1 ज़ैखन यीशुए अपने 12 चेलन हुक्म दित्तो, त तै तैट्ठां च़लो जेव, ताके चेलां केरे नगरन मां गेइतां शिक्षा दे ते प्रचार केरे।

2 यूहन्ना नेबे कैदखाने मां मसीहेरे कम्मां केरे बारे मां शुन्तां तैस कां अपने चेले इन पुछ़ने भेज़े। 3 तैनी तैन सेइं ज़ोवं, "एजनेबालो मसीह तू आस, ज़ेसेरे बारे मां परमेशरे वाधो कियोरोए, या आस केन्ची होरि बलगम?" 4 यीशुए तैन जुवाब दित्तो, "ज़ैन किछ तुस शुन्तन ते लहतथ तैन गेइतां यूहन्ना सेइं ज़ोथ। 5 कि काने लहतन, ते टोन्टे च़लतन, ते कोढ़ी केरू कोढ़ शुद्ध भोते, ते टोंऊने शुन्तन, ते मुड़दे ज़ींते भोतन, ते गरीबन खुशखबरी शुनाई गातीए 6 परमेशर तैस बरकत देते, ज़ै मीं पुड़ शक न केरे।"

7 ज़ैखन यूहन्नारे चेले तैट्ठां च़ले जे, त यीशु लोकन सेइं यूहन्नारे बारे मां ज़ोने लगो, "तुस सुनसान ठैरी कुन हेरने जेवरे थिये? कुन हवाई सेइं हिलते निरैठरे डाले? 8 त फिरी होरू कुन हेरने जोरे थिये? माघां लिगड़ां लेइतां कोई? हेरा ज़ैन माघां लिगड़ां लेइतां भोतन तैना राज़ मेहलन मां रातन। 9 फिरी तुस कुन हेरने जेवरे थिये? कुन कोई नेबी? हाँ पन अवं तुसन सेइं ज़ोताईं कि नेबी करां भी बड्डे हेरने जेवरे थिये। 10 ई तैए यूहन्ना आए ज़ेसेरे बारे मां परमेशर पवित्रशास्त्रे मां ज़ोते,

कि हेरा, ‘अवं अपने बिस्तार देनेबालो तीं अग्री भेज़ताईं,

ज़ै तेरे लेई बत तियार केरेलो।’"

11 अवं तुसन सेइं सच़ ज़ोताईं, कि ज़ै कुआन्शन करां ज़र्मोरोए तैन मां यूहन्ना बपतिस्मो देनेबाले करां कोई बड्डो नईं भोवरो, पन ज़ै सुर्गेरे राज़्ज़े मां निकड़े करां निकड़ोए तै तैस करां भी बड्डोए। 12 यूहन्ना बपतिस्मो देनेबालेरे दिहाड़न करां अज़ तगर प्रचार भोइ राहोरोए, ते सुर्गेरू राज़ जल्दी बधने लगोरूए, पन बड़े निग्गर लोक तैस पुड़ हमलो केरतन। 13 सारे नेबी केरे लेख, ते मूसेरो कानून यूहन्ना तगर भविष्यिवाणी केरते राए। 14 अगर तुस चाथ ते मन्नथ, एलिय्याह ज़ेसेरे बारे मां नेबेईं ज़ोवरू थियूं, कि तै एजनेबालो थियो तै ईए। 15 ज़ै कोई समझ़नू चाते, तै ध्याने सेइं शुने ते समझ़े। 16 "अवं इस ज़मानेरे लोकां केरि मिसाल केस सेइं देईं, इना तैन मट्ठां केरे ज़ेरेन ज़ैना बज़ारन मां बिशतां अपने दोस्तन सेइं शिकायत केरतन, 17 कि असेईं तुश्शे लेई बाज़ो बज़ाव, ते तुस न नच़्च़े, ते असेईं शोग कियो ते तुसेईं छाती न पिट्टी। 18 किजोकि यूहन्ना बपतिस्मो देनेबालो* जादे तर बरत रखतो थियो, ते शराब न थियो पीतो, ते तैना तैस जो ज़ोतन कि एस पुड़ भूतेरो सैयो आए। 19 ते मैन्हेरू मट्ठू यानी अवं खातो पीतो अव, हेरा, ते तैना ज़ोतन पेटू ते शराबी मैन्हु ते चुंगी नेनेबाले ते पापी लोकां केरो दोस्त, पन अक्लमन्द कौने तैसेरे कम्मेईं सेइं पतो च़लते।"

20 तैखन यीशु फिरी तैन नगरन मां गेइतां तैट्ठेरे लोकन झ़िड़कतां ज़ोने लगो, ज़ैन मां तैनी चमत्कार कियोरे थी, पन तैनेईं अपने पापन करां मन न फिराव। 21 "हे खुराजीन नगरेरे लोकव! तुसन पुड़ अफ़सोस, हे बैतसैदा नगरेरे लोकव तुसन पुड़ अफ़सोस, कि ज़ैना चमत्कार तुसन मां किये, अगर एना चमत्कार सूर ते सैदा नगरन मां कियोरे भोथे, त तैन लोकेईं केइसेरे देंतेरी टाट पलेटतां ते मांज़नी मां बिशतां* अपने पापन करां मन फिरावरो भोथो। 22 पन अवं तुसन सेइं ज़ोताईं, कि न्यायेरे दिहाड़े परमेशर, ज़ै सज़ा सूर ते सैदा नगरां केरे लोकन देलो, तुश्शी सज़ा तैस करां भी जादे भोल्ही। 23 ते हे कफरनहूम नगरेरे लोकव, कुन तुस सोचतथ कि सुर्गे मां तुश्शी आदर भोनीए! नईं तुस त नरके गाले ज़ैड़ी पापी लोकन सज़ा मैल्हेली! किजोकि ज़ैना चमत्कार तुसन मां किये, अगर मीं एना सदोम नगरे मां कियोरे भोथे त सदोम नगर अज़ तगर भी भोनू थियूं। 24 पन अवं तुसन ज़ोतां कि न्यायेरे दिहाड़े परमेशर ज़ै सज़ा सदोम नगरेरे लोकन देलो, तुश्शी सज़ा तैस करां भी जादे भोल्ही।"

25 तैखन यीशुए ज़ोवं, "हे बाजी, सुर्ग ते धेरतरे प्रभु, अवं तेरू शुक्र केरतां कि तीं एना गल्‍लां अक्लमन्द ते समझ़दार लोकन करां छ़ुपेइतां रेखी ते तैन लोकन पुड़ बैंदी की, ज़ैना निक्‍के बच्‍चां केरे ज़ेरे आन। 26 हाँ, हे बाजी तीं एन्ने रोड़ू लग्गू।

27 "मेरे बाजेईं सब किछ मेरे सुपुर्द कियोरूए; कोई होरो मट्ठे* न ज़ांने, सिर्फ बाजी ज़ानते; कोई बाजी* न ज़ांने सिर्फ मट्ठू ज़ानते, या तै मैन्हु बाजी ज़ानते ज़ैस पुड़ मट्ठू बांदो केरने चाए।

28 "हे मेहनत केरनेबाले* लोकव, ते भारे सेइं थकोरे लोकव मीं कां एज्जा; अवं तुसन आराम देइलो। 29 मेरे अधीन एन्च़रे भोथ ज़ेन्च़रे दांत जूंए हैठ भोते, ते ज़ैन किछ अवं तुसन शिखालताईं तैस शिख्खा, किजोकि अवं हलीम आईं ते दिलेरो नम्र आईं ते तुश्शी जानी आराम मैल्हेलो। 30 ज़ै भार अवं तुसन देइलो तै पोल्‍लोए, तुस तैस आरामे सेइं छ़ुई सकतथ।"