1 किछ सालना बाद, ज़ैखन यहोवाए इस्राएली लोकन तैन च़ेवरे पासना दुश्मन्न करां आराम दित्तो, ते यहोशू बड़ो बुढो भोइ जेव, 2 एक्सां यहोशूए सारे इस्राएली लोकन, मतलब सियाने, खास बुज़ुर्ग, न्याय केरनेबाले ते प्रधान्न कुजेइतां ज़ोने लगो, अवं त बड़ो बुढो भोवरोईं; 3 ते तुसेईं हेरू कि तुश्शे परमेशर यहोवाए तुश्शे लेई इन सब कौमन सेइं कुन-कुन कियूं, किजोकि ज़ै तुश्शे तरफां लड़तो एवरोए तै तुश्शो परमेशर यहोवा आहे। 4 हेरा, मीं एना बेच़ोरी कौमां चिट्ठी छ़ेडी-छ़ेडी तुश्शे गोट्लां केरो हिस्सो केरतां दित्तोरिन; ते यरदन दरियाए करां लेइतां पश्चिमेरे पासे भूमध्य-सागरे तगर रानेबैली सैरी कौमन भी एन्च़रे दित्तोरोए, ज़ैना मीं केट्टी दित्तोरेन। 5 ते तुश्शो परमेशर यहोवा तैन तुश्शे सामनेरां तैन केरे मुल्खे मरां केढी देलो; ते तुस अपने परमेशर यहोवारे वचनेरे मुताबिक तैन केरे मुल्खेरे मालिक भोल्हे। 6 एल्हेरेलेइ बड़ी हिम्मत रेखतां, ज़ैन किछ मूसेरी कानूनेरी किताबी मां लिखेरूए तैसेरे पूरे केरने मां एहतियात केरनी, तैस करां न त देइने मुड़नू ते न बांए।* 7 इना ज़ैना कौमां तुश्शे मझ़ाटे रेही जेवरिन; तैन केरे दरमियाने मां न गेइयथ, ते न तैन केरे देबतां केरे नव्वेंरी गलबात केरनी, ते न तैन केरि कसम खानी, ते न तैन केरि पूज़ा केरनी, ते न तैन कां मथ्थो टेकनो, 8 पन ज़ेन्च़रे अज़्ज़ेरे दिहाड़े तगर तुस अपने परमेशर यहोवारी भक्ति केरने मां लगोरे रहतथ, तेन्च़रे रेइयां केरथ। 9 यहोवा तुश्शे सामनेरां बेड्डी-बेड्डी ते ज़बरदस्त कौमां केढोरिन; ते तुश्शे सामने अज़्ज़ेरे दिहाड़े तगर कोई टिकी नईं बटोरो।✝ 10 तुसन मरां अक सिपाही हज़ार दुश्मन सिपेहिन कढेलो, किजोकि तुश्शो परमेशर यहोवा अपने वाधेरे मुताबिक तुश्शे तरफां लड़ते। 11 एल्हेरेलेइ अपने परमेशर यहोवा सेइं प्यार रखनेरी पूरी एहतियात केरनी। 12 किजोकि अगर तुस कोन्ची वजाई सेइं यहोवा करां मुड़तां एन कौमां केरे होरे बाकी लोकन सेइं मिलने लगथ ज़ैना तुसन मां बच़ोरे राहोरेन, ते एन सेइं ड्लाह केरतां एन सेइं अपने रिशते बनाथ, 13 त पक्‍कू समझ़ा कि अग्रोवं तुश्शो परमेशर यहोवा एन कौमन तुश्शे सामनेरां न कढेलो; ते एना तुश्शे लेई ज़ेन्च़रे जाल ते फंदे, ते तुश्शे देल्‍लोड़ी केरे लेई ज़ेन्च़रे कोड़े, ते तुश्शी एछ़्छ़न मां ज़ेन्च़रे कंटे भोल्हे, ते आखरी मां तुसन इस रोड़ी ज़मीन पुड़ेरां ज़ै तुश्शे परमेशर यहोवाए तुसन दित्तोरिए बरबाद भोइ गाले।✝

14 "शुना, अवं त मरनेबालोईं, ते तुस सब अपने-अपने दिले ते मने मां ज़ानतथ, कि ज़ेत्री भलियैइयरी गल्‍लां इश्शे परमेशर यहोवाए इश्शे बारे मां ज़ोवरिन, तैन मरां अक भी बगैर पूरी भोने नईं राहोरी; तैना सैरी तुसन पुड़ घेटी जेवरिन, तैन मरां अक भी बगैर पूरी भोने नईं राहोरी। 15 त ज़ेन्च़रे तुश्शे परमेशर यहोवारी ज़ोवरी सैरी गल्‍लां तुसन पुड़ घेटी जेवरिन, तेन्च़रे यहोवा परमेशरे मुसीबतरी सैरी गल्‍लां भी तुसन पुड़ आनेलो, ते तुसन इस रोड़ी ज़मीनी पुड़ेरां, ज़ै तुश्शे परमेशर यहोवाए तुसन दित्तोरिए, सत्यानाश केरतां छ़डेलो। 16 अगर तुस तैस करारे, ज़ै तुश्शे परमेशर यहोवाए तुसन हुक्म देइतां एप्पु सेइं साथी कियोरोए, बगावत केरतां बखले देबतां केरि आराधना ते तैन कां मथ्थो टेकने लग्गेले, तैखन यहोवा परमेशरेरो क्रोध तुसन पुड़ भड़केलो, ते तुस इस रोड़े मुल्खे मरां ज़ै तैनी तुसन दित्तोरोए लूशी बरबाद केरेलो।"