1 एक्‍की दिहाड़े यीशु गन्नेसरतेरे समुन्दरेरे* बन्ने पुड़ खेड़ोरो थियो, ते बड़े लोक तैस करां परमेशरेरू वचन शुन्नेरे लेई तै उन्ढे बिछ़ड़ी गाते थिये। 2 तैनी दूई किश्ती बन्ने लेगोरी लेही, ते मेछ़ली ट्लानेबाले किश्ती ड्लेखी छ़ेडतां अपना ज़ालां धोने लग्गोरो थिये। 3 यीशु एक्‍की किश्ती मां च़ढ़ो ते किश्तरे मालिके शमौने सेइं ज़ोने लगो, तुस किश्ती इट्ठां बन्ने पुड़ेरां नेइतां थोड़ी दूर लाथ। फिरी यीशु किश्ती मां बिशतां तैन लोकन उपदेश देने लगो। 4 ज़ैखन तैनी लोकन शिक्षा दित्ती त तै शमौने सेइं ज़ोने लगो, "तुस किश्ती डुग्घी ठैरी च़लाथ ते मेछ़ली ट्लानेरे लेई ज़ाल छ़डा।" 5 शमौने जुवाब दित्तो, "हे गुरू, असेईं सैरी राती तरले कियोरेन ते अक मछ़ली भी नईं ट्लेइयोरी, पन असां तेरे ज़ोने सेइं ज़ाल छ़डतम।" 6 आखर्कार पतरस ते तैसेरे सैथेईं ज़ालां छ़ेडी दित्तां ते एत्री मेछ़ली लेगि, कि ज़ालां छ़िन्दोइतां मेछ़ली बेइरोवं निस्सने लेगि। 7 तैखन तैनेईं अपने सैथन जो ज़ैना होरि किश्ती पुड़ थिये, इशारो कियो कि एज्जा इश्शी मद्दत केरा, ते तैना भी आए ते किश्ती मेछ़लेईं सेइं एत्री भेरोई जेई कि किश्ती डुबने लगी। 8 शमौन पतरस एन हेरतां यीशुएरे पव्वन पुड़ पेइतां ज़ोने लगे, "हे प्रभु, अवं पापी मैन्हु आईं तू मीं करां दूर भो!" 9 गल ऐह थी कि तै त तैसेरे साथी एत्री मेछ़ली लेइतां हैरान भोइ जेवरे थिये। 10 तेरहो हाल जेब्देरे मट्ठां केरो यानी याकूब त कने यूहन्नारो भी थियो, ज़ैना शमौने सेइं साथी थिये, यीशुए शमौने सेइं ज़ोवं, "डर नन्ना अज़्ज़ेरे बाद तू मेछ़ली ट्लाने बालो नईं, बल्के मैन्हन अकोट्ठे केरतां मेरे चेले बनानेबालो भोल्हो।" 11 तैनेईं किश्ती ड्लेखी एन्हतां लेई, ते अपनु सब किछ छ़ेडतां यीशु पत्ती च़ले जे।

12 ज़ैखन यीशु एक्‍की नगरे मां थियो, ते एरू भोवं कि तैड़ी अक मैन्हु थियो, ज़ेसेरे सैरी जानी कोढ़ थियूं, तैनी यीशु लाव, ते तै ज़ैन्धु केरे भारे बिशतां तैस कां मिन्नत केरतां ज़ोने लगो, "हे प्रभु तू चास त मेरू कोढ़ बज़्झ़ेई सकतस।" 13 यीशुए अपनो हथ तैस पुड़ रख्खो ते ज़ोवं, "अवं चाताईं, तू बेज़्झ़ोस।" ते तैखने तैसेरू कोढ़ साफ भोइ जेवं। 14 तैखन यीशुए तैस मैन्हु हुक्म दित्तो, "हेर, एसेरे बारे मां केन्ची सेइं किछ न ज़ोइयां। बल्के अपने आपे याजके हिरा। तैल्‍ला पत्ती, तू अपने बेज़्झ़ोनेरे वजाई सेइं च़ढ़तल च़ाढ़, ज़ेसेरे बारे मां मूसा नेबे कानूने मां हुक्म दित्तोरोए। ताके लोकन पतो च़ले कि तू बेज़्झ़ोरोस।" 15 पन यीशुएरे बारे मां सेब्भन पतो लगो ते लोक दूरेरां देंते एजने लगे ताके यीशुएरी गल्‍लां शुन्न कने अपनि बिमैरन करां बेज़्झ़ोन। 16 पन यीशु जादे केरतां सुनसान ठैरी च़लो गातो थियो, ते प्राथना केरतो रहतो थियो।

17 एक्‍की दिहैड़ी एरू भोवं कि यीशु शिक्षा देने लग्गोरो थियो, ते तैखन किछ फरीसी ते शास्त्री लोक ज़ोते थिये, तैना गलील इलाके ते यहूदियारे सैरी इलाकन मरां यरूशलेम नगरे मां एवरे थिये; ते परमेशरेरी शक्ति यीशु सेइं साथी थी, ते बिमार बेझ़ोइतां गाते थिये। 18 किछ मैन्हेईं अक अधरंगी मैन्हु खट्टी पुड़ छ़ुइतां आनोरोए थियो, ते तैना कोशिश लगे केरने कि एस अन्तर नेइतां यीशु कां पुज़ाम। 19 पन अन्तर एत्री तंगी थी कि तैना अन्तर न गेइ सके फिरी तैनेईं तैस घरेरी छत पुट्टी ज़ैस घरे मां यीशु थियो, ते खट्टां सने तै अधरंगी मैन्हु अन्तर यीशुएरे तुत्तरे अगर उसालो। 20 यीशुए तैन केरो विश्वास हेरतां ज़ोवं, "हे दोस्त तेरे पाप माफ़ भोए।" 21 शास्त्री ते फरीसी लोक सोचने लगे, "ऐह कौन मैन्हु आहे, ज़ै परमेशरेरी तुहीन केरते, परमेशरेरे अलावा कौन पाप माफ़ केरि सकते?" 22 यीशुए तैन केरि गल्‍लां बुझ़ी ते तैन जुवाब दित्तो, "तुस अपने-अपने मने मां एन्च़रां किजो सोचने लग्गोरेथ? 23 कुन ज़ोनू सुखतुए, ‘तेरे पाप माफ़ भोए,’ या एन ज़ोनू ‘उठ, ते च़ल फिर?’ 24 पन तुसन पतो लग्गे, मैन्हेरे मट्ठे ज़मीनी पुड़ पाप माफ़ केरनेरो अधिकारे," फिरी यीशुए तैस बिमारे जो ज़ोवं, "अपनि खट सल्‍ल ते घरजो च़लो गा।" 25 तै अधरंगी बिमार मैन्हु सेब्भी केरे सामने ते खड़े उठो ते ज़ैस खट्टी पुड़ तै झ़ुलतो थियो, अपने दोग्गे पुड़ छ़ुइतां परमेशरेरी बडीयाई केरतो-केरतो घरजो च़लो जेव। 26 तैना सारे लोक हैरान राए ते परमेशरेरी तारीफ़ केरने लगे ते कने ज़ोने लगे, "ऐह त असेईं अज़ नव्वीं गल लाई।"

27 एना गल्‍लां बीतनेरां बाद यीशु तैट्ठां निस्सो, ते एक्‍की चुंगी घिन्ने बाले कां च़लो जेव, तैसेरू नवं लेवी थियूं। ते तै चुंगी नेनेबाले दफ़तरे मां बिशोरो लाव, ते यीशुए तैस जो ज़ोवं, "तू मीं पत्ती च़ल ते मेरो चेलो बन।" 28 तै तैखने यीशु पत्ती च़लो जेव। 29 ते फिरी लेवी मैन्हे यीशुएरे लेई अपने घरे अक बड़ी धाम दित्ती। ते तैड़ी चुंगी नेनेबाले ते होरे भी बड़े लोक थिये ज़ैना तैस सेइं साथी रोट्टी खाने बिश्शे। 30 फरीसी लोक ते शास्त्री यीशुएरे चेलन सेइं ज़ोने लग्गे, "तुस चुंगी नेनेबालन ते पापी लोकन सेइं साथी किजो खातथ पीतथ?" 31 यीशुए तैन सेइं ज़ोवं, "बिमारन डाक्टरेरी ज़रूरत भोचे, न कि सझ़र लोकन। 32 अवं धर्मी लोकन नईं, पन पापी लोकन कुजाने एवरोईं कि, तैना अपने पापन करां मन फिरान।"

33 तैना लोक यीशु सेइं ज़ोने लगे, "यूहन्नारे चेले त बरत रखतन ते प्राथना भी केरतन ते एन्च़रे फरीसी लोक भी केरतन, पन तेरे चेले त खातन पीतन?" 34 यीशुए तैन्न जुवाब दित्तो, "ड्लाहेरे दिहाड़े, कुन लाड़ो साथी भोंते सांते जन बरत रेखी सकतथ? 35 पन तैना दिहाड़े एज्जेले, ज़ैखन लाड़ो तैन करां अलग कियो गालो (यानी मारो गालो)। तैन दिहैड़न मां तैना (अपने दुखेरे वजाई सेइं) बरत रख्खेले।" 36 फिरी यीशु तैन अक होरि मिसाल दित्ती, "पुराने लिगड़े पुड़ नंव्वे लिगड़ेरी टलोई कोई न लाए, नईं त तै टलोई तैस मरां होरू भी छ़िंदेली, ते कने पुराने सेइं तै मिले भी नन्ना। 37 नंव्वो दाछ़रो रस पुरैनी मसकी मां कोई न छ़ड्डे, नन्ना त नंव्वे दाछ़रो रस सेइं मसक भी फैट्टी गाचे, ते दाछ़रो रस भी डुल्‍ली गाते, ते तै मसक भी बरबाद भोचे। 38 किजोकि नंव्वो दाछ़रो रस नव्वीं मसकन मां भरोरो लोड़ते। 39 कोई मैन्हु पुरानो दाछ़रो रस पीतां नव्वों न पीनो चाए, किजोकि तै ज़ोते कि पुरानो दाछ़रो रस जादे रोड़ोए।"