे बखते रओए, ओर सेयो कअर जिना दे सेयो गर्मिया दे रओए। मां तिना रे बड़े ओर बांके कअर, आथी दाँदो ते बणिया दिया किमती चीजा पूरी तरआ ते नाश करी देणियां।" परमेशरो री येई बाणी ए।