Mateus 16

फरीसी ते सदूकी लोकां केरे शिक्षारू खमीर

5 ते यीशुएरे चेले समुन्दरे पार पुज़ी जे, पन तैनेईं रोट्टी साथी नेनी बिसरोरी थी। 6 यीशुए तैन सेइं ज़ोवं, "खबरदार फरीसी ते कने सदूकी लोकां केरे खमीरे करां हुशार रेइयथ।" 7 तैना एप्पू मांमेइं गलबात केरने लग्गे, "असेईं रोट्टी नईं आनोरी, एल्हेरेलेइ तै एरू ज़ोने लेवरोए।" 8 एन ज़ैनतां, यीशुए ज़ोवं, "हे घट विश्वैसव, तुस एप्पू मांमेइं किजो सोची राओरेथ, कि असन कां रोट्टी नईं? 9 कुन तुसन याद नईं? ज़ताली मीं 5000 मैन्हु केरे लेई पंच़ रोट्टी ट्लोड़तां दित्तोरी थी, त तुसेईं बादे मां बच़्च़ोरी रोट्टी केरे केत्रे टोकरे भेरतां सल्‍लोरे थिये? 10 ते तैन 4000 मैन्हु केरे लेई सत रोट्टी ते टुक्डां केरि केत्री टोकरी सल्‍लोरी थी? 11 तुस की न समझ़थ, कि मीं तुसन रोट्टी केरे लेई न थियूं ज़ोवरू? पन फरीसी ते कने सदूकी लोकां केरे खमीरे करां हुशार रेइयथ।" 12 तैखन तैन केरि समझ़ी मां अव, कि तैनी रोट्टी केरे लेई नईं, बल्के फरीसी ते कने सदूकी लोकां केरे खमीर यानी शिक्षाई करां हुशार रानेरे लेई ज़ोवरू थियूं।