Rute 4

रूत ओर बोअजो रा ब्या

1 तेसी बखते बोअज शईरो रे बड़े द्वारो गे जाई की बैठीगा। तेसी बखते एलीमेलेको रे नेड़े रा देखपाल़ करने वाल़ा रिश्तेदार जेसरे बारे दे बोअजे दशेया था, तीसिए जाणे लगी रा था। बोअजे तेसखे बोलेया, दोस्त, ओरे आओ! एती बैठ। तेबे से तेती तेस नेड़े जाईकी बैठीगा। 2 तेबे बोअजे शईरो ते दस बुजुर्ग बी बुलाए ओर तिना खे गवा रे रूपो दे बैठणे खे बोलेया। 3 तेबे बोअजे तेस रिश्तेदारो खे बोलेया, "तूँ नाओमीया खे जाणेया, जो मोआब देशो ते वापस आईगी ए। जो म्हारे रिश्तेदार एलीमेलेको री लाड़ी थी। से आपणे लाड़े री जमीना रा एक टुकड़ा बेचणा चाओई। 4 इजी री खातर मैं फैंसला कित्तेया कि ये गल्ल ताखे जायी की बोलूँ कि तूँ तिजी खे इना बैठे रेया लोका सामणे ओर मेरे बुजुर्ग लोका सामणे मोले लओ। जे तूँ एते जमीना खे छुड़ाणा चाए तो बता जे नि चाए तो बी बता कऊँकि ताखे छाडी की तेसा जमीना रे इस्से खे छुड़ाणे रा अक्क सिर्फ माखे आ।" 5 बोअजे फेर बोलेया, "जेबे तूँ नाओमिया री जमीन खरीदेगा तो ये बी जरूरी ए कि तूँ मोआबी बिदुआ रूता साथे ब्या कर। ताकि तेसा रे माठा ओ जो तेसा रे मरे रे लाड़े रा वारिस ऊणा ओर से जमीना रा इस्सा परिवारो देई रणा।" 6 तिने नेड़ो रे रिश्तेदारे बोलेया, "आऊँ तेसा जमीना खे नि छुड़ाई सकदा, एड़ा नि ओ कि मेरे इस्से री जमीन कम ऊई जाओ। इजी री खातर मेरा छुड़ाणे रा अक्क तूँ लयी लो, कऊँकि से मांते नि छुड़ाई ऊँदा।"

7 पुराणे बखतो दे इस्राएल देशो दे जमीन छुड़ाणे रे बदले री बात पक्का करने रे बारे दे ये रवाज थी, कि एक माणूं आपणा जोड़ा उतारी की दूजे खे देयो था। इस्राएलो दे लेण-देणो री गल्ल पक्का करने खे येई रवाज थी। 8 इजी री खातर परिवारो रे नेड़े रे रिश्तेदारे आपणा जोड़ा खोली की आपणा जोड़ा बोअजो खे देईता ओर बोलेया, "तूँ एबे ये जमीन मोले लई लओ।" 9 तेबे बोअजे तेती कट्ठे ऊए दे बुजुर्ग लोका खे ओर सबी लोका खे बोलेया, "तुसे आज एते गल्ला रे गवाह् ए कि जो कुछ एलीमेलेको रा ओर जो कुछ किल्योन ओर महलोनो रा था, से सब कुछ आऊँ नाओमीया रे आथो ते मोले लऊँआ। 10 तेबे महलोनो री लाड़ी मोआब देशो री रूता खे बी आऊँ आपणी लाड़ी बनाणे खे एते इच्छा ते मोले लऊँआ, ओर बिदुआ रूता ते ब्या करूँआ, ताकि तेसा रे माठा ओ जो तेसारे मरे रे लाड़े रा वारिस ऊणा ओर से जमीन परिवारो देई रणी।" केथी एड़ा नि ओ कि मरे रेया रा नाओं तिना रे रिश्तेदारा बीचा ते ओर जन्म भूमिया बीचा ते पूली जाओ। 11 तेबे बड़े द्वारो गे जितणे लोक थे तिने ओर बुजुर्ग लोके बोलेया, "आ, आसे एते गल्ला रे गवाह् ए। ये जो जवाणस तेरे कअरे आओई एसा खे यहोवा इस्राएलो रे कराने रे दो वंश देणे वाल़िया राहेल ओर लिआ जेड़ा करो ओर तां एप्राता रे वंशो दे वीरता रे काम करने ओर बेतलेहम शईरो दे तेरा नाओं बड़ा ओ; 12 ओर जो ल्वाद यहोवा एसा जवान जवाणसा रे जरीये ताखे देयो, तेसरी बजअ ते तेरा कराना पेरेसो रे कराने जेड़ा ऊई जाणा, जो तामार ओर यहूदा रे जरीये पैदा ऊआ था।*4:12 उत्प. 38:29 "

बोअज ओर रूतो रा वंश

13 तेबे बोअजे रूता साथे ब्या करी ला, ओर से तेसरी लाड़ी ऊई गी ओर जेबे से तेसा गे गया, तेबे यहोवे री दया ते से गर्भवती ऊई ओर तेसा रे एक पाऊ ऊआ। 14 तेबे शईरो री जवाणसे नाओमीया ते तेस बच्चे रिया तँईं बोलेया, "यहोवा तन्य ए, जिने ताखे आज देखपाल़ करने वाल़ा रिश्तेदार दित्तेया, इस्राएल देशो दे एस बच्चे रा बड़ा नाओं ओ। 15 ओर ये तेरा पाऊ ताखे नवां जीवन देणे वाल़ा ऊणा तेरे बुढ़ापे दे तूँ सम्बाल़नी कऊँकि पाऊ तेरिया बऊआ रा ए ये तेरिया बऊआ रे जमीं रा जो तांते इतणा प्यार करोई जो साता माठेया ते बी जादा ए।" 16 तेबे नाओमीए बच्चे खे आपणी छातिया ते लगाया तेसे आपू तेस बच्चे रा पालण पोषण कित्तेया। 17 ओर नाओमिया री पड़ोसणिये ये बोली की कि नाओमीया रे एक पाऊ ऊआ, पाऊए रा नाओं ओबेद*4:17 ओबेद सेवक राखेया। ओबेद यिशै रा पिता ओर दाऊदो रा दादा था।

18 पेरेसो रे ये वंशज ए, मतलब पेरेसो रा पाऊ हेस्रोन ऊआ, 19 ओर हेस्रोनो रा पाऊ राम ऊआ, रामो रा पाऊ अम्मीनादाब पैदा ऊआ, 20 ओर अम्मीनादाबो रा पाऊ नहशोन था, ओर नहशोनो रा पाऊ सल्मोन ऊआ, 21 ओर सल्मोनो रा पाऊ बोअज ऊआ, बोअजो रा पाऊ ओबेद ऊआ, 22 ओर ओबेद रा पाऊ यिशै ऊआ, ओर यिशै रा पाऊ राजा दाऊद पैदा ऊआ।