लैव्यव्यवस्था 8

हारून ते तैसेरे मट्ठां केरू अभिषेक

1 फिरी यहोवाए मूसे सेइं ज़ोवं, 2 "तू हारून ते तैसेरे मट्ठन, तैन केरे लिगड़न, ते अभिषेकेरो तेल, ते पाप बेलरां बछ़ड़ां, ते दूईये हुड़न, ते अखमीरी रोट्टी केरि टोकरी 3 मिलापे बाले तेम्बेरे दारे पुड़ आन, ते तैड़ी सारी मण्डली अकोट्ठी केर।"

4 यहोवारे दित्तोरे हुक्मेरे मुताबिक मूसे मण्डली मिलापे बाले तेम्बेरे दारे पुड़ अकोट्ठी की। 5 तैखन मूसे मेण्डली सेइं ज़ोवं, "यहोवाए इन कम केरनेरो हुक्म दित्तोरोए।"

6 फिरी मूसे हारून ते तैसेरां मट्ठां नेड़े एन्हतां पैनी सेइं नीयां। 7 तैखन तैनी तैन्न अंगरखो लुवाव, ते कमरबन्ध पलेटतां चोगो लुवाव, ते एपोद लेइतां एपोदेरे बुनोरे पट्टे सेइं एपोद बेन्धतां कस्सो। 8 ते तैनी चपरास लेइतां चपरासी मां ऊरीम ते तुम्मीम रख्खू। 9 फिरी तैनी तैसेरे दोग्गे पुड़ पगड़ी बेन्धतां पेगड़ी पुड़ सामने सोन्नेरी पट्टी लेइतां पवित्र ताज लवं, ज़ैस तरीके सेइं यहोवाए मूसे हुक्म दित्तोरो थियो।

10 तैखन मूसे अभिषेकेरो तेल नेइतां मिलापे बाले तेम्बेरू ते ज़ैन किछ तैस मां थियूं तैन सेब्भी चीज़ां केरू भी अभिषेक केरतां तैना पवित्र की। 11 ते तैस तेले मरां किछ तैनी वेदी पुड़ सत फेरेईं छ़िड़को, ते सारे सामाने सने वेदरू ते पेइड़न समेत कुण्डेरू अभिषेक केरतां तैना सब चीज़ां पवित्र की। 12 ते तैनी अभिषेक केरनेरे तेले मरां किछ हारूनेरे दोग्गे पुड़ छ़ेडतां तैसेरू अभिषेक केरतां तै पवित्र कियो। 13 फिरी मूसे हारूनेरां मट्ठां नेड़े एन्हतां, तैन्न अंगरखे लुवेइतां, कमरबन्ध बेन्धतां तैन केरे दोग्गे पुड़ टोपी रख्खी, ज़ैस तरीके सेइं यहोवाए मूसे हुक्म दित्तोरो थियो।

14 फिरी तैनी पापबेलरू बछ़ड़ू नेड़े निव; ते हारून ते तैसेरे मट्ठेईं अपने-अपने हथ पापबेलरे बछ़ड़ेरे क्रोड़ी पुड़ रख्खे। 15 तैखन तैन बलि कियूं, ते मूसे खून नेइतां एंगलोई सेइं वेदरे च़ेवरे शिंगन पुड़ लेइतां पवित्र की, ते खून वेदरे पेइड़े पुड़ उलटाव, ते तैसेरे लेई प्रायश्चित केरतां तै पवित्र की। 16 ते मूसे आंट्लन पुड़ीं सब चर्भी, ते कलैज़े पुड़ीं झिल्‍ली, ते चेर्भी समेत दूईये गुर्दे नेइतां वेदी पुड़ फुक्‍के। 17 पन बछ़ड़ेरी खाड़ी ते मास ते तैसेरी आंट्लां तैनी डेरन करां बेइर अग्गी मां फुक्‍की, ज़ेन्च़रे सेइं यहोवा परमेशरे मूसे हुक्म दित्तोरो थियो।

18 फिरी तैनी होमबेलरो हुड़ सामने नियो, ते हारून ते तैसेरे मट्ठेईं अपने-अपने हथ हुड़ेरे क्रोड़ी पुड़ रख्खे। 19 तैखन मूसे तै बलि कियो, ते तैसेरो खून वेदी पुड़ च़ेवरे पासन छ़िड़को। 20 तैखन हुड़ेरे टुक्ड़े केरतां मूसे क्रोड़ी ते चेर्भी समेत टुक्ड़े फुक्‍के। 21 तैखन आंट्लां ते खुरैड़ू पैनी सेइं धोआं, ते मूसे पूरो हुड़ वेदी पुड़ फुक्‍को, ते तैन पसंद एजनेबाली खुशबू देनेरे लेई होमबलि ते यहोवारे लेई हबन भोइ जेवं, ज़ेन्च़रे सेइं यहोवाए मूसे हुक्म दित्तोरो थियो।

22 फिरी तैनी दूइयोवं हुड़ ज़ै संस्कारेरो हुड़ थियो नेड़े नियो, ते हारून ते तैसेरे मट्ठेईं अपने-अपने हथ हुड़ेरे क्रोड़ी पुड़ रख्खे। 23 तैखन तै बलि कियो, ते मूसे तैसेरे खूने मरां किछ नेइतां हारूनेरे देइने कन्नेरे बेइयें पासे पुड़ ते तैसेरे देइने हथ्थे ते देइने पव्वेरे नोठन पुड़ लव। 24 ते तैनी हारूनेरां मट्ठां नेड़े नियां, ते खूने मरां किछ एक्‍की-एक्‍केरे देइने कन्नेरे बेइयें पासे पुड़ ते देइने हथ ते देइने पव्वेरे नोठन पुड़ लव; फिरी मूसे खून वेदी पुड़ च़ेवरे पासन छ़िड़को। 25 ते तैनी चर्भी, ते मोट्टू पौंछ़ड़, ते आंट्लन पुड़ीं सब चर्भी, ते कलैज़े पुड़ीं झिल्‍ली समेत दूईये गुर्दे, ते देइनी ज़ंघ, इन सब नेइतां अलग रख्खू; 26 ते अखमीरी रोट्टरी टोकरी ज़ै यहोवारे सामने रख्खोरी थी तैस मरां अक अखमीरी रोट्टी, ते तेले सेइं सन्नोरे अट्टेरो अक फुलको, ते अक पापड़ी नेइतां चर्भी ते देइनी ज़ंघी पुड़ रख्खी; 27 ते इना सब चीज़ां हारून ते तैसेरे मट्ठां केरे हथ्थे पुड़ रेखी जेई, ते हिलानेरी च़ढ़तलरे लेई यहोवारे सामने हिलाई जेई। 28 तैखन मूसे तैना फिरी तैन केरे हथ्थन पुड़ेरां नेइतां तैन वेदरी होमबेलि पुड़ फुक्‍की, इन पसंद एजनेबाली खुशबू देनेरे लेई संस्कारेरी च़ढ़तल ते यहोवारे लेई हबन थियूं। 29 तैखन मूसे हुड़ेरी छाती नेइतां हिलानेरी च़ढ़तलरे लेई यहोवा कां हिलाई; ते संस्कारे हुड़े मरां मूसेरो हिस्सो ईए भोव, ज़ेन्च़रे यहोवाए मूसे हुक्म दित्तोरो थियो।

30 तैखन मूसे अभिषेकेरो तेल ते वेदी पुड़ेरो खून, दूईयने मरां किछ नेइतां हारून ते तैसेरे लिगड़न पुड़, ते तैसेरे मट्ठन ते तैन केरे लिगड़न पुड़ भी छ़िड़को; ते तैनी लिगड़न सने हारून भी पवित्र कियो।

31 तैखन मूसे हारून ते तैसेरे मट्ठन सेइं ज़ोवं, "मासे मिलापे बाले तेम्बेरे दारे पुड़ पकाथ, ते तैस रोट्टी ज़ै संस्कारेरे टोकरी मांए तैट्ठी खाथ, ज़ेरो मीं हुक्म दित्तोरोए कि हारून ते तैसेरां मट्ठां तैस खान। 32 ते मास ते रोट्टी मरां ज़ैन बाकी रेही गाए तैस अग्गी मां फुक्‍कथ। 33 ते ज़ांतगर तुश्शे संस्कारे दिहाड़े पूरे न भोन तांतगर, मतलब सत दिहाड़न तगर मिलापे बाले तेम्बेरे दारेरे बेइर न गेइयथ, किजोकि तै सत दिहाड़न तगर तुश्शू संस्कार केरतो रालो। 34 ज़ैस तरीके सेइं अज़ कियोरू आहे तेन्च़रे केरनेरो हुक्म यहोवाए दित्तोरोए, ज़ैस सेइं तुश्शू प्रायश्चित कियूं गालू। 35 एल्हेरेलेइ तुस मिलापे बाले तेम्बेरे दारे पुड़ सत दिहाड़न तगर रात-दिहाड़ी रुकोरे रेइयथ, ते यहोवारो हुक्म मेन्नथ, ताके तुस मेरि न गाथ; किजोकि एरहो हुक्म मीं दित्तोरोए।" 36 तैखन यहोवारे इना सब हुक्मां केरे मुताबिक ज़ैना तैनी मूसे नेबेरे ज़िरिये दित्तोरे थिये हारून ते तैसेरे मट्ठेईं कियूं।