1 फिरी यहोवाए मूसे सेइं ज़ोवं, 2 "इस्राएली लोकन सेइं इन ज़ो कि ज़ैखन कोई मैन्हु अपनि मन्नत पूरी केरने लगे, त मन्नतरो मैन्हु तेरी रेखोरी कीमतरे मुताबिक यहोवारे भोल्हे; 3 एल्हेरेलेइ अगर तै 20 साल या तैस करां जादे ते 60 सालन घट उमरारो मड़द भोए, त तैसेरे लेई पवित्र रखोरे शेकेलेरे मुताबिक 50 शेकेल* चाँदी भोल्ही। 4 अगर तै कौन्श भोए, त 30 शेकेल भोल्ही। 5 फिरी अगर तैसेरी उमर 5 साल या तैस करां जादे ते 20 सालन करां घट भोए, त मट्ठेरे लेई त 20 शेकेल, ते कुइअरे लेई 10 शेकेल भोल्ही। 6 अगर तैसेरी उमर अक महीनो या तैस करां जादे ते 5 सालन करां घट भोए, त मट्ठेरे लेई त 5, ते कुइअरे लेई 3 शेकेल भोल्ही। 7 फिरी अगर तैसेरी उमर 60 साल या तैस करां जादे भोए, त मड़देरे लेई 15 शेकेल, ते कौन्शरे लेई दश शेकेल भोल्ही। 8 पन अगर कोई एत्रो गरीब भोए कि तै याजकेरी रख्खोरी कीमत न देइ सके, त तै याजकेरे सामने खड़ो कियो गाए, ते याजक तैसेरी रकम बनाए, मतलब ज़ेत्रू मिन्नत केरनेबाले करां भोइ सके, याजक तैसेरे मुताबिक बनाए।

9 "फिरी ज़ैन जानबरन मरां लोक यहोवा जो च़ढ़तल च़ाढ़न, अगर एरन मरां कोई फैसलो कियो गाए, त ज़ै जानबर कोई यहोवा जो दे तै पवित्र भोल्हो। 10 तै तैस कोन्ची तरीके सेइं न बदले, न त तै बुरेरे बदले रोड़े, ते न रोड़ेरे बदले बुरे दे; ते अगर तै तैस जानबरेरे बदले होरो जानबर दे, त तै ते तैसेरो बदलो दूईये पवित्र भोल्हे। 11 ते ज़ैन जानबरन मरां लोक यहोवारे लेई बलिदान न च़ाढ़न एरन मरां अगर तै भोए, त तै तैस याजकेरे सामने खड़ो केरे, 12 तैखन याजक जानबरे रोड़ेच़ारे हेरतां तैसेरी कीमत बनाए; ते ज़ेत्री याजक बनाए तैसेरी कीमत तेत्री भोल्ही। 13 पन अगर जानबरेरो मालिक तैस जानबरे छुटाने चाहे त ज़ै कीमत याजके रख्खोरी भोल्ही तैस मां तैसेरो पंच़ोंव हिस्सो होरो बेद्धतां दे।

14 "फिरी कोई अपनु घर यहोवारे लेई पवित्र केरतां मिन्नत मन्ने, त याजक अंदाज़ो लेइतां तैसेरी कीमत बनाए; ते ज़ेत्री याजक बनाए तैसेरी कीमत तेत्री भोल्ही। 15 ते अगर घरेरो पवित्र केरनेबालो तैस छुटानू चाहे, त ज़ेत्रे रुपेइये याजके तैसेरी कीमत बनेवरी भोए तैस मां तै पंच़ोंव हिस्सो होरो बेद्धतां दे, तैखन तैन घर तैस्से कां रालू।

16 "फिरी कोई अपनि मलकीत ज़मीनरो कोई हिस्सो यहोवारे लेई पवित्र केरनो चाहे, त तैसेरी कीमत इसेरे मुताबिक भोल्ही, कि तैस मां केत्रू बीज़ पेलू; ज़ेत्रू ज़मीनी मां होमेर* भेरतां जौआं केरू बीज़ लग्गे, एत्रेरी कीमत 50 शेकेल भोल्ही। 17 अगर तै अपनु ऊडार जुबलरे साले मां पवित्र कराए, त तैसेरी कीमत तेरे रखनेरे मुताबिक भोल्ही; 18 ते अगर तै अपनु ऊडार जुबलरे सालेरे पत्ती पवित्र केरे, त ज़ेत्रे साल दूइयोवं जुबलरे सालेरे बाकी रान तैन केरे मुताबिक याजक तैसेरे लेई रुपेइयां केरो हिसाब केरे, तैखन ज़ेत्रू हिसाबे मां एज्जे तेत्रू याजकेरे रखने करां घट भोल्हु। 19 ते अगर उडारे पवित्र कराने बालो तैस छुटाने चाहे, त ज़ै कीमत याजके रख्खोरी भोल्ही तैस मां तै पंच़ोंव हिस्सो होरो बेद्धतां दे, तैखन ऊडार तैसेरू भोल्हु। 20 ते अगर तै ऊडार छुटानू न चाहे, या तैनी तैन होरि मैन्हु जो बेच़ोरू भोए, त ऊडार अग्रोवं जो कधी न छुटावं गालू; 21 पन ज़ैखन तैन ऊडार जुबलरे साले मां छुट्टे, तैखन पूरे तरीके सेइं अर्पण कियोरे उडारेरू ज़ेरे यहोवारे लेई पवित्र भोल्हु, तै याजकेरे लेई इस्तेमाल भोने बाली ज़मीन भोल्ही। 22 फिरी कोई अपनु घिन्नोरू ऊडार, ज़ैन तैसेरी अपनि ज़मीनरे उडारन मरां न भोए, यहोवारे लेई पवित्र कराए, 23 त याजक जुबलरे साले तगरेरो हिसाब केरतां तैस मैन्हेरे लेई ज़ेत्रू बनाए एत्रू तै यहोवारे लेई पवित्र सेमझ़तां तैस्से दिहाड़े दे। 24 जुबलरे साले मां तैन ऊडार तैसेरे अधिकारे मां ज़ैस करां तैन घिन्नोरू भोए फिरी एज्जी गाए, मतलब ज़ेसेरी तै अपनि ज़मीन भोए तैसेरी फिरी भोइ गाली। 25 ज़ैस-ज़ैस चीज़री कीमत याजक बनाए तैसेरी कीमत पवित्र ठारारे शेकेलेरे हिसाब सेइं बनेवरे। शेकेल 20 गेरा* केरो ठहरे।

26 "पन पैलतू जानबरां केरो ज़ेठो, ज़ैन बड्डू भोनेरे वजाई सेइं यहोवारू भोल्हु, तैस कोई पवित्र न बनाए; चाहे तैन बछ़ड़ू भोए, चाहे भैड या छ़ेल्‍लरो बच्‍चो, तैन यहोवारू आहे। 27 पन अगर तैन अशुद्ध जानबरेरू भोए, त तैसेरो पवित्र केरनेबालो तैस याजकेरी रेखोरी कीमतरे मुताबिक तैसेरो पंच़ोंव हिस्सो होरो बेद्धतां छुटेई सकते; ते अगर तै न छुटाव गाए, त याजकेरी रेखोरी कीमती सेइं बेच़े।

28 "पन अपनि सैरी चीज़न मरां ज़ैन किछ कोई यहोवारे लेई अर्पण केरे, चाहे मैन्हु भोए चाहे जानबर, चाहे तैसेरी अपनि ज़मीनरू ऊडार भोए, एरी कोई अर्पण कियोरी चीज़ न त बेच़ी गाली ते न छुटाई गाली; ज़ैन किछ अर्पण कियूं गाए तैन यहोवारे लेई परमपवित्र भोल्हु। 29 मैन्हन मरां ज़ै कोई मौतरी सज़ारे लेई अर्पण कियो गाए, तै छुटाव न गालो; ज़रूर तै मारो गालो।

30 "फिरी ज़मीनरी फसलरो सारो दशोवं हिस्सो, चाहे तैन ज़मीनरू बीज़ भोए चाहे बुट्टेरो फल, तैन यहोवारू आहे; तैन यहोवारे लेई पवित्र भोल्हु। 31 अगर कोई अपने दशोवं हिस्से मरां किछ छुटानू चाहे, त पंच़ोंव हिस्सो बेद्धतां तैस छुटाए। 32 ते बेछ़ी-दांत ते भैड्डां-छ़ेल्‍ली, मतलब ज़ैना-ज़ैना जानबर गन्नेरे लेई लट्ठी हठ निस्सने बालन तैन केरो दशोवं हिस्सो, मतलब दश-दशन पत्ती अक-अक जानबर यहोवारे लेई पवित्र ठहरे। 33 कोई तैसेरे पासे रोड़ेच़ारे ध्यान न केरे कि तैन रोड़ू कि बुरू; ते न तैस कोई बदले, अगर कोई तैस बदले भी, त तै ते तैसेरो बदलो दूईये पवित्र भोल्हे; ते तै कधी छुटाव न गालो।"

34 ज़ैना हुक्म यहोवाए इस्राएली लोकां केरे लेई सीनै पहाड़े पुड़ मूसे दित्तोरे थिये, तैना इन्ना आन।