यहोशू 20

जान बच़ानेरे लेई नगरां

1 एक्सां फिरी यहोवाए यहोशू सेइं ज़ोवं, 2 "इस्राएली लोकन सेइं इन ज़ो, ‘मीं मूसेरे ज़िरिये तुसन सेइं छ़पनेरे नगरां केरि ज़ै चर्चा कियोरी थी, तैसेरे मुताबिक तैन रखा,✝20:2 गिन. 35:9-29;व्यव. 4:41-43;19:1-13. 3 ताके ज़ै कोई गेलती सेइं या अनज़ाने मां कोन्ची मारे, तै तैन मरां कोन्ची मां नेश्शी गाए; एल्हेरेलेइ तै खूनेरो बदलो नेनेबाले करां बेंच़तां तुश्शी छ़पनेरी ठारी मां राए। 4 तै तैन मरां कोन्ची नगरे मां नेशतां गाए, ते तैस नगरेरे फाटके पुड़ खड़ो भोइतां तैट्ठेरे बुज़ुर्गन कां अपनो मुकदमो शुनाए; ते तैना तैस अपने नगरे मां एप्पु कां रखन, ते तैस कोई ठार देन, ज़ैस मां तै तैन सेइं साथी राए। 5 ते अगर खूनेरो बदलो नेनेबालो तैसेरो पीछो केरे,✝20:5 गिन. 35:25,28. त तैना इन ज़ोइतां कि तैनी अपनो पड़ोसी बगैर ज़ाने, ते पेइले तैस सेइं बगैर दुश्मनी रेखतां मारो, तैस खूनी तैसेरे हथ्थे मां न देन। 6 ते ज़ांतगर तै मेण्डलरे सामने फैसलेरे लेई खड़ो न भोए, ते ज़ांतगर तैन दूईयां केरो महायाजक न मेरि गाए, तांतगर तै तैस नगरे मां राए; तैसेरां बाद तै खूनी अपने नगरे जो वापस गाए ज़ैस मरां तै एवरो थियो, अपने घरे मां फिरी रेही सकेलो।’"

7 ते तैनेईं नप्ताली केरे पहाड़ी मुल्खे मां गलीलेरे केदेश नगरे*20:7 केदेश नगरे यरदन दरियारे पश्चिम पासे। मां, ते एप्रैमेरे पहाड़ी मुल्खे मां शेकेम नगरे मां, ते यहूदारे पहाड़ी मुल्खे मां किर्यतअर्बा नगरे पवित्र ठहराव (ज़ैस जो हेब्रोन भी ज़ोतन)। 8 ते यरीहो नगरे कां नेड़े यरदन दरियारे पूर्वेरे पासे तैनेईं रूबेनेरे गोट्लेरे हिस्से मां बेसेर नगरे, ज़ैन सुनसान ठैरी मां चौरस ज़मीनी पुड़ बस्सोरूए, ते गादेरे गोट्लेरे हिस्से मां गिलादेरे रामोते मां, ते मनश्शेरे गोट्लेरे हिस्से मां बाशान प्रदेशेरो गोलन भी ठहराव। 9 सारे इस्राएली लोकां केरे लेई, ते तैन केरे दरमियाने मां रानेबाले परदेशी केरे लेई भी, ज़ैना नगर एस मेर्ज़ी सेइं रख्खे जे, कि ज़ै कोई कोन्ची मैन्हु गेलती सेइं मारे तै तैन मरां कोन्ची मां नेश्शी गाए, ते ज़ांतगर न्यायेरे लेई मेण्डलरे सामने खड़ो न भोए, तांतगर खूनेरो बदलो नेनेबालो तैस न मारे, तैना इना आन।