1 एक्सां यहोवा परमेशरे अब्रामे सेइं ज़ोवं, "तू अपनि ज़र्म ठार, ते रिश्तेदारन*12:1 रिश्तेदारन मतलब ज़ैड़ी तू पैदा भोवरोस, या ज़ैड़ी तेरे भियाल आन।, ते अपने बाजेरे घरे छ़ेडतां तैस मुल्खे मां च़लो गा ज़ै अवं तीं हरेइलो। 2 ते अवं तीं मरां अक बड्डी कौम बनेइलो, ते तीं बरकत देइलो, ते तेरू नवं बड़ू महान केरेलो, ते तू बरकतरो ज़िरियो भोल्हो। 3 ते ज़ैना तीं आशिर्वाद देन, तैन्न अवं बरकत देइलो; ते ज़ैना तीं फिटकार देन, तैन अवं लानत देइलो; ते दुनियारे सारे लोकन तेरे ज़िरिये बरकत मैल्हेली।"

4 यहोवारे इस वचनेरे मुताबिक अब्राम च़लो; ते लूत भी तैस सेइं साथी च़लो; ते ज़ैखन अब्राम हारान मुल्खे मरां निस्सो त तैस वक्ते तै 75 सालां केरो थियो। 5 गांते बार अब्राम अपनि कौन्श सारै, ते अपने ढ्लाएरू मट्ठू लूत, ते ज़ै धन-दौलत तैनेईं अकोट्ठी कियोरी थी, ते ज़ैना लोक तैनेईं हाराने मां हासिल कियोरे थिये, सब नेइतां कनान मुल्खे जो च़ले; ते तैना कनान मुल्खे मां आए। 6 तैस मुल्खे मांमेइं गाते अब्राम शेकेमे मां, मोरेरे बंज़ बुट्टे कां पुज़्ज़ो। तैस वक्ते तैस मुल्खे मां कनानी लोक रहते थिये। 7 तैखन यहोवा परमेशरे अब्रामे दर्शन देइतां ज़ोवं, "ई मुल्ख अवं तेरे खानदाने देइलो।" ते तैने तैड़ी यहोवारे लेई, ज़ैने तैस दर्शन दित्तोरू थियूं, अक वेदी बनाई। 8 फिरी तैट्ठां अग्गर गेइतां, तै तैस पहाड़े पुड़ अव, ज़ैन बेतेलरे पूर्वेरे पासे; ते अपनो डेरो तैस जगाई पुड़ खड़ो कियो ज़ेसेरे पश्चिमेरे पासे बेतेल नगर, ते पूर्वेरे पासे आई नगरे; ते तैड़ी भी तैने यहोवारे लेई अक वेदी बनाई: ते यहोवा कां प्राथना की। 9 ते अब्राम अग्रोवं गेइतां दक्षिण मुल्खेरे पासे च़लो जेव।

10 तैस मुल्खे मां काल पेव: एल्हेरेलेइ अब्राम मिस्र मुल्खे जो च़लो जेव कि तैड़ी परदेशी भोइतां राए किजोकि तैस मुल्खे मां बड़ो काल पेवरो थियो। 11 फिरी एरू भोवं कि मिस्रेरे नेड़े पुज़तां, तैने अपनि कौन्श सारै सेइं ज़ोवं, "शुन, मीं पतोए, कि तू अक खूबसूरत कौन्शस; 12 ते ज़ैखन मिस्री लोक तीं लाहेले त तैखन ज़ोले, ‘ई तैसेरी लाड़ीए,’ एल्हेरेलेइ तैना मीं त मैरी छ़डेले, पन तीं ज़ींते रख्खेले। 13 एल्हेरेलेइ तू इन ज़ोइयां, ‘अवं तैसेरी बेइन आईं,’ ताके तेरे वजाई सेइं तैना मीं सेइं रोड़ो बर्ताव केरन ते तेरे वजाई सेइं मेरी जान बेच़ी गाए।" 14 फिरी एरू भोवं कि ज़ैखन अब्राम मिस्र मुल्खे मां अव, तैखन मिस्री लोकेईं तैसेरी कौन्श लाही कि ई बड़ी खूबसूरते। 15 ते ज़ैखन फ़िरौनेरे*12:15 फ़िरौन फ़िरौन मिस्र मुल्खेरे राज़ेरी पदवीए, एन कोन्ची राज़ेरू अपनु नवं नईं। फ़िरौनेरू अनुवाद (मिस्रेरो राज़ो) भोइ सकते। हाकिमेईं तै लाही ते फ़िरौनेरे सामने तैसारी तारीफ़ की: एल्हेरेलेइ तै कौन्श फ़िरौनेरे मेहले मां पुज़ाई। 16 ते फ़िरौने तैसेरे वजाई सेइं अब्रामे सेइं भलियाई की; ते तैस गब्बां, गोरू, नौकर-नौकरेनेइं, गधे-गेधी, ते ऊँट दित्ते।

17 तैखन यहोवा परमेशरे फ़िरौन ते तैसेरे घराने पुड़, अब्रामेरे कौन्श सारैरे वजाई सेइं बेड़ि-बेड़ि आफतां छ़ेडी। 18 तैखन फ़िरौने अब्राम कुजेइतां तैस सेइं ज़ोवं, "तीं मीं सेइं इन कुन कियूं? तीं मीं सेइं किजो न ज़ोवं कि तै तेरी लाड़ीए? 19 तीं किजो ज़ोवं कि तै तेरी बेइने? मीं तै अपनि कौन्श बनानेरे लेई आनी; पन हुनी अपनि कौन्श इट्ठां नेइतां च़लो गा।" 20 ते फ़िरौने अपने मड़दन तैसेरे बारे मां हुक्म दित्तो ते तैनेईं तै ते तैसेरी कौन्श, सब जाईदाती सने ज़ै तैसेरी थी भेज़ो।