एप्रैम ते पश्चिमी मनश्शे गोट्लेरो हिस्सो
1 फिरी यूसुफेरे खानदानेरो हिस्सो चिट्ठी छ़ेडतां रख्खो जेव, तैन केरो बन्नो यरीहो नगरेरे यरदन दरियाए करां, मतलब पूरबेरे पासे यरीहो नगरेरे पैनी करां शुरू भोइतां तैस पहाड़ी प्रदेशे मांमेइं भोइतां, ज़ै सुनसान ठैरी मांए, बेतेल नगरेरे पहाड़ी मुल्खे मां पुज़्ज़ो; 2 तैट्ठां तै लूज नगरे तगर पुज़्ज़ो, ते एरेकी लोकां केरि सरहद्दी करां भोइतां अतारोत नगरे मां पुज़्ज़ो; 3 ते पश्चिमेरे पासे यपलेती लोकां केरि सरहद्दी करां उतरतां फिरी बुनीयें बेथोरोनेरी सरहद्दी करां भोइतां गेजेर नगरे जो पुज़्ज़ो, ते भूमध्य-सागरे पुड़ निस्सो। 4 तैखन मनश्शे ते एप्रैम नंव्वेरे यूसुफेरे दूईये मट्ठां केरि औलादी अपनो-अपनो हिस्सो मैल्हो।
5 एप्रैमी लोकां केरि हद तैन केरे कुलां केरे मुताबिक ईए राई; तैन केरे हिस्सां केरि हद पूरबेरे पासेरां शुरू भोइतां अत्रोतदार नगरे मांमेइं भोइतां बेइयें बेथोरोन नगरे तगर पुज़्ज़ी; 6 ते उत्तरेरी हद पश्चिमेरे पासेरां मिकमतातेरां शुरू भोइतां पूरबेरे पासे फिरतां तानतशीलो कां पुज़्ज़ी, ते तैस करां भोइतां यानोह तगर पुज़्ज़ी; 7 फिरी यानोह नगरे करां भोइतां अतारोत नगर ते नारा नगरे करां उतरतां यरीहो नगरे करां भोइतां यरदन दरियाएरे पार निस्सी। 8 फिरी तैए हद तप्पूह करां निस्तां, ते पश्चिमेरे पासे निस्तां, काना दरियाए तगर भोइतां भूमध्य-सागरे पुड़ निस्सी। एप्रैमी लोकां केरो हिस्सो तैन केरे गोट्लां केरे कुलां केरे मुताबिक ईए राव। 9 ते मनश्शेई लोकां केरे हिस्सां केरे मझ़ाटे भी बड़ां नगरां अपने-अपने ड्लाव्वन समेत एप्रैमी लोकां केरे लेई अलग कियां जेआं। 10 पन ज़ैना कनानी गेजेर नगरे मां बस्सोरे थिये, तैना एप्रैमी लोकेईं तैट्ठां न कढे; एल्हेरेलेइ तैना कनानी तैन केरे मझ़ाटे अज़्ज़ेरे दिहाड़े तगर बस्सोरे राहोरेन, ते गुलैमी मां गुलामां केरे ज़ेरे कम केरतन।