पवित्रतारो नियम
1 फिरी यहोवाए मूसे सेइं ज़ोवं, 2 "इस्राएली लोकां केरि सैरी मेण्डली सेइं ज़ो कि तुस पवित्र बेनतां राथ; किजोकि अवं तुश्शो परमेशर यहोवा पवित्र आईं। 3 तुस अपनि-अपनि अम्मा ते अपने-अपने बाजी केरो डर मन्ना, ते मेरे थैकरे दिहाड़े मन्ना: अवं तुश्शो परमेशर यहोवा आईं। 4 तुस मूरती केरे पासे न गेइयथ, ते देबतां केरि मूरती ढैलतां न बनेइयथ; अवं तुश्शो परमेशर यहोवा आईं।
5 "ज़ैखन तुस यहोवारे लेई मेलबलि देथ, तैखन एरू बलिदान देइयथ ज़ैस सेइं अवं तुसन पुड़ खुश भोईं। 6 तैसेरू मास बलिदानेरे दिहाड़े ते दूइयोवं दिहाड़े खवं गाए, पन ट्लेइयोवं दिहाड़े तगर ज़ैन रेही गाए तैन अग्गी मां फुक्कू गाए। 7 अगर तैस मरां किछ भी ट्लेइयोवं दिहाड़े खवं गाए, त तैन भिट्टू भोइ गालू, ते कबूल न कियूं गालू। 8 ते तैसेरो खाने बालो यहोवारे पवित्र चीज़ी अपवित्र बनालो, एल्हेरेलेइ तैस अपने अधर्मेरो भार एप्पु छ़ूनो पेलो; ते तै मैन्हु अपने लोकन मरां अलग कियो गालो।
9 "फिरी ज़ैखन तुस अपने मुल्खेरां ऊडारां कट्टथ, तैखन अपने उडारेरे कूने-कूने तगर पूरू न केटथ, ते कट्टोरे उडारेरां बिछ़ड़ोरां शिल्लां न च़ुनथ। 10 ते अपनि दाछ़रे बागरो दानो-दानो ट्लोड़तां न ऐनथ, ते अपनि दाछ़रे बागरे झ़ड़ोरे दाछ़न अकोट्ठे न केरथ; तैना गरीब ते परदेशी लोकां केरे लेई शैरथ अवं तुश्शो परमेशर यहोवा आईं।
11 "तुस च़ोरी न केरथ, ते एक्की होरि सेइं न त धोखो केरथ, ते न झूठ ज़ोइयथ। 12 तुस मेरे नंव्वेरी झूठी कसम खेइतां अपने परमेशरेरू नवं अपवित्र न केरथ; अवं यहोवा आईं।
13 "एक्की होरि पुड़ अंधेर न केरथ, ते न एक्की होरि लुटथ। मज़दूरेरी मज़दूरी तीं कां सारी रात झ़ेझ़ां तगर न राए। 14 टोव्ने लानत नईं देनी, ते न काने अग्गर ठोकर रेखथ; ते अपने परमेशरेरो डर मन्ना; अवं यहोवा आईं।
15 "न्याय मां अन्याय न केरथ; ते न त गरीब मैन्हेरी तरफदारी ते न बड्डे मैन्हेरू तुत्तर हेरतां खियाल केरनो; एक्की होरेरो न्याय धार्मिकता सेइं केरनो। 16 बकवासी बेनतां अपने लोकन मां न फिरां, ते होरि केरे19:16 किछ भी एरू न केरा ज़ैस सेइं तुश्शे पड़ोसेरी ज़िन्दगी खतरे मां पे खून बगाने मां शामल न भोइयथ; अवं तुश्शो यहोवा आईं।
17 "अपने मने मां एक्की होरेरे लेई बैर न रेखथ; अपने पड़ोसी ज़रूर झ़िड़कथ, नईं त तैसेरे पापेरो भार तीं छ़ूनो पेलो। 18 बदलो न नेइयथ, ते न अपने कौमरे ढ्लान सेइं बैर रेखथ, पन एक्की होरि सेइं अपनो ज़ेरो प्यार रखनो; अवं तुश्शो यहोवा आईं।
19 "तुस मेरे विधन लगातार मेन्नथ। अपने जानबरन अलग किसमेरे जानबरन सेइं मेल खाने न देइयथ; अपने उडारे मां दूई किसमां केरू बीज़ अकोट्ठे न बेइयथ; ते सन ते उन्नरे मिलावटे सेइं बनोरू लिगड़ न लेइयथ।
20 "फिरी कोई कौन्श नौकरानी भोए, ते तैसेरी कुड़माइ कोन्ची मैन्हु सेइं भोवरी भोए, पन तै न त गुलामे करां ते न मुफ्त आज़ाद की जेवरी भोए; तैस सेइं कोई कुकर्म केरे, त तैन दूईयने सज़ाह त मैल्हे, पन तैस कौन्शरे आज़ाद न भोनेरे वजाई सेइं तैना दूईये मारां न गान। 21 पन तै मैन्हु मिलापे बाले तेम्बेरे दारे पुड़ यहोवा कां अक हुड़ दोषबेलरे लेई आने। 22 ते याजक तैसेरे कियोरे पापेरे वजाई सेइं दोषबेलरे हुड़ेरे ज़िरिये तैसेरे लेई यहोवारे सामने प्रायश्चित केरे; तैखन तैसेरो कियोरो पाप माफ़ कियो गालो।
23 "फिरी ज़ैखन तुस कनान मुल्खे मां पुज़तां कोन्ची भी किसमेरे फलेरो बुट लाथ, त तैन केरे फल ट्लाई सालन तगर तुश्शे लेई मन्ना बगैर खतने19:23 बगैर खतने मना कियोरो, मतलब रसमरे मुताबिक अशुद्ध भोल्हे; एल्हेरेलेइ तैन मरां ट्लाई सालन तगर कोई फल न खव गाए। 24 ते च़ेवरोवं साले मां तैन केरे सब फल यहोवारी तारीफ़ केरनेरे लेई पवित्र भोल्हे। 25 तैखन पंच़ोंव साले मां तुस तैन केरे फल खेइयथ, एल्हेरेलेइ कि तैन करां तुसन बड़ो फल मैल्हेलो; अवं तुश्शो परमेशर यहोवा आईं।
26 "तुस केन्ची चीज़ी खूने समेत न खेइयथ। ते न जैदू-टूनो केरथ, ते न शुभ या अशुभ मुहूर्त्तन मेन्नथ। 27 तुस अपने दोग्गेरे बाल घेरो रेखतां न कटेइयथ, ते न अपने खैखोड़रे बालन केटथ। 28 मुड़दां केरे वजाई सेइं अपने जानी ज़खमी न केरथ, ते न तैस मां छाप लेइयथ; अवं यहोवा आईं।
29 "एपनी कुइयन मन्दरेरी वेश्या19:29 मन्दरेरी वेश्या इस्राएली केरे किछ पड़ोसी धर्मन मां, लोकेईं सोचू कि अपने कुइयन बच्चे पैदा केरनेरे पंथे मां हिस्सो नेनेरे लेई तियार केरी राहोरेन पन इस्राएली लोकां केरे लेई ई पेशो मन्ज़ूर न थियो बनेइतां अपवित्र न केरथ, एरू न भोए कि मुल्ख वेश्यागमनेरे वजाई सेइं महापापे सेइं भेरोई गाए। 30 मेरे थैकरे दिहाड़न मेन्नथ, ते मेरे पवित्र ठारारो डर लगातार मेन्नथ; अवं यहोवा आईं।
31 "जैदूगिरन ते भूत साधने बालन कां न गेइयथ, ते एरन तोपतां तैन केरे वजाई सेइं अशुद्ध न भोइयथ; अवं तुश्शो परमेशर यहोवा आईं।
32 "पक्के बालन बालां केरे सामने खड़े भोइयथ, ते बज़ुर्गेरी इज़्ज़त केरतथ, ते अपने परमेशरेरो डर लगातार मेन्नथ; अवं यहोवा आईं।
33 "अगर कोई परदेशी तुश्शे मुल्खे मां तुसन साथी राए, त तैस दुख न देइयथ। 34 ज़ै परदेशी तुसन साथी राए तै तुश्शे लेई देशी मैन्हेरो ज़ेरो ठहरे, ते तैस सेइं अपने बराबर प्यार केरनो; किजोकि तुस भी मिस्र मुल्खे मां परदेशी थिये; अवं तुश्शो परमेशर यहोवा आईं।
35 "तुस न्याय मां, ते तैधाती मां, ते तोले मां, ते नापी मां, अन्याय न केरथ। 36 सच़्च़ी ट्लकड़ी, धर्मेरे तोल, सच़्च़ो एपा, ते धर्मेरो हीन तुसन कां रान; अवं तुश्शो परमेशर यहोवा आईं ज़ैनी तुस मिस्र मुल्खे मरां केढतां आनोरेथ। 37 एल्हेरेलेइ तुस मेरी सब विधि ते सब नियमन मेनतां लगातार अमल केरा; अवं तुश्शो यहोवा आईं।"