लैव्यव्यवस्था 16

पापे करां छुटनेरी दिहाड़ी

1 ज़ैखन हारूनेरां दूई मट्ठां अपवित्र अग्गरी च़ढ़तल च़ैढ़तां मारां जेआं, तैखन यहोवाए मूसे सेइं गल्‍लां की; 2 ते यहोवाए मूसे सेइं ज़ोवं, "अपने ढ्लाए हारूने सेइं ज़ो कि सन्दूखेरे बेइयें प्रायश्चित बाले ढकनेरे अग्गर, म‍झ़ेटियें पड़देरे अन्ट्ल, महा पवित्र ठारी मां हर वक्ते दाखल न भोए, नईं त मेरि गालो; किजोकि अवं प्रायश्चित बाले ढकने पुड़ बा बिदलारी मां लेइहोलो। 3 ज़ैखन हारून महा पवित्र ठारी मां दाखल भोए तैखन इस तरीके सेइं दाखल भोए, तै पापबेलरे लेई एक्‍की बछ़ड़े ते होमबेलरे लेई अक हुड़ आने। 4 तै सनेरे कपड़ेरो पवित्र अंगरखो, ते अपने जानी पुड़ सनेरे कपड़ेरो जाँघियो लेइतां, ते सनेरां लिगड़ां केरो कमरबन्ध, ते सनेरां कपड़ेरी पगड़ी बेन्धतां दाखल भोए; इना पवित्र लिगड़ां आन, ते तै पैनी सेइं निहान देइतां इन्न लाए। 5 फिरी तै इस्राएली लोकां केरे मेण्डली करां पापबेलरे लेई दूई थाव्वे ते होमबेलरे लेई अक हुड़ ने। 6 ते हारून तैस पापबेलरे बछ़ड़े ज़ैन तैसेरे लेई भोल्हु च़ैढ़तां अपने ते अपने टब्बरेरे लेई प्रायश्चित केरे। 7 ते तैना दूईये थाव्वन नेइतां मिलापे बाले तेम्बेरे दारे पुड़ यहोवारे सामने खड़े केरे; 8 ते हारून दूईये थाव्वन पुड़ चिट्ठी छ़डे, अक चिट्ठी यहोवारे लेई ते होरि अजाजेलेरे लेई भोए। 9 ते ज़ैस थाव्वे पुड़ यहोवारे नंव्वेरी चिट्ठी निस्से तैस हारून पापबेलरे लेई च़ाढ़े; 10 पन ज़ैस थाव्वे पुड़ अजाजेलेरे लेई चिट्ठी निस्से तै यहोवारे सामने ज़ींतो खड़ो कियो गाए कि तैस सेइं प्रायश्चित कियूं गाए, ते तै अजाजेलेरे लेई जंगले मां छ़डो गाए।

11 "हारून तैस पापबेलरे बछ़ड़े, ज़ैन तैसेरे लेई भोल्हु, नेड़े आने, ते तैसेरी बलि केरतां अपने ते अपने टब्बरेरे लेई प्रायश्चित केरे। 12 ते ज़ै वेदी यहोवारे सामने आहे, तैस पुड़ेरे बलते मूरन मरां भेरतां धूपदाने नेइतां, अपने दूईये मुट्ठड़न मां पीहोरे खुशबूदार धूपे मरां भेरतां, म‍झ़ेटियें पड़देरे नेड़े एज्जे 13 ते तैस धूपे यहोवारे सामने अग्गी मां छ़डे, ज़ैस सेइं धूपेरो तूँ गवाहेरे पत्रेरे बह प्रायश्चितेरे ढकनेरे बह पेई गाए, नईं त तै मेरि गालो; 14 तैखन तै बछ़ड़ेरे खूने मरां किछ नेइतां पूरबेरे पासे प्रायश्चितेरे ढकनेरे बह अपनि एंगलोई सेइं छ़िड़के, ते फिरी तैस खूने मरां किछ एंगलोई सेइं तैस ढकनेरे सामने भी सत फेरेईं छ़िड़के। 15 फिरी तै तैस पापबेलरे थाव्वे ज़ै आम लोकां केरे लेई भोल्हो बलि केरतां तैसेरे खूने म‍झ़ेटियें पड़देरे अन्तर आने, ते ज़ैस तरीके सेइं बछ़ड़ेरे खूने मरां तैनी कियोरू थियूं, ठीक तेन्च़रे तै थाव्वेरे खूने मरां भी केरे, मतलब तैस प्रायश्चितेरे ढकनेरे बह ते तैसेरे सामने छ़िड़के। 16 ते तै इस्राएली लोकां केरि किसमे किसमेरी अशुद्धता, ते जुर्म, ते तैन केरे सब पापां केरे वजाई सेइं पवित्र ठारारे लेई प्रायश्चित केरे; ते मिलापे बाले तेम्बु ज़ै तैन साथी तैन केरि किसमे किसमेरी अशुद्धतारे मझ़ाटे रहते तैसेरे लेई भी तै तेरहु केरे। 17 ज़ैखन हारून प्रायश्चित केरनेरे लेई महा पवित्र ठारी मां दाखल भोए, तैखन करां ज़ांतगर तै अपने ते अपने टब्बरे ते इस्राएली लोकां केरि सारी मेण्डलरे लेई प्रायश्चित केरतां बेइर न निस्से तांतगर कोई मैन्हु मिलापे बाले तेम्बु मां न राए। 18 फिरी तै निस्तां तैस वेदी कां गाए ज़ै यहोवारे सामने ते तैसेरे लेई प्रायश्चित केरे, मतलब बछ़ड़ेरे खूने ते थाव्वेरे खूने दूईयन मरां किछ नेइतां तैस वेदरे च़ेवरे कूनां केरे शिंगन पुड़ लाए। 19 ते तैस खूने मरां किछ एपनी एंगलोई सेइं सत फेरेईं तैस पुड़ छ़िड़कतां तैस इस्राएली लोकां केरे किसमे किसमेरी अशुद्धता छुटेइतां शुद्ध ते पवित्र केरे।

प्रायश्चितेरो थाव्वो

20 "ज़ैखन हारून पवित्र ठार ते मिलापे बाले तेम्बु ते वेदरे लेई प्रायश्चित केरि छ़डे, तैखन ज़ींतो थाव्वे अग्गर आने; 21 ते हारून अपने दूईये हथ्थन ज़ींते थाव्वे पुड़ रेखतां इस्राएली लोकां केरे सब अधर्मेरे कम्मन, ते तैन केरे सब अपराध, मतलब तैन केरे सारे पापन मन्ने, ते तैन्न थाव्वेरे क्रोड़ी पुड़ रेखतां तैस कोन्ची मैन्हेरे हथ्थे ज़ै इस कम्मेरे लेई रखोरो भोए जंगले मां भेज़तां हथरां छ़डे। 22 तै थाव्वो तैन केरे सब अधर्मेरे कम्मन एप्पु पुड़ लेदतां कोन्ची बेरान ठैरी मां छ़ुइतां गालो; एल्हेरेलेइ तै मैन्हु तैस थाव्वे जंगले मां छ़डे।

23 "तैखन हारून मिलापे बाले तेम्बु मां एज्जे, ते ज़ै सनेरे लिगड़न लेइतां तै महा पवित्र ठारी मां दाखल भोवरो थियो तैन्न खोलतां तैड़ी रख्खे। 24 फिरी तै पवित्र ठारारे अंगने मां पैनी सेइं निहान दे ते अपना लिगड़ां लाए, ते बेइर गेइतां अपने होमबलि ते आम लोकां केरे होमबलि च़ैढ़तां अपने ते लोकां केरे लेई प्रायश्चित केरे। 25 ते तै पापबेलरी चर्भी वेदी पुड़ फुक्‍के। 26 ते ज़ै मैन्हु थाव्वे अजाजेलेरे लेई छ़ेडतां एज्जे तै भी अपने लिगड़न धोए, ते पैनी सेइं निहान दे, ते तैखन तै डेरन मां दाखल भोए। 27 ते पापबेलरू बछ़ड़ू ते पापेरी बेलरो थाव्वो भी ज़ैन केरो खून पवित्र ठारी मां प्रायश्चित केरनेरे लेई पुज़व गाए तैना दूईये डेरन करां बेइर पुज़ाए गान; ते तैन केरो खेड़ू, मास, ते गोबर अग्गी मां फुक्‍को गाए। 28 ते ज़ै तैन्न फुक्‍के तै अपने लिगड़न धोए, ते पैनी सेइं निहान दे, ते इसेरे बाद तै डेरन मां दाखल भोइ सकते।

पापे करां प्रायश्चितेरि दिहाड़ी मनानी

29 "तुश्शे लोकां केरे लेई ई हमेशारी विधि भोल्ही कि सत्तोवं महीनेरे दशोवं दिहाड़े तुस बरत रेखथ, ते तैस दिहाड़े कोई, चाहे तै तुश्शे अपने मुल्खेरो भोए चाहे तुश्शे दरमियान रानेबालो कोई परदेशी भोए, कोई भी कोन्ची किसमेरू कम-काज़ न केरे; 30 किजोकि तैस दिहाड़े तुसन शुद्ध केरनेरे लेई तुश्शे लेई प्रायश्चित कियूं गालू; ते तुस अपने सब पापन करां यहोवारे सामने पवित्र ठहरेले। 31 ई तुश्शे लेई खास थैकरी दिहाड़ी भोल्ही, ते तुस तैस दिहाड़े बरत रेखथ ते कोन्ची किसमेरू कम-काज़ न केरथ; ई हमेशारी विधि एहे भोल्ही। 32 ते ज़ेसेरे अपने बाजी केरे ठारी पुड़ महायाजकेरी पेदवरे लेई अभिषेक ते संस्कार कियूं गाए तै याजक प्रायश्चित केरे, मतलब तै सनेरे पवित्र लिगड़न लेइतां, 33 पवित्र ठारी, ते मिलापे बाले तेम्बु, ते वेदरे लेई प्रायश्चित केरे; ते याजकां केरे ते मेण्डलरे सब लोकां केरे लेई भी प्रायश्चित केरे। 34 ते ई तुश्शे लेई हमेशारी विधि भोल्ही, कि इस्राएली लोकां केरे लेई हर साल एक्‍की बार तुश्शे सारे पापां केरे लेई प्रायश्चित कियूं गाए।" यहोवारे इस हुक्मेरे मुताबिक हारूने कियूं, ज़ै तैनी मूसे दित्तोरो थियो।