1 फिरी यहोवाए मूसे ते हारूने सेइं ज़ोवं, 2 "ज़ैखन कोन्ची मैन्हेरी जानरे चेमड़ी मां शोजश या पपड़ी या दाग भोए, ते इस सेइं तैसेरे चेमड़ी मां कोढ़ेरे रोगेरू ज़ेरू किछ लेइहोए, त तै हारून याजके कां या तैसेरे मट्ठन कां ज़ैना याजकन, तैन मरां कोन्ची कां नेन। 3 ज़ैखन याजक तैसेरे चेमड़रे रोगे हेरे, ते अगर तैस रोगेरे ठारारे बाल छ़ित्ते भोइ जेवरे भोन ते रोग चेमड़ी करां डुग्घो लेइहोए, त तै समझ़े कि कोढ़ेरो रोगे; ते याजक तैस मैन्हु हेरतां तैस अशुद्ध ठहराए। 4 पन अगर तै दाग तैसेरे चेमड़ी मां छ़ित्तो त भोए, ते चेमड़ी करां डुग्घो न लेइहोए, ते न तैट्ठेरे बाल छ़ित्ते भोवरे भोन, त याजक तैस सत दिहाड़न तगर बन्द केरतां अलग रख्खे; 5 ते सत्तोवं दिहाड़े याजक तैस हेरे, ते अगर तै रोग ज़ेरो थियो तेरहो राए ते तैसेरे चेमड़ी मां न फैलोरो भोए, त याजक तैस होरे भी सत दिहाड़न तगर बन्द केरतां अलग रख्खे; 6 ते सत्तोवं दिहाड़े याजक तैस फिरी हेरे, ते अगर लेइहोए कि रोगेरी चमक घटोरीए ते रोग चेमड़ी पुड़ फैलोरो न भोए, त याजक तैस जो शुद्ध ज़ोलो; किजोकि तैसेरे चेमड़ी मां त पपड़ी आहे; त तै अपना लिगड़न धोइतां शुद्ध भोइ गालो। 7 पन अगर याजकेरे तैस जांच केरनेरे बाद ज़ैस मां तै शुद्ध भोइ जेवरो थियो, तै पपड़ी तैसेरे चेमड़ी पुड़ बड़ी फैली गाए, त तै फिरी याजके कां हिराव गाए; 8 ते अगर याजके फिरी जांच केरतां लेइहोए कि पपड़ी चेमड़ी मां फैली जेवरीए, त तै तैस अशुद्ध ठहराए; किजोकि तैन कोढ़े आहे।

9 "अगर कोढ़ेरो ज़ेरो रोग कोन्ची मैन्हु भोइ गाए, त तै याजके कां पुज़व गाए; 10 ते याजक तैस हेरे, ते अगर तै शोजश तैसेरे चेमड़ी मां छ़ित्ती भोए, ते तैसेरे वजाई सेइं बाल भी छ़ित्ते भोइ जेवरे भोन, ते तैस शोजशी मां चेमड़ी बगैर मास भोए, 11 त याजक समझ़े कि तैसेरे चेमड़ी मां पुरानू कोढ़े, एल्हेरेलेइ तै तैस अशुद्ध भोल्ही; ते बन्द न रख्खे, किजोकि तै त अशुद्धे। 12 ते अगर कोढ़ केन्चेरे चेमड़ी मां निस्तां इड़ी तगर फैली गाए, कि ज़ैड़ी कोन्च याजक हेरे रोगी मैन्हेरे क्रोड़ी करां पव्वन तगर कोढ़ सारे चेमड़ी पुड़ पेई जेवरू भोए, 13 त याजक रोड़ेच़ारे हेरे, ते अगर कोढ़ तैसेरे सैरी जानी पुड़ पेई जेवरू भोए, त तै तैस मैन्हु शुद्ध ठहराए; ते तैसेरी सारी जान बिलकुल छ़ित्ती भोइ जेवरीए तै शुद्ध ठहरे। 14 पन ज़ैखन तैस मां चेमड़ी बगैर मास लेइहोए, तैखन त तै अशुद्ध भोल्ही। 15 ते याजक चेमड़ी बगैर मासे हेरतां तैस अशुद्ध ठहराए; किजोकि तेरहु चेमड़ी बगैर मास अशुद्ध भोते; तैन कोढ़ भोते। 16 पन अगर तैन चेमड़ी बगैर मास फिरी छ़ित्तू भोइ गाए, त तै मैन्हु याजके कां हिरानेरे लेई गाए, 17 ते याजक तैस हेरे, ते अगर तै रोग फिरी छ़ित्तो भोइ गाए, त याजक रोगी शुद्ध समझ़े; तै शुद्ध ठहरे।

18 "फिरी अगर केन्चेरे चेमड़ी मां फोड़ो भोइतां ठीक भोइ जेवरो भोए, 19 ते फोड़ेरि ठारी मां छ़ित्ती ज़ेरि शोजश या लाल रंगे सेइं छ़ित्तो दाग भोए, त तै याजके कां हिराव गाए; 20 ते याजक तैस शोजशी हेरे, ते अगर तै चेमड़ी करां डुग्घी लेइहोए, ते तैसेरे बाल भी छ़ित्ते भोइ जेवरे भोन, त याजक इन ज़ैनतां तैस मैन्हु अशुद्ध ठहराए; किजोकि तै कोढ़ेरो रोगे ज़ै फोड़े मरां निसोरोए। 21 पन अगर याजक हेरे कि तैस मां छ़ित्ते बाल नईं, ते तै चेमड़ी करां डुग्घो नईं, ते तैसेरी चमक घट भोवरीए, त याजक तैस मैन्हु सत दिहाड़न तगर बन्द केरतां अलग रख्खे। 22 ते अगर तै रोग तैस वक्ते तगर चेमड़ी मां सच़्च़े फैली गाए, त याजक तैस मैन्हु अशुद्ध ठहराए; किजोकि तै कोढ़ेरो रोगे ज़ै होरन फैली सकते। 23 पन अगर तैना दाग न फैलन ते अपने ठारी पुड़ बनोरो राए, त तै फोड़ेरो दागे; याजक तैस मैन्हु शुद्ध ठहराए।

24 "फिरी अगर केन्चेरे चेमड़ी मां फुकोनेरो ज़खम भोए, ते तैस फुकोनेरे ज़खमे मां चेमड़ी बगैर दाग लाल रंगे सेइं छ़ित्तो या छ़ित्तो भोइ गाए, 25 त याजक तैस हेरे, ते अगर तैस दागे मरां बाल छ़ित्ते भोइ जेवरे भोन ते तैना चेमड़ी करां डुग्घे लेइहोन, त तैन कोढ़े; ज़ैन तैस फुकोनेरे दागे मरां निस्सोरू आहे; याजक तैस मैन्हु अशुद्ध ठहराए; किजोकि तैस मां कोढ़ेरो रोगे। 26 पन अगर याजक हेरे, कि दागे मां छ़ित्ते बाल नईं ते न तैन चेमड़ी मरां किछ डुग्घूए, ते तैसेरी चमक घट भोइ जेवरीए, त तै तैस सत दिहाड़न तगर बन्द केरतां अलग रख्खे, 27 ते अलग रानेरां सत दिहाड़ना बाद याजक तैस हेरे, ते अगर तैन चेमड़ी मां फैली जेवरू भोए, त तै तैस मैन्हु अशुद्ध ठहराए; किजोकि तैस कोढ़ेरो रोग आहे। 28 पन अगर तै दाग चेमड़ी मां नईं फैलेरो ते अपने ठारी पुड़े ज़ैड़ी थियो तैड़ी तेरहो भोए, ते तैसेरी चमक घट भोए, त तै फुकोनेरे वजाई सेइं शोजोरो भोए, याजक तैस मैन्हु शुद्ध ठहराए; किजोकि तै दाग फुकोनेरे वजाई सेइं भोवरोए।

29 "फिरी अगर कोन्ची मड़द या कौन्शरे दोग्गे पुड़, या मड़देरे दैढ़ी मां दाग भोए, 30 त याजक तैस दागे हेरे, ते अगर तै चेमड़ी करां डुग्घो लेइहोते, ते तैस मां तोसे-तोसे पतले बाल भोन, त याजक तैस मैन्हु अशुद्ध ठहराए; तैस क्रोड़ी या दैढ़रू कोढ़ भोनूए। 31 ते अगर याजक तैस दागे हेरे, कि तै चेमड़ी करां डुग्घो नईं ते तैस मां काले-काले बाल नईं, त तै तैस रोगी सत दिहाड़न तगर बन्द केरतां अलग रख्खे, 32 ते सत्तोवं दिहाड़े याजक रोगी हेरे, तैखन अगर तै दाग फैलोरो न भोए, ते तैस मां तोसे-तोसे बाल न भोन, ते दाग चेमड़ी करां डुग्घो न लेइहोए, 33 त तै मैन्हु तैस दागेरे अलावा बाकी सैरी जगाई अपनि टिन्ड बनाए, फिरी याजक तैस दागे बाले मैन्हु होरे भी सत दिहाड़न तगर बन्द केरे; 34 ते सत्तोवं दिहाड़े याजक दागे हेरे, ते अगर तै दाग चेमड़ी मां फैलेरो न भोए ते चेमड़ी करां डुग्घो न लेइहोए, त याजक तैस मैन्हु शुद्ध ठहराए; ते तै अपने लिगड़न धोइतां शुद्ध ठहरे। 35 पन अगर तैसेरे शुद्ध ठहरानेरे बाद दाग चेमड़ी मां किछ भी फैले, 36 त याजक तैस हेरे, ते अगर तै चेमड़ी मां फैलोरो भोए, त याजके तोसे बाल तोपनेरी ज़रूरत नईं, किजोकि तै मैन्हु अशुद्धे। 37 पन अगर तैसेरी नज़री मां तै दाग ज़ेरो थियो तेरहो बनोरो भोए, ते तैस मां काले-काले बाल ज़मोरे भोन, त तै समझ़े कि दाग ठीक भोवरोए, ते तै मैन्हु शुद्धे; याजक तैस शुद्धे ठहराए।

38 "फिरी अगर कोन्ची मड़दे या कौन्शरे चेमड़ी मां छ़ित्ते दाग भोन, 39 त याजक हेरे, ते अगर तैसेरे चेमड़ी मां तैना दाग घट छ़ित्ते भोन, त तै समझ़े कि तैस चेमड़ी मां निस्सोरो सिर्फ दागे; तै मैन्हु शुद्ध ठहरे।

40 "फिरी ज़ेसेरे दोग्गेरे बाल झ़ेड़ी जेवरे भोन, त इन समझ़ा कि तै गंजो त आहे पन शुद्धे। 41 ते ज़ेसेरे दोग्गेरे एग्री बाल झ़ड़ोरे भोन, त तैसेरू कुपा गंजू आहे पन शुद्धे। 42 पन अगर गंजे क्रोड़ी पुड़ या गंजे कुपाए पुड़ लाली ज़ेरि छ़ित्तो रोग भोए, त समझ़नू कि तैन तैसेरे गंजे क्रोड़ी पुड़ या गंजे कुपाए पुड़ निस्सोरू कोढ़े। 43 एल्हेरेलेइ याजक तैस हेरे, ते अगर रोगे शोजश तैसेरे गंजे क्रोड़ी या गंजे कुपाए पुड़ एरी लाली सेइं छ़ित्ती भोए ज़ेन्च़रे चेमड़रे कोढ़े मां भोते, 44 त तै मैन्हु कोढ़ी ते तै अशुद्धे; ते याजक तैस ज़रूर अशुद्ध ठहराए; किजोकि तै रोग तैसेरे क्रोड़ी पुड़े।

45 "ज़ैस मां तै रोग भोए तैस कोढ़ी मैन्हेरां लिगड़ां छ़िन्दोरां ते दोग्गेरे बाल खिलारोरे रान, ते तै अपने बेइयें ओठे ढेकतां अशुद्ध, अशुद्ध ज़ोतो राए। 46 ज़ेत्रे दिहाड़न तगर तै रोग तैस मां राए तेत्रे दिहाड़न तगर तै अशुद्ध रालो; ते तै अशुद्ध ठहरालो; एल्हेरेलेइ तै अकैल्‍लो राए, तैसेरी रानेरी ठार डेरन करां बेइर भोल्ही।

47 "फिरी ज़ैन लिगड़न मां कोढ़ेरो रोग भोए, चाहे तैना लिगड़ां उन्ना केरां भोन चाहे सेनरां, 48 तै रोग चाहे तैस सनी या उनाले बुनोरे लिगड़ां केरे ताने मां भोए चाहे बाने मां, या तै रोग चमड़े मां या चमड़ेरे बनोरी कोन्ची चीज़ मां भोए, 49 अगर तै रोग कोन्ची लिगड़ेरे चाहे ताने मां चाहे बाने मां, या चमड़े मां या चमड़ेरी कोन्ची चीज़ी मां या सब्ज़ ज़ेरी या लाल ज़ेरि भोए, त समझ़ा कि तै कोढ़ेरो रोगे ते तै याजके हिराव गाए। 50 ते याजक तैस चीज़ी हेरे, ते रोगे बैली चीज़ी सत दिहाड़ां केरे लेई बन्द केरे; 51 ते सत्तोवं दिहाड़े तै तैस चीज़ी फिरी हेरे, ते अगर तै लिगड़ेरे चाहे ताने मां चाहे बाने मां, या चमड़े मां या चमड़ेरे बनोरी कोन्ची चीज़ी मां फैली जेवरी भोए, त समझ़ा कि रोग कोढ़े, एल्हेरेलेइ तै चीज़, चाहे केरहे भी कम्मे मां की न एइती भोए, तांभी अशुद्ध ठहराली। 52 तै तैस लिगड़े ज़ेसेरे ताने या बाने मां तै रोग भोए, चाहे तैन उन्ना केरू भोए चाहे सनेरू भोए, या चमड़ेरी चीज़ भोए, तैस फुक्‍के, तै रोग गालने बालू कोढ़े; तै चीज़ अग्गी मां फुक्‍की गाए।

53 "अगर याजक हेरे कि तै रोग तैस लिगड़ेरे ताने या बाने मां, या चमड़ेरी तैस चीज़ी मां न फैलो, 54 त ज़ैस चीज़ी मां रोग भोए तैस धोनेरो हुक्म दे, तैखन तैस होरे भी सत दिहाड़न तगर बन्द केरतां रख्खे; 55 ते तैसेरे धोनेरे पत्ती याजक तैस हेरे, ते अगर रोगेरो न त रंग बेदलोरो भोए, ते न रोग फैलोरो भोए, त समझ़ा कि तै अशुद्धे; तै अग्गी मां फुक्‍कनी, किजोकि चाहे तै रोग अन्तर चाहे बेइर भोए तांभी तै खाने बालो रोगे। 56 पन अगर याजक हेरे, कि तैसेरे धोनेरे बाद रोगेरी चमक घट भोइ जेई, त तै तैस लिगड़ेरे चाहे ताने चाहे बाने मरां, या चमड़े मरां छ़िन्दतां कढे; 57 ते अगर तै रोग तैखन भी तैस लिगड़ेरे ताने या बाने मां, या चमड़ेरे तैस चीज़ी मां लेइहोए, त समझ़ा कि तै निस्तां, निस्सोरो रोगे; ते ज़ैस मां तै रोग भोए तैन अग्गी मां फुकनू। 58 अगर तैस लिगड़े मरां ज़ेसेरे ताने या बाने मां रोग भोए, या चमड़ेरी ज़ै चीज़ भोए तै ज़ैखन धोई गाए ते रोग च़ेलि गाए, त तै दूइयोवं फेरे धोइतां शुद्ध ठहरे।"

59 उन्नरे या सनेरे लिगड़ां केरे ताने या बाने मां, या चमड़ेरी कोन्ची चीज़ी मां ज़ै कोढ़ेरो रोग भोए तैसेरे शुद्ध ते अशुद्ध भोनेरो ईए कानूने।