1 फिरी यहोवाए मूसे सेइं ज़ोवं, 2 "हारून ते तैसेरे मट्ठन ज़ो कि इस्राएली लोकां केरि पवित्र कियोरी चीज़न मरां ज़ैना चीज़ां तैना मेरे लेई पवित्र केरतन तैन करां अलग रान, ते मेरे पवित्र नंव्वे अपवित्र न केरन; अवं यहोवा आईं। 3 ते तैन सेइं ज़ो कि तुश्शी पीढ़ी-पीढ़ी मां तुश्शे सारे खानदाने मरां ज़ै कोई अपनि अशुद्ध हालती मां तैन पवित्र कियोरी चीज़न कां गाए, ज़ैना इस्राएली लोक यहोवारे लेई पवित्र केरतन, तै मैन्हु मेरे सामनेरां हटव गाए; अवं यहोवा आईं। 4 हारूनेरे खानदाने मरां कोन्ची भी कोढ़ भोए, या तैस धात भोए, त तै मैन्हु ज़ांतगर शुद्ध न भोइ गाए, तांतगर पवित्र कियोरी चीज़न मरां किछ न खाए। ते ज़ै लाशरे वजाई सेइं अशुद्ध भोवरो भोए, या ज़ैस धात च़लती भोए, एरे मैन्हु सेइं ज़ै कोई हुरे, 5 ते ज़ै कोई कोन्ची एरे पेटेरे भारे च़लनेबाले जानबरे सेइं हुरे तैस सेइं लोक अशुद्ध भोइ सकतन, या कोन्ची एरे मैन्हु सेइं हुरे ज़ैस मां कोन्ची किसमेरी अशुद्धता भोए ज़ै तैस भी लेग्गी सकतीए। 6 त तै याजक ज़ै इन मरां कोन्ची सेइं हुरे ड्लवझ़ी तगर अशुद्ध रालो, ते ज़ांतगर पैनी सेइं निहान न दे, तांतगर पवित्र चीज़न मरां किछ न खाए। 7 तैखन दिहाड़ो डुबने पुड़ भोए तैखन तै शुद्ध ठहरे; ते तैखन तै पवित्र चीज़न मरां खेइ बटेलो, किजोकि तैसेरी रोट्टी तैए आहे। 8 ज़ै जानबर एप्पु मर्रो भोए या होरि जानबरे दल्‍लोरो भोए तैस खेइतां तै अपने आपे अशुद्ध न केरे; अवं यहोवा आईं। 9 एल्हेरेलेइ याजक लोक मेरे सौंफोरे कम्मन ज़िमेदैरी सेइं केरन, एरू न भोए कि तैना तैन्न अपवित्र केरतां पापेरो भार छ़ून, ते इसेरे वजाई सेइं मेरि भी गान; अवं तैन केरो पवित्र केरनेबालो यहोवा आईं।

10 "बखले कुलेरो मैन्हु, कोन्ची पवित्र चीज़ी न खाए, चाहे तै याजकेरो मेहमान भोए या मज़दूर भोए, त तै भी कोई पवित्र चीज़ न खाए। 11 अगर याजक कोन्ची गुलामे रुपेइये देइतां घिन्ने, त तै गुलाम तैस मरां खेइ सकते; ते ज़ै याजकेरे घरे मां ज़र्मोरो भोए चाहे खानदानेरो या गुलाम, तैना भी तैसेरे रोट्टी मरां खान। 12 ते अगर याजकेरे कुइयरो होरि कुलेरे कोन्ची मड़दे सेइं ड्लाह भोए, त तै च़ढ़तल च़ैढ़ोरी पवित्र चीज़न मरां न खाए। 13 अगर याजकेरी कुई विधवा या शारोरी भोए, ते तैसेरे बच्‍चे न भोन, ते तै अपने बचपनेरी रीतरे मुताबिक अपने बाजी केरे घरे मां रहती भोए, त तै अपने बाजी केरे रोट्टी मरां खाए; पन बखले कुलेरो कोई तैस मरां न खाए। 14 ते अगर कोई मैन्हु ज़ै याजक न भोए कोन्ची पवित्र चीज़ी मरां किछ बिसरतां खाए, त तै तैसेरो पंच़ोंव हिस्सो बेद्धतां तैस याजके जो भरे। 15 तैना इस्राएली लोकां केरि पवित्र कियोरी चीज़न, ज़ैन तैना यहोवारे लेई च़ाढ़तन, अपवित्र न केरन। 16 तैना तैन्न अपनि पवित्र चीज़न मरां खुवेइतां तैन करां पापेरो दोष न छ़ुवान; अवं तैन केरो* पवित्र केरनेबालो यहोवा आईं।"

17 फिरी यहोवाए मूसे सेइं ज़ोवं, 18 "हारून ते तैसेरे मट्ठन सेइं ते सारे इस्राएली लोकन समझ़ेइतां ज़ो कि इस्राएलेरे घराने या इस्राएली लोकन मां रानेबाले परदेशन मरां कोई की न भोए, ज़ै मिन्नत या अपने मेर्ज़री बलि केरनेरे लेई यहोवा जो कोई होमबलि च़ाढ़े, 19 त अपने लेई कबूल केरने काबल भोनेरे लेई दांत या भैड्डन या छ़ेल्‍लन मरां बगैर नुक्से नर च़ाढ़े। 20 ज़ैस मां कोई भी नुक्स भोए तैस न च़ैढ़थ; किजोकि तैन तुश्शे लेई कबूल केरने काबल न भोल्हु। 21 ते ज़ै कोई दांतन या भैड्डां-छ़ेल्‍लन मरां खास चीज़न बन्धू केरनेरे लेई या अपने मेर्ज़री बेलरे लेई यहोवा जो मेलबलि च़ाढ़े, त कबूल भोनेरे लेई ज़रूरे कि तै बगैर नुक्से भोए, तैस मां कोई भी नुक्स न भोए। 22 ज़ै कानो या ज़ेसेरो अंग ट्लुटोरो या कट्टोरो भोए, या तैस मां रसौली या खराड़ां या काणी भोए, एरन यहोवारे लेई न च़ैढ़थ, तैन्न वेदी पुड़ यहोवारे लेई हबन न च़ैढ़थ। 23 ज़ैस कोन्ची दांते या भैड्डी या थाव्वेरो कोई अंग जादे या घट भोए तैस अपने मेर्ज़रे बेलरे लेई च़ैढ़ी सकतथ, पन मिन्नत पूरी केरनेरे लेई तै कबूल न भोल्हो। 24 ज़ेसेरे अण्ड ढ्लेन्च़ोरे या ट्लुटोरे या कटोरे भोन तैस यहोवारे लेई न च़ैढ़थ, ते अपने मुल्खे मां भी एरू कम न केरथ। 25 फिरी इन मरां कोन्ची तुस अपने परमेशरेरी रोट्टी सेमझ़तां कोन्ची परदेशी करां नेइतां न च़ैढ़थ; किजोकि तैन मां दोष ते कलंके, एल्हेरेलेइ तैना तुश्शे लेई कबूल न भोल्हे।"*

26 फिरी यहोवाए मूसे सेइं ज़ोवं, 27 "ज़ैखन बछ़ड़ू या भैड्डरो या छ़ेल्‍लरो बच्‍चो ज़र्मोरो भोए, त तै सत दिहाड़न तगर अपनि अम्मा साथी राए; फिरी अठोवं दिहाड़ेरां बाद तै यहोवारे लेई अग्गी मां च़ाढ़ोरी बलि कबूल भोल्ही। 28 चाहे बछ़ी, चाहे भैड-छ़ल्‍ली भोए, तैस ते तैसेरे बच्‍चन एक्सां बलि न केरथ। 29 ते ज़ैखन तुस यहोवारे लेई शुक्र केरनेरी मेलबलि च़ाढ़थ, त तैस इस्से तरीके सेइं ज़ैस सेइं तै कबूल केरने काबल भोए। 30 तैन तैस्से दिहाड़े खाव गाए, तैस मरां किछ भी झ़ेझ़ां तगर न राए; अवं यहोवा आईं।

31 "एल्हेरेलेइ तुस मेरे हुक्मन मन्ना ते तैन केरे मुताबिक केरा; अवं यहोवा आईं। 32 ते मेरे पवित्र नंव्वे अपवित्र न केरथ, किजोकि अवं इस्राएली लोकन मां ज़रूर पवित्र मन्नो गालो; अवं तुश्शो पवित्र केरनेबालो यहोवा आईं, 33 ज़ैने तुस मिस्र मुल्खे मरां केढतां आनोरेथ ज़ैस सेइं तुश्शो परमेशर बनोरो रेही; अवं यहोवा आईं।"