यहोशू 17

मनश्शेरे गोट्लेरो हिस्सो

1 फिरी यूसुफेरे बड्डे मट्ठे मनश्शेरे गोट्लेरो हिस्सो चिट्ठी छ़डने सेइं ऐह मैल्हो। मनश्शेरू बड्डू मट्ठू माकीर ज़ै गिलादी केरो बाजी थियो, एस वजाई सेइं तैन केरे खानदाने गिलाद ते बाशान प्रदेश मैल्हे। 2 एल्हेरेलेइ ई हिस्सो होरे मनश्शेई लोकां केरे लेई तैन केरे कुलां केरे मुताबिक भोव, मतलब अबीएजेर, हेलेक, अस्रीएल, शेकेम, हेपेर, ते शमीदा; ज़ैना अपने-अपने कुलां केरे मुताबिक यूसुफेरे मट्ठे मनश्शेरे खानदानेरे मड़द थिये, तैन केरे लेई अलग-अलग खानदानां केरे लेई भोए। 3 पन हेपेर ज़ैन गिलादेरू मट्ठू, माकीरेरू पोट्लड़ू, ते मनश्शेरू पड़पोट्लड़ू थियूं, तैसेरे मट्ठे सलोफादेरां मट्ठां न थियां, सिर्फ पंच़ कुइयां थी; ते तैन केरां नंव्वां महला, नोवा, होग्ला, मिल्का, ते तिर्सा आन। 4 तैखन तैना कुइयां एलीआजर याजक, नूनेरे मट्ठे यहोशू, ते इस्राएली प्रधान्न कां गेइतां ज़ोने लेग्गी, यहोवाए मूसे हुक्म दित्तोरो थियो, कि तै असन इश्शे ढ्लां केरे दरमियाने मां हिस्सो दे। त यहोशूए तैन यहोवारे हुक्मेरे मुताबिक तैन केरे चाचां केरे दरमियाने मां हिस्सो दित्तो।✝17:4 गिन. 27:1-7. 5 तैखन मनश्शेई, यरदन दरियाएरे पार गिलाद मुल्खेरे बाशान प्रदेशेरे अलावा, दश हिस्से मैल्हे; 6 किजोकि मनश्शेई लोकां केरे मझ़ाटे मनश्शेरे गोट्लेरे कुइयन भी हिस्सो मैल्हो। ते होरे मनश्शेई लोकन गिलाद प्रदेश मैल्हो।

7 ते मनश्शेरी हद आशेरे करां लेइतां मिकमतात नगरे तगर पुज़्ज़ी, ज़ै शेकेम नगरेरे सामने; फिरी तै दक्षिणेरे पासे अग्रोवं घिसतां एनतप्पूहेरे रानेबालन तगर पुज़्ज़ी। 8 तप्पूहेरी ज़मीन त मनश्शे मैल्ही, पन तप्पूह नंव्वेरो पैनेरो नाग ज़ै मनश्शेरी सरहद्दी पुड़ बस्सोरोए तै एप्रैमी लोकां केरो भोव। 9 फिरी तैट्ठां तै हद कानारे दरियाए तगर उतरतां तैसेरे दक्षिणेरे पासे तगर पुज़्ज़ी जेई; इना नगर चाए मनश्शेरे नगरां केरे मझ़ाटे थिये, फिरी भी एप्रैमेरे भोए; ते मनश्शेरी हद तैस दरियाए करां उत्तरेरे पासे गेइतां भूमध्य-सागरे पुड़ निस्सी; 10 दक्षिणेरे पासेरो मुल्ख त एप्रैमे ते उत्तरेरे पासे मनश्शे मैल्हो, ते तैसेरी हद भूमध्य-सागर भोइ; ते तै उत्तरेरे पासे आशेर ते पूर्वेरे पासे इस्साकारे सेइं गेइतां मिली। 11 ते मनश्शे, इस्साकार ते आशेर अपने-अपने नगरन समेत बेतशान, यिबलाम, ते अपने नगरन समेत दोर ठारारे रानेबाले, ते अपने नगरन समेत एनदोरेरे रानेबाले, ते अपने नगरन समेत तानाकेरे रानेबाले, ते अपने नगरन समेत मगिद्दोएरे रानेबाले, इना ट्लाईए ज़ैना उच्‍चे ठारन पुड़ बस्सोरेन मैल्हे। 12 पन मनश्शेई लोक तैन नगरां केरे रानेबालन तैन मरां न केढी सके; एल्हेरेलेइ कनानी लोक तैस मुल्खे मां बस्सोरे राए। 13 फिरी बड़े सालां केरे बाद ज़ैखन इस्राएली लोक ताकतबर भोइ जे, तैखन कनानी लोकन करां ज़बरदस्ती कम कराने लगे, पन तैना पूरे तरीके सेइं न कढे।

14 यूसुफेरे खानदानेरे लोक यहोशू सेइं ज़ोने लगे, "असां त गिनती मां जादे अहम, किजोकि हुन्ना तगर यहोवा त असन बरकत देंतो राहोरोए, फिरी तीं असन चिट्ठी छ़ेडतां किजो अक्‍के हिस्सो दित्तोरोए?" 15 यहोशूए तैन सेइं ज़ोवं, "अगर तुस गिनती मां जादे त आथ, ते एप्रैमेरो पहाड़ी मुल्ख तुश्शे लेई निकड़ोए, त परिज्जी लोक ते रपाई लोकां केरो मुल्खे ज़ै सुनसान ठैरी मांए तैस मां गेइतां बुट कट्टा।" 16 तैखन यूसुफेरे लोकेईं ज़ोवं, "तै पहाड़ी मुल्ख इश्शे लेई निकड़ोए; ते बेतशान ते तैसेरे नगरन मां रानेबाले, ते यिज्रेलेरे वैदी मां रानेबाले, ज़ेत्रे कनानी लोक बुनीयें मुल्खे मां रहतन, तैन सेभन कां लोंहेरां रथां आन।" 17 फिरी यहोशूए, कुन एप्रैमी कुन मनश्शेई, मतलब यूसुफेरे सारे खानदाने सेइं ज़ोवं, "हाँ तुस लोक त गिनती मां बड़े जादे आथ, ते तुश्शी ताकत भी बड़ीए, एल्हेरेलेइ तुसन सिर्फ अक्‍के हिस्सो न मैल्हेलो; 18 पहाड़ी मुल्ख भी तुश्शो भोइ गालो; किजोकि तैन जंगल त आहे, पन तैसेरे बुट केट्टी छ़डा, तैखन तैसेरे आसे-पासेरो मुल्ख भी तुश्शो भोइ गालो; किजोकि चाहे कनानी लोक ताकतबर भोन, ते तैन कां लोंहेरां रथां भी भोन, फिरी भी तुस तैन तैट्ठां केढी सकेले।"