1 हे बिन्यामीन गोट्लेरे लोकव, यरूशलेम नगरे मरां अपनु-अपनु सामान नेइतां नश्शा! तकोआ नगरे मां जंगरे लेई नरशिंगो बज़ाथ, ते बेथक्‍केरेम नगरे मां खतरेरो झण्डो लाथ; किजोकि उत्तरेरे पासेरां एजनेबाली मुसीबत बड़ी ते नाश केरने बालीए। 2 सिय्योन* नगरेरी खूबसूरत ते रोड़ी कुइये अवं नाश केरनेबालो आईं। 3 पुहाल अपना-अपना गब्बां साथी नेइतां तैसेरे च़ेवरे पासन अपने तेम्बु खड़े केरेले, तैना सेभी ठैरन घास च़ारेले। 4 तैना ज़ोले, "यरूशलेमेरे खलाफ हमलो केरनेरे लेई तियार भोथ; उठा तियार भोथ, असां दुपहरेईं हमलो केरम!" पन तैखन तैना ज़ोले, "ओहो, दिहाड़ी डुब्बी जेई, ते ड्लवझ़री छाव लम्मी भोइ जेई!" 5 "उठा, असां रातो-रात चढ़ाई केरम ते तैसेरे मेहलन बिछ़ोड़म।"

6 किजोकि सेना केरो यहोवा तुसन सेइं ज़ोते, "बुट केट्टी-केट्टी यरूशलेमेरे खलाफ मोरच़ो बन्धा! इन तैन नगरे ज़ैन सज़ारे काबले; एसमां ज़ुलमे-ज़ुलमे। 7 ज़ेन्च़रे खुहे मरां हमेशा पानी निसते, तेन्च़रे एस नगरे मरां हमेशा नंव्वी बुराई निसतीए; एसमां तुबाही ते ज़ुलमेरे आवाज़ शुनोतीए; ज़खम ते मारपीट अवं लगातार हमेशा हेरताईं। 8 हे यरूशलेम ई खबरदारी शुन, वरना अवं तीं करां तंग भोइतां अपनु तुत्तर फिरेइलो; ते अवं तीं उज़ैड़तां बेरान केरेलो।"

9 सेना केरो यहोवा एन ज़ोते, "इस्राएलेरे बच़ोरे सब लोक दाछ़रे बागां केरे ज़ेरे तोपतां ट्लोड़े गाले; दाछ़रे ट्लोड़ने बालेरे ज़ेरे तैस दाछ़ी सेइं अपनो हथ ला।"

10 यिर्मयाह जुवाब दित्तो, अवं केस सेइं ज़ोईं ते कैस खबरदार केरतां ज़ोईं कि तैना मन्न? हेरा, इना लोक उच्‍चु शुन्तन, तैना ध्यान भी न देईं सखन; हेरा, यहोवारे वचनेरी तैना निन्दा केरतन ते तैस पसंद न केरन।✝ 11 एल्हेरेलेइ यहोवारो क्रोध मेरे मने मां भेरोई जेवरोए; अवं तैस रोकते-रोकते थेकी जेवरोईं। तैखन यहोवा मीं सेइं ज़ोवं, "बज़ारन मां बच्‍चन पुड़ ते जुवाना केरि सभाई मां भी तैस उलटा; किजोकि मुन्श एपनी कौन्शी सेइं ते बुढे सेइं साथी मेरे क्रोधे सेइं भस्म भोल्हो। 12 तैन लोकां केरां घरां ते ऊडारां ते कौन्शां सब होरि केरि भोइ गैली; किजोकि अवं इस मुल्खेरे लोकन सज़ाह देइलो," यहोवा एन ज़ोते। 13 "किजोकि तैन मां निकड़े करां लेइतां बड़े तगर सब लालच़ी आन; इड़ी तगर कि नबी ते याजक भी लोकन सेइं धोखो केरतन। 14 तैना मेरे लोकन सेइं ज़ोतन, ‘शान्ति आहे शान्ति,’ एन्च़रे केरतां तैना लोकां केरे ज़खमन बांमेइं ठीक केरतन, पन शान्ति कोन्च भी नईं।✝ 15 कुन तैन्न कधे अपने बुरे कम्मां केरे वजाई सेइं शर्म अई? नईं, तैन कोई शर्म न आई; तैना शरमिन्दा भोनू भी न ज़ानन; एल्हेरेलेइ ज़ेन्च़रे होरे लोक बिछ़ड़े तेन्च़रे तैना भी बिछ़ड़ेले, ते ज़ैखन अवं तैन सज़ाह देइलो, तैखन तैना ठोकर खेइतां बिछ़ड़ेले," यहोवा एन ज़ोते।

16 यहोवा एन भी ज़ोते, "सड़कन पुड़ खड़े भोइतां तक्‍का, ते पुछ़ा कि पुराने ज़मानेरी रोड़ी बत कौ आहे, तैस्से मां च़ला, ते तुसन अपने-अपने मने मां चैन मैल्हेलो। पन तैनेईं ज़ोवं, ‘असां तैस पुड़ न च़लमेले।’✝ 17 मीं तुश्शे लेई पहरदार बिशैलतां ज़ोवं, ‘नरशिंगेरी आवाज़ ध्याने सेइं शुना!’ पन तैनेईं जुवाब दित्तो, ‘असेईं नईं शुन्नी।’ 18 एल्हेरेलेइ, हे कौमव, शुना, ते हे मेण्डली, हेर एन लोकन मां कुन भोइ राहोरूए। 19 हे धेरतरे लोकव शुना; हेरा अवं एस कौमी पुड़ कुन मुसीबत आनेलो ज़ै तैन केरे खियालां केरो फले, किजोकि तैनेईं मेरे वचन्न पुड़ ध्यान नईं लेवरू, ते मेरी शिक्षा एनेईं निकम्मी समझ़ी। 20 मेरे लेई ज़ैन लोबान शेबा प्रदेशे मरां ते खुशबूदार निराठी ज़ै दूर मुल्खेरां आनी गातीए, एसेरो कुन मतलबे? तुश्शे होमबेलि सेइं अवं खुश नईं, ते न तुश्शी मेलबलि मीं पसंद एइतिन।

21 "एल्हेरेलेइ यहोवा एन ज़ोवरूए, ‘हेरा, अवं इन लोकां केरे सामने ठोकर रखेलो, ते बाजी ते मट्ठू, पड़ोसी ते दोस्त, सब ठोकर खेइतां नाश भोल्हे।’"

22 यहोवा एन ज़ोते, "हेरा, उत्तरेरे पासेरां बल्के धेरतरे कूने करां एक्‍की बड्डे कौमरे लोक एस मुल्खेरे खलाफ खड़े किये गाले। 23 तैना धनुष ते भालो घिन्तां एज्जेले, तैना ज़ालम ते बेरहम आन, ते ज़ैखन तैना गल केरतन तैखन ज़ेन्च़रे समुन्दर गरज़ते। तैना घोड़न पुड़ च़ेढ़तां एज्जेले, हे सिय्योन, तैना जंग लड़ने बालां केरे ज़ेरे हथियार बन्द भोइतां तीं पुड़ हमलो केरेले।" 24 इसेरी खबर शुनते इश्शे हथ ढिल्‍ले भोइ जे; असां दुखे मां पे; दोज़ींती कौन्शरी ज़ेरि तकलीफ असन भोइ। 25 उडारे मां न गाथ, बत्तां भी न च़ला; किजोकि तैड़ी दुश्मना केरि तलवार ते च़ेवरे पासन डर लेइहोते। 26 हे मेरे लोकव, दुख बांदो केरनेरे लेई अपने कमरी मां टाट बन्धा, ते मांज़नी मां बिश्शा; ज़ेरो एकलौते मट्ठेरे लेई मातम भोते तेन्च़रे बड़े दुखे मां मातम केरा; किजोकि नाश केरनेबालो दुश्मन असन पुड़ अचानक पेलो।

27 यहोवा मीं सेइं ज़ोवं, "मीं एल्हेरेलेइ तू अपने लोकां केरे दरमियान गुम्मट ते क़िलो ठहराव कि तू तैन केरि चाल परखस ते ज़ानस। 28 तैना सब बड़े ज़िद्दी आन, तैना बदनाम केरते फिरतन; तैन सेभी केरि चाल बिगड़ोरीए, तैना तांबे ते लोंहेरे ज़ेरे सखत आन। 29 भट्ठी बड़ी भखोरीए, सीसा अग्गी मां फुकोई जेव; ढालने बालेईं फुज़ूले मां ढालू; किजोकि बुरे लोक न कढे जे। 30 तैन केरू नवं खोट्टी चाँदी पेलू, किजोकि यहोवा तैना खोट्टे मैल्होरेन।"