16 "किजोकि परमेशरे दुनियारे लोकन सेइं एत्रो प्यार कियो कि तैनी अपनु एकलौतू मट्ठू दित्तू, ताके ज़ै कोई तैस पुड़ विश्वास केरे, तै नाश न भोए, बल्के हमेशारी ज़िन्दगी हासिल केरे। 17 किजोकि परमेशरे अपनु मट्ठू दुनियाई मां एल्हेरेलेइ नईं भेज़ोरू कि तै दुनियारे लोकन (तैन केरे पापां केरि) सज़ाह दे, बल्के एल्हेरेलेइ कि दुनियारे लोक तैसेरे ज़िरिये सेइं (पापां केरि सज़ाही करां) मुक्ति हासिल केरन। 18 ज़ै तैस पुड़ विश्वास केरते, तैस सज़ाह न मैल्हे। पन ज़ै मट्ठे पुड़ विश्वास न केरे, तै पेइलोए दोषी भोइ जेवरोए, किजोकि तैनी परमेशरेरे एकलौते मट्ठेरे नंव्वे पुड़ विश्वास नईं कियोरो।