लैव्यव्यवस्था 6

बेइमान लोकां केरि दोषबलि

1 फिरी यहोवाए मूसे सेइं ज़ोवं, 2 "अगर कोई अपने ढ्लाए सेइं धोखो केरतां एप्पु कां रखनेरे लेई दित्तोरी चीज़ लुट्टे या ज़ुलम केरतां यहोवारे सामने बेइमान भोइतां पाप कियोरोए, 3 या हेरोरि चीज़ मैलतां तैसेरे बारे मां झूठ ज़ोए ते झूठी कसम भी खाए; एरी कोई भी गल की न भोए ज़ैस सेइं मैन्हु पापी भोए, 4 त ज़ैखन तै एरू कम केरतां पापी भोइ गाए, तैखन ज़ै भी चीज़ तैने लुटी, या ज़ुलम केरतां, या अमानत, या हेरोरि मैल्होरी; 5 चाहे कोई चीज़ की न भोए ज़ेसेरे बारे मां तैनी झूठी कसम खेवरी भोए; त तै तैस पूरी-पूरी वापस दे, ते तैस सेइं साथी पंच़ोंव हिस्सो भी बेद्धतां भरे, ज़ैस दिहाड़े ई पतो लग्गे कि तै दोषीए, तैस्से दिहाड़े तै तैस चीज़ी तैसेरे मालिके वापस दे। 6 ते तै यहोवा कां अपनि दोषबलि भी आने, मतलब अक बगैर नुक्से हुड़ दोषबेलरे लेई याजके कां आने, तै एत्री कीमतरो भोए ज़ेत्रो याजक बनाए। 7 एन्च़रे सेइं याजक तैसेरेलेइ यहोवारे सामने प्रायश्चित केरे, ते ज़ैन कम केरतां तै दोषी भोइ जेवरोए तैसेरी माफ़ी तैस मैल्हेली।"

अलग-अलग किसमेरे बलिदानां केरि विधि

8 फिरी यहोवाए मूसे सेइं ज़ोवं, 9 "हारून ते तैसेरे मट्ठन हुक्म देइतां इन ज़ो कि होमबलि च़ाढ़नेरी विधि ईए: होमबलि अग्गी पुड़ सैरी राती झ़ेझ़ां तगर वेदी पुड़ पेवरी राए, ते वेदरी अग वेदी पुड़ बलती राए। 10 ते याजक अपने सनेरां लिगड़ां ते अपने जानी पुड़ अपनो सनेरो जाँघियो लेइतां होमबेलरी मांज़न, ज़ै अग्गरे भस्म केरने सेइं वेदी पुड़ रेही गाए, ते तैस छ़ुइतां वेदी कां रख्खे। 11 तैखन तै अपना इना लिगड़ां खोलतां होरां लिगड़ां लेइतां मांज़न डेरन करां बेइर कोन्ची शुद्ध ठारी पुड़ ने। 12 वेदी पुड़ अग बलती राए, ते कधी हिश्शोरी न लोड़े। ते याजक रोज़ झ़ेझ़ां तैस पुड़ कैड़ु फुकतां होमबेलरे टुक्ड़न ज़ैना तैस पुड़ सज़ेइतां रख्खे, ते तैस पुड़ मेलबेलि केरि चर्भी फुक्‍के। 13 वेदी पुड़ अग लगातार बलती राए; तै कधी हिश्शोरी न लोड़े।

अन्नेरी बलि

14 "अन्नेरी बेलरो कानून एन्च़रे सेइं आहे: हारूनेरां मट्ठां तैस वेदी पुड़ यहोवाए कां आन्न। 15 ते तै अन्नेरी बेलरे तेल मल्‍लोरे अट्टे मरां मुठड़ी भेरतां ते तैस पुड़ सब लोबान सेलतां अन्नेरी बलि याद केरनेरो ई हिस्सो ज़ै यहोवारे सामने खुशी देनेबाली खुशबूअरे लेई वेदी पुड़ फुक्‍के। 16 ते तैस अट्टे मरां ज़ैन बाकी रेही गाए तैस हारून ते तैसेरां मट्ठां खान; तै बगैर खमीरे पवित्र जगाई मां खाइ गाए, मतलब तैना मिलापे बाले तेम्बेरे अंगने मां तैस खान। 17 तैन खमीरे सेइं साथी बनावं न गाए; किजोकि मीं अपने हबने मरां तैन केरो अपनो हिस्सो भोनेरे लेई दित्तोरोए; एल्हेरेलेइ ज़ेन्च़रे पापबलि ते दोषबलि परमपवित्र आन तेन्च़रे तैन भी आहे। 18 तुश्शी पीढ़ी-पीढ़ी मां हारूनेरे खानदानेरे सब मड़द तैस मरां खेइ सकतन, यहोवारे हबनन मरां ई तैन केरो हिस्सो सदा भोतो रालो; ज़ै कोई तैन हबनन सेइं हुरे तै पवित्र भोल्हो।"

याजकां केरि अन्नेरी बलि

19 फिरी यहोवाए मूसे सेइं ज़ोवं, 20 "ज़ैस दिहाड़े हारूनेरू अभिषेक भोए तैस दिहाड़े तै अपने मट्ठन सेइं साथी यहोवारे लेई ई च़ढ़तल च़ाढ़े; मतलब एपारो*6:20 एपा अक किल्‍लो दशोवं हिस्सो मैदो रोज़ अन्नेरी बेलि मां च़ाढ़े, तैस मरां अध्धो झ़ेझ़ां ते अध्धो ड्लवझ़रे मौके च़ाढ़े। 21 तै च़ढ़तल तव्वे पुड़ तेले सेइं बनाई गाए; ज़ैखन तै तेले सेइं भेरोई गाए तैखन तैस ऐनथ, इस अन्नबेलरे पकावरे टुक्ड़े यहोवाए पसंद एजनेबाली खुशबूअरे लेई च़ैढ़थ। 22 हारूनेरां मट्ठन मरां ज़ेसेरू भी तैस याजक पद पुड़ अभिषिक्त भोल्हु, तै भी तैस किसमेरी च़ढ़तल च़ाढ़े; ई विधि हमेशारे लेई आहे, कि यहोवारे सामने तै सारी च़ढ़तल फुक्‍की गाए। 23 याजकेरी सैरी अन्नेरी बेलि भी फुक्‍की गान; तैना कधी खेइ न गान।"

पापबलि

24 फिरी यहोवाए मूसे सेइं ज़ोवं, 25 "हारून ते तैसेरे मट्ठन सेइं इन ज़ो कि पापेरी बेलरो कानून ईए: ज़ैस ठैरी होमबेलरो जानबर बलि कियो गाते तैस्से मां पापबलि जानबर भी यहोवारे सामने बलि कियो गाए; तै परमपवित्रे। 26 ज़ै याजक पापबलि च़ाढ़े तै तैस खाए; तै पवित्र जगाई मां, मतलब मिलापे बाले तेम्बेरे अंगन मां खाइ गाए। 27 ज़ैन किछ तैसेरे मासे सेइं हुरे, तैन पवित्र भोल्हु; ते अगर तैसेरे खूनेरे तेप्पु कोन्ची लिगड़े पुड़ पेन, त तैन कोन्ची पवित्र ठारी मां धोवं गाए। 28 ते तैन मित्तरू भांड ज़ैस मां तैन बनेवरू भोए ट्लोड़ू गाए; अगर तैन पितलरे भांडे मां उबालेरू भोए, त तैन मांज़ू गाए, ते पैनी सेइं धोवं गाए। 29 याजकन मरां सब मड़द तैस खेइ सकतन; तै परमपवित्र चीज़े। 30 पन ज़ैस पापबेलरे जानबरेरे खूने मरां किछ भी खून मिलापे बाले तेम्बेरे अन्तर पवित्र ठारी मां प्रायश्चित देनेरे लेई पुज़व गाए तैसेरू मास कधी न खाव गाए; तैन अग्गी मां फुक्‍कू गाए।"