लैव्यव्यवस्था 11

शुद्ध ते अशुद्ध जानबर

1 फिरी यहोवाए मूसे ते हारूने सेइं ज़ोवं, 2 "इस्राएली लोकन सेइं इन ज़ोथ: ज़ेत्रे जानबर धेरती पुड़ आन तैन सेब्भन मरां तुस इन ज़िन्दगी रखनेबालां केरू मास खेइ सकतथ। 3 जानबरन मरां ज़ेत्रे च़ीरोरे या देलोरे रौन्ने बाले भोतन ते ज़ैना ओगा केरतन तैन तुस खेइ सकतथ। 4 पन ओगा केरनेबाले या देलोरे रौन्ने बालन मरां इन जानबरन मरां न खेइयथ, ज़ेन्च़रे कि ऊँट, ज़ै ओगा त केरते पन तैसेरे देलोरे रौन्ने न भोन, एल्हेरेलेइ तै तुश्शे लेई अशुद्ध भोल्हो। 5 ते चट्टानी बिज्जू, ज़ै ओगा त केरते पन तैसेरे देलोरे रौन्ने न भोन, एल्हेरेलेइ तै भी तुश्शे लेई अशुद्धे। 6 ते खरगोश, ज़ै ओगा त केरते पन तैसेरे देलोरे रौन्ने न भोन, एल्हेरेलेइ तै भी तुश्शे लेई अशुद्धे। 7 ते सूर, ज़ेसेरे च़ीरोरे मतलब देलोरे रौन्ने त भोतन पन ओगा न केरे, एल्हेरेलेइ तै तुश्शे लेई अशुद्धे। 8 इन केरे मासे मरां किछ न खेइयथ, ते इन केरि लाशी सेइं भी न हुरथ; इना त तुश्शे लेई अशुद्ध आन।

शुद्ध ते अशुद्ध पैनेरे जीप

9 "फिरी ज़ेत्रे पैनेरे जीपन तैन मरां तुस इन्न खेइ सकतथ, मतलब समुन्दर या दरियां केरे पैनेरे जीपन मरां ज़ेत्रन फंघां ते शेकड़ां भोतिन तैन्न खेइ सकतथ। 10 ते पैनेरे जीपन मरां ज़ेत्रे जानदार बगैर फंघां ते शेकड़ां केरे समुन्दर या दरियान मां रहतन तैना सब तुश्शे लेई भिट्टे आन। 11 तैना तुश्शे लेई भिट्टे भोन; तुस तैन केरे मासे मरां किछ न खेइयथ, ते तैन केरि लाशां अशुद्ध सेमझ़थ। 12 पैनी मरां ज़ैस कोन्ची जीपेरां फंघां ते शेकड़ां न भोन तै तुश्शे लेई अशुद्धे।

अशुद्ध च़ुड़ोलू

13 "फिरी च़ुड़ोलन मरां इन्न तुस अशुद्ध समझ़ा, इना अशुद्ध भोनेरे वजाई सेइं खां न गान, तैना इनां आन उकाब, हड़फोड़, कुरर, 14 इल्‍ल ते किसमे किसमेरे बाज़, 15 ते किसमे किसमेरां सब कंव्वां, 16 शुतुर्मुर्ग, तखमास, जलकुक्‍कट, ते किसमे किसमेरां शिकरे, 17 हबासिल, हाड़गील, बुल्‍लू, 18 राज़हँस, धनेश, हेवड़ा, 19 सारस, किसमे किसमेरे बगुले, टिटीहरी ते रैइतोको।

शुद्ध ते अशुद्ध कीड़े

20 "ज़ेत्रे फंघन बाले कीड़े च़ेवर पव्वन पुड़ च़लतन तैना सब तुश्शे लेई अशुद्ध आन। 21 पन रेंगनेबाले ते फंघन बाले ज़ैना च़ेवर पव्वन सेइं च़लतन, ज़ैन केरि धेरती पुड़ उछ़ड़ने ते दौड़नेरे लेई ज़ंघां भोतिन तैन्न त खेइ सकतथ। 22 तैना इना आन, मतलब किसमां-किसमां केरां टिट्टां, किसमे किसमेरे फनगे, किसमे किसमेरे झींगुर, ते किसमे किसमेरां टिड्डे। 23 पन होरे सब रेंगनेबाले फंघन बाले ज़ैना च़ेवर पव्वन बाले भोतन तैना तुश्शे लेई अशुद्ध आन।

मारोरे जानबरन सेइं हुरनेरां पत्ती शुद्ध भोनू

24 "इन केरे वजाई सेइं तुस अशुद्ध भोल्हे; ज़ैस कोन्ची सेइं इन केरि लाश हुरी गाए तै ड्लवझ़ी तगर अशुद्ध ठहरे। 25 ते ज़ै कोई इन केरि लाशी मरां किछ भी सल्‍ले तै अपना लिगड़ां धोए ते ड्लवझ़ी तगर अशुद्ध राए। 26 फिरी ज़ेत्रे जानबर देलोरे रौन्ना केरे भोतन पन न त बिलकुल देलोरे रौन्ना केरे ते न ओगा केरनेबाले भोन तैना तुश्शे लेई अशुद्ध आन; ज़ै कोई तैन्न सेइं हुरे तै अशुद्ध ठहरेलो। 27 ते च़ेवरे पव्वन सेइं च़लनेबालन मरां ज़ेत्रे पंजां केरे भारे च़लतन तैना सब तुश्शे लेई अशुद्ध आन; ज़ै कोई तैन केरि लाशी सेइं हुरे तै ड्लवझ़ी तगर अशुद्ध रालो। 28 ते ज़ै कोई तैन केरि लाश छ़ूए तै अपना लिगड़ां धोए ते ड्लवझ़ी तगर अशुद्ध रालो; किजोकि तैना तुश्शे लेई अशुद्ध आन।

29 "ते ज़ैना धेरती पुड़ पेटेरे भारे च़लने बालेन तैन मरां इना रेंगनेबाले तुश्शे लेई अशुद्ध आन, मतलब नेवल, मूंशो, ते किसमे किसमेरी गोह, 30 ते छिपकली, मगरमच्छ, टिकटिक, सांडा ते गिरगिट। 31 सब रेंगनेबालन मरां इन्ना तुश्शे लेई अशुद्ध आन; ज़ै कोई तैन केरि लाशी सेइं हुरे तै ड्लवझ़ी तगर अशुद्ध रालो। 32 ते इन मरां कोन्चेरी लाश ज़ैस कोन्ची चीज़ी पुड़ पे, तै भी भिट्टी भोल्ही, चाहे तैन लेकड़रू कोई भांड भोए, चाहे लिगड़ां, चाहे खाड़ी, चाहे बोरो, चाहे कोन्ची कम्मेरू भांड की न भोए; तैन पैनी मां छ़डू गाए, ते तैन ड्लवझ़ी तगर अशुद्ध रालू, फिरी शुच्‍चू समझ़ू गालू। 33 ते अगर मित्तरू कोई भांड भोए ज़ैस मां इन जीपन मरां कोई पे, त तैस भांडे मां ज़ैन किछ भोए तैन भिट्टू भोल्हु, ते तैस भांडे तुस ट्लोड़ी छ़ेडथ। 34 तैन मां खाने काबल कोई खूराक भोए, ज़ैस मां पानी पेवरू भोए तैन सब भिट्टू भोल्हु; फिरी अगर एरे भांडे मां पीनेरे लेई किछ भोए त तैन भी भिट्टू भोल्हु। 35 ते अगर तैन केरि लाशी मरां किछ तंदूरे या चूल्हे पुड़ पे त तैन भी भिट्टू भोल्हु, ते तैन ट्लोड़ू गालू; किजोकि तैन अशुद्ध भोइ गालू, तैन तुश्शे लेई भी अशुद्ध भोल्हु। 36 पन नाग या डैल ज़ैस मां पानी अकोट्ठू भोते तै भी शुद्धे ठहरे; पन ज़ै कोई तैन केरि लाशी सेइं हुरे तै अशुद्ध ठहरे। 37 ते अगर तैन केरि लाशी मरां किछ कोन्ची किसमेरे बीज़े पुड़ पे ज़ैन बेनेरे लेई भोए, त तैन बीज़ शुद्ध भोल्हु; 38 पन अगर बीज़े पुड़ पानी छ़डोरू भोए ते पुतोरां लाशी मरां किछ तैस पुड़ पेई गाए, त तैन तुश्शे लेई अशुद्ध भोल्हु। 39 फिरी ज़ैना जानबर खानेरो हुक्म मीं तुसन दित्तोरोए अगर तैन मरां कोई जानबर मरे, त ज़ै कोई तैन केरि लाशी सेइं हुरे तै ड्लवझ़ी तगर अशुद्ध रालो। 40 ते तैन केरि लाशी मरां ज़ै कोई किछ खाए तै अपना लिगड़न धोए ते ड्लवझ़ी तगर अशुद्ध ठहरे; ते ज़ै कोई तैसेरी लाश छ़ूए तै भी अपने लिगड़न धोए ते ड्लवझ़ी तगर अशुद्ध रालो।

अशुद्ध रेंगनेबाले जीप

41 "हर किसमेरे धेरती पुड़ रेंगनेबाले जानबर भिट्टे आन; तैना खाए न गाले। 42 धेरती पुड़ सब रेंगनेबालन मरां ज़ेत्रे पेटेरे भारे या च़ेवर पव्वन सेइं च़लतन, या जादे पव्वन बाले भोतन, तैन्न तुस न खेइयथ; किजोकि तैना भिट्टे आन। 43 तुस कोन्ची किसमेरे पेटेरे भारे च़लनेबाले जीपेरे ज़िरिये सेइं अपने आपे भिट्टो न केरथ; ते न तैन केरे ज़िरिये अपनो आप अशुद्ध केरतां अपवित्र बनाथ। 44 किजोकि अवं तुश्शो परमेशर यहोवा आईं; एल्हेरेलेइ अपनो आप शुद्ध केरतां पवित्र बनोरे रेइयथ, किजोकि अवं पवित्र आईं। एल्हेरेलेइ तुस कोन्ची किसमेरे पेटेरे भारे च़लनेबाले जीपेरे ज़िरिये ज़ैना धेरती पुड़ च़लतन अपने आपे अशुद्ध न केरथ। 45 किजोकि अवं तै यहोवा आईं ज़ै तुसन मिस्र मुल्खे मरां एल्हेरेलेइ केढतां एवरोईं कि तुश्शो परमेशर भोईं; एल्हेरेलेइ तुस पवित्र बना, किजोकि अवं पवित्र आईं।

46 "जानबरन, च़ुड़ोलन, ते सब पैनेरे जीपन, ते धेरती पुड़ सब रेंगनेबाले जीपां केरे बारे मां ईए कानूने, 47 कि शुद्ध ते अशुद्ध ते ज़ैना खाने जाइज़न ते ज़ैना खाने जाइज़ नईं तैन ज़ींते जानबरन मां फर्क कियो गालो।"