यहोशू 2

यरीहो नगरेरो भेद घिन्नो

1 तैखन नूनेरे मट्ठे यहोशूए शित्तीम*2:1 शित्तीम इब्रानी मां इसेरो मतलब फूड़न बालो बुट भोते। नंव्वेरे ठारारे डेरे मरां च़ुपच़ारे दूई जासूस भेज़े ते तैन सेइं ज़ोवं, "गाथ ते तैस मुल्खेरो ते खास केरतां यरीहो नगरेरो भेद घिन्नी एज्जा।" तैना तैखने च़ले जे, ते राहाब नंव्वेरी एक्‍की वेश्यारे घरे मां जे ते तैना तैसारे कां बिश्शे। 2 तैखन केन्चे यरीहो नगरेरे राज़े कां गेइतां इन ज़ोवं, "अज़ राती किछ इस्राएली लोक इश्शे मुल्खेरो भेद घिन्नेरे लेई एवरेन।" 3 तैखन यरीहो नगरेरे राज़े राहाब नंव्वेरी कौन्शी जो सिपाही केरे ज़िरिये ऐह बिस्तार भेज़ो, "ज़ैना मैन्हु तेरे कां एवरेन, तैन केढतां बेइर आन; किजोकि तैना सैरी मुल्खेरो भेद घिन्नेरे लेई एवरेन।" 4 पन सिपेही केरे एजने करां पेइले तैस कौन्शां तैना दूईये ज़ने कोन्च छ़ुपेई छ़डे; ते एन्च़रे सेइं तैसां ज़ोवं, "इन सच़्च़े कि, तैना मैन्हु त मेरे कां एवरे थिये, पन मीं ऐह पतो न थियो, कि तैन केरू घर कोड़िए; 5 ते आंधरू भोवं ते नगरेरो फाटक बंद भोने करां पेइले तैना मैन्हु च़ले जे; ते फिरी मीं नईं पतो कि तैना कोरहां जे; ते तुस लूश केरा ते तैन केरो पीछो केरा त तुस तैन कां पुज़्ज़ी बटेले।" 6 पन तैसां कौन्शां तैना दूई जासूस नेइतां लाए पुड़ सनई बुट्टेरे लेकड़री शेंमोड़न हैठ छ़ूँ देइतां छ़ुपेइतां छ़डोरे थिये। 7 पन राज़ेरे सिपाही यरदन दरियारे बत्तां जे ते तैन केरि तोपी मां घाटे तगर च़ले जे, ते तैन मैन्हु केरे बेइर निस्ते नगरेरो फाटक बन्द केरि छ़डो।

8 ते तैना जासूस लाए पुड़ हेजू झ़ुलोरे भी न थिये, त राहाब तैन कां जेई ते तैन सेइं गल्‍लां केरने लगी। 9 ते तैन जासूसन सेइं ज़ोने लगी, "मीं त पूरू याकीने, कि यहोवाए तुसन लोकन ई मुल्ख दित्तोरोए, ते तुश्शो डर इश्शे मैन्हु केरे दिले मां बस्सोरोए, ते इश्शे मुल्खेरे सारे लोक तुश्शी वजाई सेइं डेरि जेवरेन। 10 किजोकि असेईं शुनेरूए कि ज़ैखन तुस मिस्र मुल्खे मरां निसोरे थिये, त यहोवाए लाल समुन्दर*2:10 लाल समुन्दर ई इस समुद्रे हिराते ज़ै इस्राएली लोकेईं मिस्र मुल्ख छ़ेडतां पार केरनो थियो, हेरा निर्गमन 14 शुकेवरो थियो। ते तुसेईं यरदन दरियारे पार एमोरी लोकां केरे दूई राज़े सीहोन ते ओगेरो बुरे तरीके सेइं सत्यानाश कियो। 11 ते एन शुन्ते इश्शो दिल डेरि जेवरोए, ते तुश्शी वजाई सेइं केन्चेरे भी जानी मां जान नईं राहोरी; किजोकि तुश्शो परमेशर यहोवा अम्बरे ते ज़मीनरो सिर्फ अक परमेशरे। 12 हुन्ना ज़ै महरबानी मीं तुसन पुड़ कियोरीए, एल्हेरेलेइ तुस मीं सेइं यहोवारी कसम खाथ, कि तुस भी मेरे बाजी केरे घराने पुड़ महरबानी केरेले, ते मीं एसेरो सच़्च़ो निशान हिराथ, 13 कि तुस मेरे अम्मा-बाजी, ढ्ला बेइनां ते तैन केरे सेभी रिश्तेदारन ज़ींते छ़ेडी देइयथ, ते इश्शे सेभी केरे प्राण मरने करां बच़ाले।" 14 तैखन तैन दूई जासूसेईं तैस सेइं ज़ोवं, "अगर तू इश्शी ऐह गल कोन्ची सेइं न ज़ोस, त तेरे प्राणां केरे बदले इश्शे प्राण गान; ते ज़ैखन यहोवा ई मुल्ख असन देलो, तैखन असां तीं सेइं बेड़ी दया ते सच़्च़ैई सेइं बर्ताव केरमेले।"

15 तैखन राहाब ज़ैसारू घर नगरेरे दिवारी✝2:15 नगरेरे दिवारी याक. 2:25. सेइं साथी थियूं, एल्हेरेलेइ राहाबां तैना दैरी मरां नगरेरे बेइर कढनेरे लेई रेसारो इस्तेमाल कियो। 16 ते राहाबां तैन सेइं ज़ोवं, "तुस पहाड़े पुड़ जो च़ले गाथ, एरू न भोए कि राज़ेरे सिपेहिन तुस मैल्ही गाथ; एल्हेरेलेइ कि तुश्शे तोप्पने बाले ज़ांतगर वापस न एज्जन, तांतगर, मतलब ट्लाई दिहाड़े तैड़ी छ़पोरे रेइयथ, तैल्‍ला पत्ती तुस च़ले गेइयथ।" 17 पन तैन जासूसेईं तैस कौन्शी सेइं ज़ोवं, "ज़ै कसम तीं असन दित्तोरिए तैसेरे बारे मां अस बेकसूर रहमेले। 18 शुन, ज़ैखन अस लोक इस मुल्खे मां एजमेले, तैखन ज़ैस दैरारे बत्तां तीं अस रेस्सी सेइं उन्ढे ओसालोरेम, ईए लाल रंगेरी सूट्लेरी रस्सी टेंगतां छ़ेडां; ते अपने अम्मा बाजी, ते ढ्ला बेइनां, यानी अपने घरानेरे सारे मैन्हु इस्से घरे मां एन्हतां रेखां। 19 अगर तैखन तैन मरां कोई दारेरे बेइर निसेलो, अस तैसेरे मौतरे ज़िमेवार नईं; ते असां बेकसूर भोमेले, पन अगर तेरे घरे मां रानेबालो कोई मारो गालो त तैसेरो दोष असन पुड़ भोल्हो।"

20 "ते अगर तू इश्शी गल कोन्ची सेइं ज़ोस, ते ज़ै कसम तीं असन दित्तोरिए, त तैस ट्लोड़नेरो दोष असन पुड़ न लग्गेलो ते अस बेकसूर मन्ने गामेले।" 21 राहाब ज़ोने लगी, "ज़ेन्च़रे तुसेईं ज़ोवं तेन्च़रे भोए" तैखन तैसां तैना मैन्हु भेज़ी छ़डे, ते तैना च़ले जे, ते तैसां तै लाल रंगेरी रस्सी दैरी सेइं बेन्धी छ़डी।

22 ते तैना च़लते-च़लते पहाड़े पुड़ पुज़्ज़ी जे, ते तैन केरे तोप्पने बालां केरे वापस एजने तगर, मतलब ट्लाई दिहाड़न तगर तैड़ी राए, ते तोप्पने बाले तैन सैरी बत्तन मां तोपते राए, पन तैना न मैल्हे। 23 तैखन तैना दूईये जासूस पहाड़े पुड़ेरां उन्ढे आए, ते यरदन दरियाएरे पार गेइतां नूनेरे मट्ठे यहोशू कां पुज़तां ज़ै किछ बीतना तैन सेइं बीतोरी थी, तैस सेइं बियान की। 24 ते तैनेईं यहोशू सेइं ज़ोवं, "सच़्च़े यहोवा तै सारो मुल्ख इश्शे हथ्थे मां दित्तोरोए; ते तैस मुल्खेरे रानेबाले लोक असन करां डेरि जेवरेन।"