1 फिरी इस्राएली लोकां केरि सारी मण्डली शीलो नगरे मां अकोट्ठी भोइतां तैड़ी मिलापे बालो तेम्बु खड़ो कियो; किजोकि मुल्ख तैन केरे कब्ज़े मां एवरो थियो।✝ 2 ते इस्राएली लोकन मरां सत गोट्लां केरे लोकन अपनो-अपनो हिस्सो हेजू न थियो मैल्होरो। 3 तैखन यहोशूए इस्राएली लोकन सेइं ज़ोवं, "ज़ै मुल्ख तुश्शे बुज़ुर्गां केरे परमेशर यहोवाए तुसन दित्तोरोए, तैस अपने कब्ज़े मां केरनेरे लेई तुस कैखन तगर ढिल्‍ले राले? 4 हुनी हर गोट्ले मरां ट्लाई-ट्लाई मैन्हु च़ुना, ते अवं तैन्न एल्हेरेलेइ भेज़ेलो कि तैना च़ेलतां पूरे मुल्खे मां घुम्मन, ते अपने-अपने गोट्लां केरे हिस्सां केरे मुताबिक तैसेरो हाल लिखी-लिखी मीं कां वापस एज्जन। 5 ते तैना बाकी मुल्खेरे सत हिस्से लिख्खन, यहूदी त दक्षिणेरे पासे अपने हिस्से मां, ते यूसुफेरे घरानेरे लोक उत्तरेरे पासे अपने हिस्से मां रान। 6 ते तुस मुल्खेरे सत हिस्से लिखतां मीं कां आनां; ते अवं इड़ी तुश्शे लेई अपने परमेशर यहोवारे सामने चिट्ठी छ़डेलो। 7 ते लेवी लोकां केरो तुश्शे दरमियाने मां कोई हिस्सो न भोल्हो, किजोकि यहोवारी दित्तोरी याजकेरी पदवी तैन केरो हिस्सो भोल्ही; ते गाद, रूबेन, ते मनश्शेरे अध्धे गोट्लेरे लोक यरदन दरियारे पूर्वेरे पासे यहोवारे दास मूसेरो दित्तोरो तैन अपनो-अपनो हिस्सो मैल्ही जेवरोए।"

8 तैखन तैना मैन्हु उठतां च़ेलि जे; ते ज़ैना तैस सारे मुल्खेरो हाल लिखनेरे लेई च़ले तैन यहोशूए हुक्म दित्तो, "गेइतां पूरे मुल्खे मां घुम्मां फिरा, ते तैसेरो हाल लिखतां मीं कां वापस एज्जा; ते अवं इड़ी शीलो मां तुश्शे लेई अपने परमेशर यहोवारे सामने चिट्ठी छ़डेलो।" 9 तैखन तैना मड़द च़ेलि पे, ते तैस मुल्खे मां हंठते फिरते, तैसेरे नगरां केरे सत हिस्से केरतां तैन केरो हाल किताबी मां लिखतां शीलोरी छेंवनी मां यहोशू कां आनो। 10 तैखन यहोशू शीलो मां यहोवारे सामने तैन केरे लेई चिट्ठी छ़ेडी; ते तैड़ी यहोशूए इस्राएली लोकन तैन केरे हिस्सां केरे मुताबिक मुल्ख बेंटतां दित्तो।

11 बिन्यामीनी लोकां केरे गोट्लेरी चिट्ठी तैन केरे कुलां केरे मुताबिक निस्सी, ते तैन केरो हिस्सो यहूदी लोक ते यूसुफेरे खानदानेरे मझ़ाटे रेही जेव। 12 ते तैन केरि हद उत्तरेरे पासेरां यरदन दरियाए करां शुरू भोइ, ते यरीहो नगरेरे उत्तरी पासेरां च़ढ़ते पश्चिमेरे पासे पहाड़ी मुल्खे मांमेइं निस्तां बेतावेन नगरेरे सुनसान ठैरी मां निस्सी; 13 तैट्ठां तै लूज नगरे मां पुज़ी (ज़ैस जो बेतेल भी ज़ोतन) ते लूज नगरेरे दक्षिणी पासेरां बुनीयें बेथोरोन नगरेरे दक्षिणेरे पहाड़े मेइं निस्तां अत्रोतदार नगरे मां उतरी जेई। 14 फिरी पश्चिमेरी हद मुड़तां बेथोरोन नगरेरे सामने ते तैसेरे दक्षिणी पहाड़े मेइं त किर्यतबाल नंव्वेरे यहूदी लोकां केरे एक्‍की नगरे पुड़ निस्सी (ज़ैस जो किर्यत्यारीम भी ज़ोतन) पश्चिमेरे पासेरी हद ऐह भोइ। 15 फिरी दक्षिणेरे पासेरी हद पश्चिमेरे पासेरां शुरू भोइतां किर्यत्यारीमेरी च़ोटी पुड़मेइं निस्तां नेप्तोहेरे नागे पुड़ निस्सी; 16 ते तैस पहाड़ेरी च़ोटी पुड़ पुज़्ज़ी, ज़ैन हिन्नोमेरे मट्ठेरे वैदरे सामने ज़ैन रपाईम नंव्वेरे वैदरे उत्तरेरे पासेन; तैट्ठां तै हिन्नोमेरे वैदी मां, मतलब यबूसेरे दक्षिणेरे पासेरां भोइतां एनरोगेल पैनेरे नागे मां उतरी; 17 तैट्ठां तै उत्तरेरे पासे मुड़तां एनशेमेशे मेइं निस्तां तैस गलीलोतेरे* पासे जेई, ज़ै अदुम्मीमेरी चढ़ेइयरे सामने, फिरी तैट्ठां तै रूबेनेरू मट्ठू बोहनेरे घोड़े तगर उतरी जेई; 18 तैट्ठां तै उत्तरी पासे निस्तां अराबारे सामने पहाड़े मेइं निस्तां अराबा मां* उतरी; 19 तैट्ठां तै हद बेथोग्ला नगरेरे उत्तरी पासे गेइतां खारे समुन्दरेरे उत्तरी पासे कोले मां यरदन दरियारे बन्ने पुड़ निस्सी; दक्षिणेरी हद ऐह राई। 20 ते पूर्वेरे हद यरदन दरियाए राई। ते बिन्यामीनेरे लोकां केरो हिस्सो, च़ेवरे पासां केरि हद्दन सेइं, तैन केरे कुलां केरे मुताबिक, ऐह राव।

21 बिन्यामीनी लोकां केरे गोट्ले तैन केरे कुलां केरे मुताबिक इना नगर मैल्हे, यरीहो, बेथोग्ला, एमेक्‍कसीस, 22 बेतराबा, समारैम, बेतेल, 23 अब्बीम, पारा, ओप्रा, 24 कपरम्मोनी, ओफनी ते गेबा; इना 12 नगर ते एनकेरां ड्लाव्वां मैल्हां। 25 फिरी गिबोन, रामाह बेरोत, 26 मिस्पे, कपीरा, मोसा, 27 रेकेम, यिर्पेल, तरला, 28 सेला, एलेप, यबूस (ज़ैस जो यरूशलेम भी ज़ोतन), गिबा ते किर्यत; इना 14 नगर ते एनकेरां ड्लाव्वां मैल्हां। बिन्यामीनी लोकां केरो हिस्सो तैन केरे कुलां केरे मुताबिक ऐह भोव।