लैव्यव्यवस्था 12

शुद्धि भोनेरे नियम

1 फिरी यहोवाए मूसे सेइं ज़ोवं, 2 "इस्राएली लोकन सेइं ज़ो: ज़ै कोई कौन्श दोज़ींती भोए ते तैस मट्ठू भोए, त तै सत दिहाड़न तगर अशुद्ध राहेली; ज़ैस तरीके सेइं तै माहवारी एजनेरे तरीके सेइं अशुद्ध भोतीए। 3 ते अठोवं दिहाड़े मट्ठेरो खतनो कियो गाते। 4 फिरी तै कौन्श अपने शुद्ध केरनेबाले खूने मां 33 दिहाड़े राए; ते ज़ांतगर तैसेरे शुद्ध भोनेरे दिहाड़े पूरे न भोन तांतगर तै न कोन्ची पवित्र चीज़ी सेइं हुरे, ते न पवित्र ठारी मां गाए। 5 ते अगर तैस कुई भोए, त तैस माहवारी एजनेरी ज़ेरि अशुद्धता च़ेवधे दिहाड़न तगर राहेली; ते फिरी 66 दिहाड़न तगर अपने शुद्ध केरनेबाले खूने मां राहेली।

6 "ज़ैखन तैस कौन्शरे शुद्ध भोनेरे दिहाड़े पूरे भोन, तैखन चाहे तैस मट्ठू भोए चाहे कुई, तै होमबेलरे लेई एक्‍की सालेरू गबड़ू, ते पापबेलरे लेई कबूतरेरो अक बच्‍चो या घुग्गेरो अक बच्‍चो मिलापे बाले तेम्बेरे दारे पुड़ याजके कां आने। 7 तैखन याजक तैस यहोवारे सामने बलि देइतां तैसेरे लेई प्रायश्चित केरे; ते तै अपने खून बगनेरी अशुद्धता करां छुटतां शुद्ध भोल्ही। ज़ैस कौन्शरू मट्ठू या कुई भोए तै इस कानूने मन्ने। 8 ते अगर कौन्शी कां भैड या छ़ल्‍ली देनेरी रकम न भोए, त दूई घुग्गेरे बच्‍चे या कबूतरेरे दूई बच्‍चे, अक त होमबलि ते होरि पापबेलरे लेई दे; ते याजक तैसेरेलेइ प्रायश्चित केरे, तैखन तै शुद्ध भोल्ही।"