1 शुरुआती मां* ज़ैखन परमेशरे अम्बर ते धेरतरी रच़ना की। 2 धरती बेडौल ते सुनसान थी, ते डुग्घे पैनी पुड़ आंधरू थियूं; ते परमेशरेरी आत्मा* पैनी पुड़ फिरती थी।

3 तैखन परमेशरे ज़ोवं, "लौ भोए," त लौ भोइजेइ। 4 ते परमेशरे लौ हेरी कि रोड़ीए; ते परमेशरे लौ आंधरे करां अलग की। 5 ते परमेशरे लौई जो दिहाड़ी ते आंधरे जो रात ज़ोवं। ते ड्लोझ़ भोइ फिरी झ़ेझ़ भोइ। एन्च़रां पेइली दिहाड़ी भोइ।*

6 फिरी परमेशरे ज़ोवं, "पैनेरे मझ़ाटे अक एरी दरमियानी भोए कि पानी दूई हिस्से भोइ गाए।" 7 तैखन परमेशरे अक दरमियानी बनेइतां तैसेरू बुनियूं पानी ते तैसेरू बेइयूं पानी अलग-अलग कियूं; ते तेरहु भोइ जेवं। 8 ते परमेशरे तैस दरमियानी जो अम्बर ज़ोवं। फिरी ड्लोझ़ भोइ फिरी झ़ेझ़ भोइ। एन्च़रां दूइयोवं दिहाड़ी भोइ।

9 फिरी परमेशरे ज़ोवं, "अम्बरेरू बुनियूं पानी एक्‍की ठैरी अकोट्ठू भोए, ते शुक्‍कोरी ज़मीन लेइहोए," ते तेरहु भोवं। 10 ते परमेशरे शुक्‍कोरी ज़मीनी जो धरती ज़ोवं, ते ज़ैन पानी अकोट्ठू भोवं तैस जो तैने समुन्दर ज़ोवं; ते परमेशरे हेरू कि रोड़ूए। 11 फिरी परमेशरे ज़ोवं, "धेरती पुड़ नीलो घास, ते बीज़े बाले निक्‍के-निक्‍के बुट, ते फल देनेबाले बुट भी ज़ैन केरू बीज़ तैन मां अपने-अपने किसमेरे मुताबिक भोते ज़मीनी पुड़ लग्गन," ते तेरहु भोइ जेव। 12 एन्च़रां धेरती पुड़ नीलो घास, ते निक्‍के-निक्‍के बुट ज़ैन मां अपने-अपने किसमेरे मुताबिक बीज़ भोते, ते फल देनेबाले बुट ज़ैन केरू बीज़ हर एक्‍की मां तैन केरे किसमेरे मुताबिक भोते लग्गे; ते परमेशरे हेरू कि रोड़ूए। 13 फिरी ड्लोझ़ भोइ फिरी झ़ेझ़ भोइ। एन्च़रां ट्लेइयोवं दिहाड़ी भोइ।

14 फिरी परमेशरे ज़ोवं, "दिहाड़ी राती करां अलग केरनेरे लेई अम्बरेरे दरमियाने मां लौआं भोन; ते तैना निशानन, ते खास वक्तन, ते दिहाड़न, ते सालां केरि वजा भोन। 15 ते तैना लौआं अम्बरेरे दरमियाने मां धेरती पुड़ लौ देने बैली भोन," ते तेरहु भोवं। 16 तैखन परमेशरे दूई बेड्डी लौआं बनेई; तैन मरां बड्डी लौ दिहैड़ी पुड़ राज़ केरनेरे लेई, ते निकड़ी लौ राती पुड़ राज़ केरनेरे लेई बनाई; ते तारे भी बनाए। 17 परमेशरे तैना अम्बरेरे दरमियाने मां एल्हेरेलेइ रख्खे कि तैना धेरती पुड़ लौ देन, 18 ते दिहाड़ी ते राती पुड़ राज़ केरन ते लौई आंधरे करां अलग केरन; ते परमेशरे हेरू कि रोड़ूए। 19 फिरी ड्लोझ़ भोइ फिरी झ़ेझ़ भोइ। एन्च़रां च़ेवरोवं दिहाड़ी भोइ।

20 फिरी परमेशरे ज़ोवं, "पानी ज़ींते प्रैणेईं सेइं बड़ू भेरि गाए, ते च़ुड़ोलू धेरती करां बह अम्बरेरे दरमियाने मां उडरन।" 21 एन्च़रे सेइं परमेशरे किसमां-किसमां केरे बड्डे-बड्डे पैनेरे जानबरां केरि, ते तैन सब ज़ींते प्रैणी केरि रच़ना की ज़ैना च़लतन-फिरतन ज़ैन सेइं पानी बड़ू भेरोवं ते किसमां-किसमां केरां उडरने बालां च़ुड़ोलू केरि भी रच़ना की; ते परमेशरे हेरू कि रोड़ूए। 22 परमेशरे इन ज़ोइतां तैन्न बरकत दित्ती, "फुल्‍ला-फल्‍ला, ते समुन्दरेरे पैनी मां भेरोई गाथ, ते च़ुड़ोलू धेरती पुड़ बधन।" 23 फिरी ड्लोझ़ भोइ फिरी झ़ेझ़ भोइ। एन्च़रां पंच़ोंव दिहाड़ी भोइ।

24 फिरी परमेशरे ज़ोवं, "धेरती मरां अक-अक ज़ींतो प्राणी, मतलब पैलतू जानबर, ते पेटेरे भारे च़लनेबाले जीप जन्तू, ते धेरतरे जंगली जानबर, किसमां-किसमां केरे मुताबिक पैदा भोन," ते तेरहु भोवं। 25 एन्च़रां परमेशरे धेरतरे किसमां-किसमां केरे जंगली जानबर, ते किसमां-किसमां केरे पैलतू जानबर, ते किसमां-किसमां केरे ज़मीनी पुड़ सब पेटेरे भारे च़लनेबाले जीप जन्तू बनाए; ते परमेशरे हेरू कि रोड़ूए।

26 फिरी परमेशरे ज़ोवं, "अस मैन्हु अपने रूपे मां ते अपनो ज़ेरो बनाम; ते तैना समुन्दरेरी मेछ़लन, ते अम्बरेरे च़ुड़ोलन, ते पैलतू जानबरन, ते सारे धेरती पुड़, ते सब रेंगनेबाले जीप जन्तून पुड़ ज़ैना ज़मीनी पुड़ पेटेरे भार च़लने बालेन, अधिकार रखन।" 27 तैखन परमेशरे अपने रूपे मां इन्सानेरी रच़ना की, ते अपने रूपे मां परमेशरे इन्सानेरी रच़ना की; नर ते नारी बनेइतां तैनी तैन केरि रच़ना की। 28 ते परमेशरे तैन्न बरकत दित्ती; ते तैन सेइं ज़ोवं, "फुल्‍ला-फल्‍ला, ते धेरती पुड़ भेरोई गाथ, ते तैस अपने कैबू मां केरा; ते समुन्दरेरी मेछ़लन, ते कने अम्बरेरां च़ुड़ोलन, ते धेरती पुड़ रेंगनेबाले सब जीप जन्तून पुड़ अधिकार रखा।" 29 फिरी परमेशरे तैन सेइं ज़ोवं, "शुना, ज़ेत्रे बीज़े बाले निक्‍के-निक्‍के बुट पूरे धेरती पुड़ आन ते ज़ेत्रे बुट्टन मां बीज़े बाले फल भोतन, तैना सब मीं तुसन दित्तोरेन; तैना तुश्शे खानेरे लेई आन; 30 ते ज़ेत्रे धेरतरे जानबर, ते अम्बरेरां च़ुड़ोलू, ते ज़मीनी पुड़ पेटेरे भारे च़लनेबाले जीप जन्तून, ज़ैन मां ज़िन्दगरे प्राण आन, तैन सेब्भी केरे खानेरे लेई मीं सब नीले-नीले निक्‍के बुट दित्तोरेन," ते तेरहु भोइ जेवं। 31 तैखन परमेशरे ज़ैन किछ बनेवरूए थियूं, सब हेरू, त कुन हेरू, कि तैन बड़ू रोड़ूए। फिरी ड्लोझ़ भोइ फिरी झ़ेझ़ भोइ। एन्च़रां शेइयोवं दिहाड़ी भोइ।