लैव्यव्यवस्था 25

ज़मीनरे लेई आरामेरो साल

1 ज़ैखन यहोवाए सीनै पहाड़ेरे नेड़े मूसे सेइं ज़ोवं, 2 "इस्राएली लोकन सेइं ज़ो कि ज़ैखन तुस तैस मुल्खे मां दाखल भोथ ज़ै अवं तुसन देताईं, तैखन ज़मीनी यहोवारे लेई आराम मैल्हे। 3 शा साल त तुस अपनु-अपनु ऊडार लेइयथ, ते शेइयोवं साल अपनि-अपनि दाछ़री बाग छ़िम्पतां मुल्खेरी फसल अकोट्ठी केरथ; 4 पन सत्तोवं साले एपनी ज़मीनी यहोवारे लेई महा आरामेरो साल मैल्हे; तैस मां न त अपनु ऊडार बेइयथ ते न अपनि दाछ़री बाग छ़िम्पथ। 5 ज़ैन किछ कट्टोरे उडारे मां अपने आपे लग्गे तैन न केटथ, ते अपनि बगैर छ़िम्पोरि दाछ़री बागरी दाछ़ी न ट्लोड़थ; किजोकि तै ज़मीनरे लेई बड़े आरामेरो साल भोल्हो। 6 ज़मीनरे आरामेरे मौकेरी फसली करां तुसन, ते तुश्शे दास-दैसिन, ते तुसन साथी रानेबाले मज़दूरन ते परदेशी लोकन भी खाने जो मैल्हेलू; 7 ते तुश्शे जानबरां केरू ते मुल्खे मां ज़ेत्रे जीप जन्तू भोन तैन केरि भी खूराक धेरतरे सब पैदावारी मरां भोल्ही।

जुबलरो साल

8 "सत आरामेरे साल, मतलब सत गुणा सत साल गेनथ, सत्ते आरामेरे सालां केरो ई मौको 49 साल भोल्हो। 9 तैखन सत्तोवं महीनेरे दशोवं दिहाड़े, मतलब प्रायश्चितेरे दिहाड़े, जय-जयकारेरे ज़ोरेरी आवाज़ देनेबालो नरशिंगो अपने सारे मुल्खे मां हर ठैरी बज़ाव गालो। 10 ते तैस पज़ाहवं साले पवित्र केरतां मेन्नथ, ते मुल्खेरे सारे रानेबालां केरे लेई छुटकारेरो प्रचार केरथ; तैस जो तुश्शे इड़ी जुबलरो*25:10 जुबलरो इब्रानी मां इस शब्देरो मतलब "हुड़े।" (यहो. 6.5 हेरा) पन रोड़ेच़ारे "हुड़ेरे शिंगे" पुड़ भी इस्तेमाल कियोरो थियो। ज़ै अक बाज़ेरे रूपे मां (निर्गमन 19.13) इस्तेमाल कियोरो थियो। आखरी मां, ई बहाली एरे तिहारे मां इस्तेमाल कियोरो थियो कि हुड़ेरू शिंग बज़ानेरी खासयत थी। साल ज़ोवं गालो; तैस मां तुस अपनि-अपनि धेरती ते अपने-अपने घराने मां वापस एज्जथ। 11 तुश्शे इड़ी तै पज़ाहवं साले जो जुबलरो साल ज़ोवं गाए; तैस मां तुस न बेइयथ, ते ज़ैन अपने आपे उगे तैस भी न केटथ, ते न बगैर छ़िम्पोरि दाछ़रे बागरे दाछ़न ट्लोड़थ। 12 किजोकि तै त जुबलरो साल भोल्हो; तै तुश्शे लेई पवित्र भोल्हो; तुस तैसेरी पैदावार उडारे मरां नेइ-नेइ खेइयथ।

13 "इस जुबलरे साले मां तुस अपनि-अपनि धेरती पुड़ वापस एज्जी सकेले। 14 ते अगर तुस अपने रिश्तेदारन जो किछ बेच़थ या अपने रिश्तेदारन करां किछ घिन्थ, त तुस एक्‍की होरि पुड़ ज़ुलम न केरथ। 15 जुबलरे बाद ज़ेत्रे साल बीतोरे भोन तैन केरि गिनतरे मुताबिक कीमत केरतां एक्‍की होरि करां घिन्नथ, ते बाकी सालेरी फसलरे मुताबिक तै तींजो बेच़े। 16 ज़ेत्रे साल होरे रान एत्री कीमत बधाई गाली, ते ज़ेत्रे साल घट भोन एत्री कीमत घटाई गाली, किजोकि सालेरी फसलरी तैदाद ज़ेत्री भोल्ही तेत्री तै तींजो बेच़ेलो। 17 तुस अपने-अपने रिश्तेदारन पुड़ ज़ुलम न केरथ; अपने परमेशरेरो डर मेन्नथ; अवं तुश्शो परमेशर यहोवा आईं।

सत्तोवं सालेरे लेई इंतज़ाम

18 "एल्हेरेलेइ तुस मेरे विधन मेन्नथ, ते मेरे नियमन पुड़ समझ़दैरी सेइं च़ेलथ; किजोकि एरू केरने सेइं तुस तैस मुल्खे मां निडर भोइतां बस्सेले। 19 धरती अपनि पैदावार उगाली, ते तुस पेट भेरतां खाएले, ते तैस मुल्खे मां निडर भोइतां बस्सेले। 20 ते अगर तुस ज़ोथ कि सत्तोवं साले मां अस कुन खामेले, न त अस बेमेले न अपने उडारेरी फसल अकोट्ठी केरमेले?" 21 त समझ़ा कि अवं तुसन शेइयोवं साले मां एरी बरकत देइलो, कि ज़मीनरी फसल ट्लाई सालन तगर कम्मे एज्जेली। 22 तुस अठोवं साले मां ज़मीन बेले, ते पुरानी फसली मरां खाते राले, ते नोवोवं सालेरी फसल ज़ांतगर न मैल्हे तांतगर तुस पुरानी फसली मरां खाते राले।

ज़मीनरे किछ होरे कानून

23 "ज़मीन हमेशारे लेई बेच़ी न गाली, किजोकि ज़मीन मेरीए; ते तैस मां तुस परदेशी ते बेइरियें लोक भोल्हे। 24 पन तुस अपने हिस्सेरे सारे मुल्खे मां ज़मीनी बेच़तां बादे मां फिरी छुटेइयथ। 25 अगर तेरे लोकन मरां कोई कंगाल भोइतां अपनि खास ज़मीनी मरां किछ बेच़े, त तैसेरे कुटमेरे लोकन मरां ज़ै सेब्भना नेड़े भोए तै एइतां अपने मैन्हेरी बेच़ोरी ज़मीनी छुटाए। 26 अगर कोन्ची मैन्हेरे लेई कोई छुटानेबालो न भोए, ते तैस कां एत्री दौलत भोए कि एप्पु अपने हिस्से छुटेई सके, 27 त तै तैसेरे बिकनेरे वक्ते करां सालां केरि गिनती केरतां बाकी सालां केरि फसलरी कीमत तैस, ज़ैनी तै घिन्नोरी भोए दे; तैखन तै अपने ज़मीनरो मालिक भोइ गालो। 28 पन अगर तैस कां एत्री रकम न भोए कि तैस फिरी अपनि बनेई सके, त तैसेरी बेच़ोरी ज़मीन जुबलरे सालन तगर घिन्ने बालन कां राहेली; ते जुबलरे साले मां छुट्टी गाली तैखन तै मैन्हु अपने ज़मीनरो फिरी मालिक भोइ गाए।

29 "फिरी कोई मैन्हु शहरपनाह बाले नगरे मां रानेरू घर बेच़े, त तै बेच़नेरां पत्ती सालेरे अन्ट्ल तैस छुटेई सकेलो, मतलब पूरे साल तैस मैन्हु छुटानेरो अधिकार भोल्हो। 30 पन अगर तै पूरे साले मां न छुटाए, त तैन घर ज़ैन शहरपनाह बाले नगरे मां भोए घिन्ने बालेरू बनेरू राए, ते पीढ़ी-पीढ़ी मां तैस्से खानदानेरू बनोरू रालू; ते जुबलरे साले मां भी न छुट्टे। 31 पन बगैर शहरपनाहरे ड्लाव्वां केरां घरां त मुल्खेरे ऊडारां केरां ज़ेरां गना गान; तैना छुटेइयोतन भी, ते तैना जुबलरे साले मां छुट्टी गान। 32 फिरी भी लेवी लोकां केरे अपने हिस्सेरे नगरां केरां ज़ैना घरां भोन तैन्न लेवी ज़ैखन चान तैखन छुटेई सकतन। 33 ते अगर कोई लेवी अपनो हिस्सो न छुटाए, त तै बेच़ोरू घर ज़ैन तैसेरे हिस्सेरे नगरे मां भोए जुबलरे साले मां छुट्टी गाए; किजोकि इस्राएली लोकां केरे दरमियान लेवी लोकां केरो हिस्सो तैन केरां नगरन मां तैना घरां आन। 34 पन तैन केरे नगरां केरे च़ेवरे पासां केरि च़ारनेरी ज़मीन बेच़ी न गाए; किजोकि तै तैन केरो हमेशारो हिस्सो भोल्हो।

कंगाल लोकन ओधार देनू

35 "फिरी अगर तेरो कोई मैन्हु कंगाल भोइ गाए, ते तैसेरी हालत तेरे सामने तरसे काबल भोइ गाए, त तू तैसेरी देखभाल केरां; तै परदेशी या मुसाफरेरो ज़ेरो तीं साथी राए। 36 तैस करां सूत या बढ़ती न नेइयां; अपने परमेशरेरो डर मेन्नां; ज़ैस सेइं तेरे मैन्हु तीं साथी ज़िन्दगी गुज़ैरी सकन। 37 तैस सूते पुड़ रुपेइये न देइयां, ते न तैस खानेरी चीज़ां फैइदेरे लालच़े सेइं देइयां। 38 अवं तुश्शो परमेशर यहोवा आईं; मीं तुसन कनान मुल्ख देनेरे लेई ते तुश्शे परमेशर ठहरानेरे इरादे सेइं तुस मिस्र मुल्खे मरां केढतां आनोरेथ।

गुलामन छुटानेरी विधि

39 "फिरी अगर तेरे लोकन मरां कोई तेरे सामने कंगाल भोइतां अपने आपे तींजो बेच़ी छ़डे, त तैस करां गुलामेरी ज़ेरि सेवा न करेइयां। 40 तै तीं सेइं साथी मज़दूर या मुसाफरेरो ज़ेरो राए, ते जुबलरे साले तगर तीं सेइं साथी रेइतां सेवा केरतो राए; 41 तैखन तै बाल-बच्‍चन समेत तीं करां निस्सी गाए, ते अपने खानदाने मां ते अपने सियानां केरि अपने ज़मीनी मां वापस गाए। 42 किजोकि इस्राएली लोक मेरे दास आन, ज़ैना मीं मिस्र मुल्खे मरां केढतां आनोरेन; एल्हेरेलेइ तैना दासेरे रीति सेइं बेच़े न गान। 43 तैस पुड़ सेखती सेइं अधिकार न केरथ; अपने परमेशरेरो डर मेनतां तैस सेइं बर्ताव केरनो। 44 तेरे ज़ैना नौकर-नौकरैनी भोन तैना तुश्शे च़ेवरे पासां केरे कौमन मरां भोन, ते नौकर ते नौकरैनी तैन्ने मरां घिन्ने गान। 45 ज़ैना मुसाफर लोक तुश्शे दरमियाने मां परदेशी भोइतां राले, तैन मरां ते तैन केरे घरान्न मरां भी ज़ैना तुश्शे आसे-पासे भोन, ते ज़ैना तुश्शे मुल्खे मां पैदा भोवरे भोन, तैन मरां तुस नौकर ते नौकरानी घिन्ना; ते तैना तुश्शे हिस्सो ठहरन। 46 तुस अपने मट्ठन भी ज़ैना तुश्शे बाद भोल्हां तैन केरे अधिकारी केरि सकेले, ते तैना तैन केरो हिस्सो ठहरन; तैन मरां तुस हमेशा अपने लेई नौकर नेइयथ, पन तुश्शे अपने लोक इस्राएली भोन तैन पुड़ अपनो अधिकार सेखती सेइं न च़लेइयथ।

47 "फिरी अगर तेरे सामने कोई परदेशी या मुसाफर धनी भोइ गाए, ते तैसेरे सामनेरे तेरो इस्राएली ढ्ला कंगाल भोइतां अपने आपे तेरे सामने तैस परदेशी या मुसाफर या तैसेरे खानदाने जो बेच़ी छ़डे, 48 त तैसेरे बिके गानेरां पत्ती तै फिरी छुटेइयोते; तैसेरे ढ्लान मरां कोई तैस छुटेई सकते, 49 या तैसेरो चाचो, या चाचेरू मट्ठू, फिरी तैसेरे कुलेरो कोई भी नेड़ेरो रिश्तेदार तैस छुटेई सकते; या अगर तै धनी भोइ गाए, त तै एप्पु अपने आपे छुटेई सकते। 50 तै अपने घिन्ने बाले सेइं साथी अपने बिकनेरे साले करां जुबलरे साले तगर हिसाब केरे, ते तैसेरे बिकनेरी कीमत सालां केरे गिनतरे मुताबिक भोए, मतलब तै कीमत मज़दूरेरे दिहाड़ां केरे बराबर तैस साथी भोल्ही। 51 अगर जुबलरे सालेरे बड़े साल रेइ गान, त ज़ेत्रे रुपेइयेन सेइं तै घिन्नोरो भोए तैन मरां तै अपने छुटानेरी कीमत एत्रे सालां केरे मुताबिक दे। 52 अगर जुबलरे सालेरे थोड़े साल रेइ जेवरे भोन, त तै अपने मालिके सेइं साथी हिसाब केरतां अपने छुटानेरी कीमत एत्रे सालां केरे मुताबिक वापस दे। 53 तै अपने मालिके साथी तैस मज़दूरारो ज़ेरो राए ज़ेसेरी सालेरी मज़दूरी ठहराई गातीए; ते तैसेरो मालिक तैस पुड़ तेरे सामने सेखती सेइं अधिकार न केरे। 54 ते अगर तै इन रीतन सेइं छुटाव न गाए, त तै जुबलरे साले मां अपने बाल-बच्‍चन सने छुट्टी गाए। 55 किजोकि इस्राएली लोक मेरे दास आन; तैना मिस्र मुल्खे मरां मेरे कढोरे दास आन; अवं तुश्शो परमेशर यहोवा आईं।"