Neemias 9

पापेरो इकरार केरनो

1 फिरी तैस्से महीनेरे च़ौबियोवं दिहाड़े इस्राएली लोक बरत रेखतां ते दुख बांदो केरनेरे लेई टाट लेइतां ते दोग्गे पुड़ धूड़ छ़ेडतां अकोट्ठे भोए। 2 तैखन इस्राएली लोक सारे गैर कौमां केरे लोकन करां अलग भोइ जे, ते खड़े भोइतां, अपने-अपने पापां केरो ते अपने पूर्वजां केरे अधर्मेरे कम्मां केरो इकरार कियो 3 तैखन लेवी एपनी-एपनी ठारी पुड़ खड़े भोइतां दीसरे एक्‍की पहरे*9:3 एक्‍की पहरे अक पहर ट्लाई घैन्टां केरो भोतो थियो। तगर अपने परमेशर यहोवारे कानूनेरी किताब पढ़ते, ते एक्‍की होरी पहरे तगर अपने पाप मन्ते राए, ते अपने परमेशर यहोवारी आराधना केरते राए। 4 ते येशुअ, बानी, कदमीएल, शबन्याह, बुन्नी, शेरेब्याह, बानी ते कनानी लेवी लोकेईं पेवड़न पुड़ खड़े भोइतां बेड़ी उच्‍ची आवाज़ी सेइं अपने परमेशर यहोवा कां प्राथना की। 5 फिरी येशुअ, कदमीएल, बानी, हशब्नयाह, शेरेब्याह, होदिय्याह, शबन्याह ते पतह्याह नंव्वेरे लेवेईं लोकन सेइं ज़ोवं, "खड़े भोथ, अपने परमेशर यहोवारी तारीफ़ अनादिकाले करां लेइतां हमेशा तगर केरा। तेरी महान नंव्वेरी तारीफ़ भोए, ज़ैन सेभी शुक्र ते सारे तारीफ़री करां भी उच्‍चु आहे।"

पाप मन्नेरे लेई प्राथना

6 "तूए सिर्फ अक यहोवा आस। सुर्गे बल्के सेभन करां उच्‍चे सुर्गे ते तैसेरे सब गण, ते धरती ते ज़ैन किछ तैस मांए, ते समुन्दर ते ज़ैन किछ तैस मांए, सब किछ तींए बनेवरूए, ते सेभी केरि रक्षा तूए केरतस। ते सुर्गेरी सारी सेना तींए कां झुकतीए।✝9:6 निर्ग. 20:11;व्यव. 6:4. 7 हे यहोवा! तूए परमेशरस, ज़ैनी अब्राम च़ुनतां कसदी लोकां केरे ऊर नगरे मरां केढतां आनो, ते तैसेरू नवं अब्राहम रख्खू। 8 ते तैसेरो मन एप्पु सेइं सच़्च़ो लेहितां, तैस सेइं करार कियो, कि अवं तेरे खानदाने कनानी, हित्ती, एमोरी, परिज्जी, यबूसी ते गिर्गाशी लोकां केरो मुल्ख देइलो। ते तीं अपनो तै वाधो पूरो भी कियो, किजोकि तू धर्मी आस।

9 "फिरी तीं मिस्र मुल्खे मां इश्शे पूर्वजां केरो दुख लेहितां नज़र दित्ती। ते लाल समुन्दरेरे बन्ने पुड़ तीं तैन केरि फरियाद शुनी। 10 ते फ़िरौने ते तैसेरी सारी सेना बल्के तैस मुल्खेरे सारे लोकन सज़ाह देनेरे लेई निशान ते चमत्कार हिराए। किजोकि तू ज़ानतो थियो, कि मिस्री तैन सेइं केरो सलूख केरते थिये, ते तीं अपनु एरू बड्डू नवं कियूं, ज़ेन्च़रे अज़ तगरे। 11 ते तीं तैन केरे सामने समुन्दरेरे दूई हिस्से किये, कि तैना समुन्दरेरे मझ़मेइं तल्‍ले मांमेइं च़ेलतां पार च़ले जे। ते ज़ैना तैन पत्ती लग्गोरे थिये, तैना तीं डुग्घी ठैरी एरे डोबे, ज़ेन्च़रे घोड़ समुन्दरे मां छ़डोरो भोए। 12 फिरी तीं दीसां बिदलारारे खम्भे मरां ते राती अग्गरे खम्भे मरां तैन केरि अगवाई की, कि ज़ैस बत्तां तैनेईं च़लतू थियूं, तैस मां तैन लौ मैल्हे। 13 फिरी तीं सीनै पहाड़े पुड़ उतरतां अम्बरे मरां तैन सेइं गल्‍लां की, ते तीं सिद्धे नियम, सच़्च़ो कानून, ते रोड़ी विधि ते हुक्म दित्ते। 14 तैन्न अपने पवित्र आरामेरे दिहैड़रू ज्ञान दित्तू, ते अपने दास मूसेरे ज़िरिये हुक्म ते विधि ते कानून दित्तो। 15 ते तैन केरि ढ्लुख मिटानेरे लेई अम्बरे मरां रोट्टी दित्ती ते तैन केरि ट्लिश मिटानेरे लेई चट्टानी मरां पानी कढू, ते हुक्म दित्तो कि ज़ै मुल्ख तुसन देनेरी मीं कसम खेवरीए तैसेरे अधिकारी भोनेरे लेई तुसां तैस मुल्खे मां गाथ।✝9:15 यूह. 6:31.

16 "पन इश्शे दादे-पड़दादेईं घमण्ड कियूं, ते ज़िद्दी बने ते तेरे हुक्म न मन्ने। 17 ते हुक्म मन्ने करां इन्कार कियो, ते ज़ैना चमत्कार तीं तैन केरे सामने कियोरे थिये, तैना याद न किये बल्के ज़िद्दी बेनतां एड़ी तगर बगावत केरनेबाले बने, कि अक प्रधान च़ुनो, ते वापस तैस गुलैमी मां च़ले गान। पन तू माफ़ केरनेबालो अनुग्रह केरनेबालो ते दया केरनेबालो, क्रोध केरने मां च़िर लानेबालो, ते बड़ो महरबान परमेशर आस, तीं तैना न शारे। 18 बल्के ज़ैखन तैनेईं बछ़ड़ू बनेइतां ज़ोवं, ‘तुश्शो परमेशर ज़ैनी तुसां मिस्र मुल्खे मरां केढतां आनोरेथ, तै ईए,’ ते तेरी बड़ी अनादर की।✝9:18 निर्ग. 32:1-8. 19 तैखन भी तू ज़ै बड़ो महरबानस, तैना सुनसान ठैरी मां न शारे। न त दीसां तैन केरि अगवाई केरनेबालो बिदलारारो खम्भो तैन पुड़ेरां दूर कियो, ते न राती लौ देनेबालो अग्गरो खम्भो बत हिरानेबालो तैन पुड़ेरां दूर कियो। 20 बल्के तीं तैन समझ़ देनेरे लेई अपनो आत्मा तैन दित्तो ज़ै भलोए, ते अपनो मन्नो तैन खुवानो न शारो, ते तैन केरि ट्लिश मिटानेरे लेई पानी देंतो राव। 21 40 सालन तगर तू तैन केरि सुनसान ठैरी मां एरी हेरगेश केरतो राव, कि तैन कोई कमी न भोइ। न त तैन केरां लिगड़ां पुरानां भोआं ते न तैन केरे पव शोजे। 22 फिरी तीं रियासतां-रियासतां ते मुल्खे-मुल्खेरे लोक तैन केरे बस्से मां केरि दित्ते, तैना तैन केरे हिस्सां केरे मुताबिक बन्टे। ते तैना हेशबोनेरे राज़े सीहोने ते बाशानेरे राज़े ओगे दूईयां केरे मुल्खां केरे मालिक भोए। 23 फिरी तीं तैन केरि औलाद अम्बरेरे तारां केरि ज़ेरि बधेइतां तैना तैस मुल्खे मां पुज़ाए, ज़ेसेरे बारे मां तीं तैन केरे पूर्वजन सेइं वाधो कियोरो थियो। कि तैना तैस मां गेइतां तैसेरे मालिक भोइ गान। 24 ते तैना गेइतां तैस मुल्खेरे मालिक भोइ जेई, ते तीं तैन केरे ज़िरिये तैस मुल्खेरे रानेबाले कनानी लोक दबाए, ते राज़न ते मुल्खां केरे लोकन समेत, तैन केरे कब्ज़े मां कियो, कि तैना तैस सेइं ज़ैन चान तैन केरन। 25 तैनेईं क़िले बाले नगर ते फसल देनेबाली ज़मीन नेइ, ते हर किसमेरी रोड़ी चीज़ेइं सेइं भरोरां घरां, ते घड़ोरां खुहां ते दाछ़री ते ज़ैतूनेरी बागां, ते खानेरे फले बाले बुट्टां केरे मालिक भोइ जे। तैना तैन खेइतां रेज़्ज़ी जे, ते हट्टे कट्टे भोइ जे, ते तेरी भलैइयरे वजाई सेइं सुख भोगते राए।

26 "पन तैना तीं करां दूर भोइतां तीं सेइं बगावत केरनेबाले बेनि जे, ते तेरो कानून शारो, ते तेरे नबी तेरी तरफां ज़ैना तैन फिरनेरे लेई तैन ज़ोंते राए तैना मारे, ते तेरी बड़ी निन्दा की। 27 एस्से वजाई सेइं तीं तैना तैन केरे दुश्मना केरे हथ्थे मां किये, ते तैनेईं तैना बेड़ी मुसीबती मां छ़डे। फिर भी तैना ज़ैखन-ज़ैखन मुसीबती मां पेइतां तीं कां फरियाद केरते राए तैखन-तैखन तू सुर्गे मरां तैन केरि फरियाद शुनतो राव। ते तू ज़ै बड़ो महरबानस, एल्हेरेलेइ तैन केरे छुटानेबाले भेज़तो राव ज़ैना तैन केरे दुश्मना केरे हथ्थेरां छुटाते थिये। 28 पन ज़ैखन-ज़ैखन तैन आराम मैल्हो, तैखन-तैखन तैना फिरी तेरे सामने बुराई केरते थिये, एल्हेरेलेइ तू तैन केरे दुश्मना केरे हथ्थे मां केरतो थियो, ते तैना तैन पुड़ राज़ केरते थिये। पन फिरी ज़ैखन तैना तीं कां फरियाद केरते थिये, तैखन तू सुर्गे मरां तैन केरि फरियाद शुनतो थियो, तू ज़ै बड़ो महरबानस एल्हेरेलेइ तू तैन बार-बार छुटातो राव। 29 ते तैन खबरदार केरतो थियो कि तैन फिरी अपने कानूनेरे अधीन केरस। पन तैना घमण्ड केरते राए ते तेरो हुक्म न थिये मन्ते, ते तेरे नियम ज़ैन अगर मैन्हु मन्न, त तैन केरि वजाई सेइं तैना ज़ींते रान, तैन केरे खलाफ पाप केरते थिये, ते ज़िद्दी भोइतां शुन्ने करां इन्कार केरते थिये। 30 तू त बड़े सालन तगर तैन केरि बरदाशत केरतो राव, ते अपने आत्माई सेइं नेबी केरे ज़िरिये तैन खबरदार केरतो राव, पन तैना कन न थिये लाते, एल्हेरेलेइ तीं तैना मुल्खे-मुल्खेरे लोकां केरे हथ्थे मां किये। 31 फिर भी तीं ज़ै बड़ो महरबानस, तैन केरो नाश न कियो ते न तैना शारे, किजोकि तू बड़ो महरबान ते दया केरनेबालो परमेशरस।

32 "हुनी त हे इश्शे परमेशर! तू ज़ै महान शक्तिशाली ते डरेरे काबल परमेशर! तू ज़ै अपनो करार कायम रखतस ते दया केरतस, ज़ै बड़ो दुख अश्शूरेरे राज़ां केरे दिहाड़न करां लेइतां अज़्ज़ेरी दिहैड़ी तगर इश्शे राज़े, हाकिम, याजक, नेबन, बुज़ुर्गन बल्के सारे लोकन झ़ैलनो पेव, तेरी नज़री मां थोड़ो न भोए। 33 तांभी ज़ैन किछ असन पुड़ बीतेरूए तैसेरे बारे मां तू धर्मीस। तीं त सच़्च़ैई सेइं कम कियोरूए पन असेईं बुराई कियोरीए। 34 ते इश्शे राज़ेईं, ते हाकिमेईं, याजकेईं ते दादे-पड़दादेईं न त तेरो कानून मन्नो न तेरे हुक्मन ते हदायतन पुड़ ध्यान दित्तू, ज़ैन सेइं तीं तैना खबरदार कियोरे थिये। 35 तैनेईं अपने रियासती मां, ते तैस बड़े भलैइयरे मौके तीं तैन दित्तोरू थियूं, ते इस खुल्‍ले डुल्‍ले ते फलदार मुल्खे मां तेरी सेवा न की। ते न अपने बुरे कम्मन करां पशतावं। 36 हेरा, अस इस वक्त गुलाम अहम। ज़ै मुल्ख तीं इश्शे दादे-पड़दादन दित्तोरो थियो कि तैसेरी रोड़ी फसल खान, एस्से मां असां गुलाम अहम।✝9:36 एज. 9:9;व्यव. 28:48. 37 एसेरी फसली सेइं तैना राज़े ज़ैना तीं इश्शे पापां केरि वजाई सेइं असन पुड़ ठहरावरेन, बड़ी दौलत मैलतीए तैना इश्शी जानी पुड़ ते इश्शे जानबरन पुड़ एपनी-एपनी मेर्ज़ी सेइं हुकूमत ज़मानत, एल्हेरेलेइ असां बेड़ी मुसीबती मां फसोरेम।"

करार कियो गानो

38 एन सेभी केरि वजाई सेइं, असां सच़्च़ैई सेइं करार केरते, ते लिखतां भी देतम, ते इश्शे हाकिम, ते लेवी, ते याजक, तैन पुड़ मोहर भी लातन।