Daniel 1

दानिय्येल ते तैसेरे दोस्त परमेशरेरे हुक्म मनतन

1 यहूदा प्रदेशेरे राज़े यहोयाकीमेरे राज़ केरनेरे ट्लेइयोवं साले मां बाबेल मुल्खेरे राज़े नबूकदनेस्सरे यरूशलेम नगरे पुड़ चढ़ाई केरतां तैस घेरो दित्तो। 2 तैखन परमेशरे यहूदा प्रदेशेरो राज़ो यहोयाकीम परमेशरे भवनेरां काही भांडन समेत नबूकदनेस्सरे हथ्थे मां कियो; ते तैनी तैना भांडां शिनार*1:2 शिनार बाबेल मुल्खेरो होरू नवं, उत. 11:2 मुल्खे मां अपने देबतेरे मन्दरे मां नेइतां, अपने देबतेरे भण्डारे मां रेखी दित्तां।✝1:2 2 इति. 36:7. 3 तैखन नबूकदनेस्सर राज़े अपने खोजां केरे प्रधान अश्पनजे हुक्म दित्तो कि इस्राएली राज़ घरानेरे मट्ठन मरां किछ जुवानन इरां आन। 4 तैना जुवान बगैर नुक्से, खूबसूरत ते हर किसमेरी अक्ल बुद्धी मां खूब माहिर ते ज्ञाने सेइं भेरतां ते विद्वान ते शाही मेहले मां हज़ार भोने काबल भोन; ते तैन कसदी केरे शास्त्र ते भाषारी शिक्षा दित्ती गाए। 5 ते राज़े तैन हुक्म दित्तो कि तैसेरे रोट्टी ते पीनेरे लेई दाछ़रे रस्से मरां तैन रोज़ खाने पीनेरे लेई दित्तू गाए। एन्च़रे सेइं ट्लाई सालन तगर तैन केरू पालन पोशन भोतू राए; फिरी तैसेरां बाद तैना राज़े कां हाज़र किये गान। 6 तैन मां किछ यहूदारे खानदाने मरां च़ुनोरे, दानिय्येल, हनन्याह, मीशाएल ते अजर्याह नंव्वेरे यहूदी थिये।