यहोशू 5

इस्राएली लोकां केरो खतनो कियो गानो ते फ़सह तियार मनानू

1 ज़ैखन यरदन दरियारे पश्चिमेरे पासे रानेबाले एमोरी लोकां केरे सेभी राज़ेईं, ते समुद्रेरे बन्ने रानेबाले कनानी लोकां केरे सेभी राज़ेईं एन शुनू कि यहोवाए इस्राएली लोकां केरे पार गाने तगर तैन केरे सामने यरदन दरियारू पानी हटेइतां मझ़मेइं शुक्‍कोरी बत बनाई, तैखन इस्राएली लोकन करां डेरतां तैन केरो दिल घेमरोई जेव, ते तैन केरि जानी मां जान न राई।

2 तैस मौके यहोवाए यहोशू सेइं ज़ोवं, "चकमक घोड़ेरी छ़ुरी बनेइतां ज़ैना इस्राएली मड़द मिस्र मुल्खे मरां निसनेरे बाद पैदा भेवरेन तैन केरो खतनो केर।" 3 तैखन यहोशूए चकमक घोड़ां केरि छ़ुरी बनेइतां खैड़ी*5:3 खैड़ी इब्रानी भाषा मां "गिबाथ हरालोथ।" नंव्वेरे पहैड़ी पुड़ इस्राएली मड़दां केरो खतनो कराव। 4 ते यहोशूए ज़ै खतनो कराव, एसेरी वजाह ऐह थी कि ज़ेत्रे जंगरे काबल मैन्हु मिस्र मुल्खे मरां निस्सोरे थिये, तैना सब मिस्रे मरां निसनेरां पत्ती सुनसान ठैरी मां मेरि जेवरे थिये। 5 ज़ैना मड़द मिस्र मुल्खे मरां निसोरे थिये, तैन सेभी केरो खतनो भोवरो थियो, पन ज़ेत्रे बच्‍चे मिस्र मुल्खेरां निसनेरां पत्ती सुनसान ठैरी मां पैदा भोवरे थिये, तैन मरां केन्चेरो भी खतनो न थियो भोवरो। 6 किजोकि इस्राएली त 40 साल सुनसान ठैरी मां फिरते राए, ज़ांतगर तैस पीढ़रे लोक, मतलब ज़ैना जंग केरनेरे काबल लोक मिस्र मुल्खे मरां निसोरे थिये तैना नाश भोइ जे, किजोकि तैनेईं यहोवारो हुक्म न मन्नो; एल्हेरेलेइ यहोवाए कसम खेइतां ज़ोवरू थियूं, कि ज़ै मुल्ख मीं तुश्शे दादे पड़दादन सेइं कसम खेइतां तुसन देनेरे लेई ज़ोवरू थियूं, ज़ैस मां दुद्ध ते मैछ़ेरी गड्डां बेगतिन*5:6 दुद्ध ते मैछ़ेरी गड्डां बेगतिन बड़ी फलदार ज़मीन, तै मुल्ख अवं तुसन न हरेइलो। 7 त तैन लोकां केरां मट्ठां ज़ैना यहोवाए तैन केरे ठारी पैदा कियोरां थियां, तैन केरो खतनो यहोशू करां कराव, किजोकि वाधेरे मुल्खे मां गानेरे बत्तां च़लते तैन केरो खतनो न थियो भोवरो, तैना बगैर खतने थिये। 8 ते ज़ैखन तैस सैरी कौमरे मड़दां केरो खतनो भोइ जेव, फिरी तैना ठीक भोने तगर सारे इस्राएली एपनी-एपनी ठारी पुड़ डेरन मां राए। 9 तैखन यहोवाए यहोशू सेइं ज़ोवं, "तेरी ज़ै बदनामी मिस्री लोकन मां भोवरी थी तै अज़ मीं दूर कियोरीए।" एस्से वजाई सेइं तैस ठारारू नवं अज़ तगर गिलगाल*5:9 गिलगाल इब्रानी मां इसेरो मतलब हटानू आहे। पेवरूए।

10 एल्हेरेलेइ इस्राएली लोकेईं गिलगाले मां डेरे लग्गोरे रख्खे, ते तैनेईं यरीहोएरे मैइदाने मां च़ेवधोवं दिहाड़े ड्लोझ़रे मौके फ़सहेरू तिहार मनावं। 11 ते तैस्से महीनेरे च़ेवधोवं दिहाड़े तैस फ़सहरे तिहारेरे दूइयोवं दिहाड़े तैस मुल्खेरी पैदावारी मरां अखमीरी रोट्टी ते किछ भुज़ोरू अन्न तैस दिहाड़ेरां देंतू खानू शुरू कियूं। 12 ते तैस दिहाड़ेरां बाद तैना कनान मुल्खेरी पैदावारारू अन्न खाने लगे, तैस्से दिहाड़े झ़ेझ़ां अम्बरेरां मन्नो बखनो बन्द भोइ जेव; ते इस्राएली लोकन फिरी कधे मन्नो न मैल्हो, पन तैस साल तैना कनान मुल्खेरी पैदावार खाते राए।

इस्राएली लोक यरीहो नगरे पुड़ कब्ज़ो केरतन

13 ज़ैखन यहोशू यरीहो नगरेरे नेड़े थियो तैखन तैनी एपनी एछ़्छ़ी उच्‍ची केरतां तक्‍कू, त कुन लावं, कि अक मैन्हु नग्गी तलवार ट्लेइतां मेरे सामने खड़ो भोव; ते यहोशूए तैस कां नेड़े गेइतां पुछ़ू, "कुन तू इश्शे पासे आस, कि इश्शे दुश्मना केरे पासे आस?" 14 तैनी जुवाब दित्तो, "नईं अवं यहोवारी सेनारो प्रधान बेनतां हुन्ना एवरोईं।" तैखन यहोशूए तल्‍ले मां झुकतां मथ्थो टेको, ते तैस पुछ़ू, "अपने दासेरे लेई मेरे प्रभुएरो कुन हुक्मे?" 15 यहोवारे सेनारे प्रधाने यहोशूए सेइं ज़ोवं, "अपने पव्वां केरि जुट्टी खोल्‍ल, किजोकि ज़ैस ठारी पुड़ तू खड़ोस तै पवित्र ठारे।" तैखन यहोशूए तैन्ने कियूं।