1 एन्च़रे अस ज़ैना विश्वासे मां मज़बूत आम, असेईं एन कियोरू लोड़े कि ज़ैना विश्वासे मां कमज़ोरन तैन केरि मद्दत केरम; न कि अपनो आप खुशी केरम। 2 असन मरां हर कोई अपने विश्वासी ढ्लान ते बेइन्न खुश केरनेरे लेई मद्दत केरे ज़ैस सेइं तैन केरो विश्वास मज़बूत भोए। 3 किजोकि मसीहे भी अपनो आप खुश न कियो, पन ज़ेन्च़रे पवित्रशास्त्रे मां लिखेरूए, "तेरे तुहीन केरनेबालोईं मेरी भी तुहीन की।" 4 ज़ेत्री गल्‍लां पेइली पवित्रशास्त्रे मां लिखोरिन, तैना इश्शे शिक्षारे लेई लिखोरिन, कि अस सबरी ते पवित्रशास्त्रे करां हिम्मत हासिल केरम ताके असन उमीद भोए (परमेशर तैन्ने केरेलो ज़ेसेरे बारे मां तैनी वाधो कियोरोए)। 5 अवं प्राथना केरताईं कि परमेशर तुसन सबर ते हिम्मत दे, ताके तुस यीशु मसीह पत्ती च़लते-च़लते अक भोइतां ज़ीथ। 6 ते तुस सारे अकोट्ठे भोइतां अक भोइतां एक्‍की आवाज़ी मां परमेशर, इश्शे प्रभु यीशु मसीहेरे बाजेरी बडीयाई केरा।

7 एल्हेरेलेइ, एक्‍की होरि कबूल केरा, ज़ेन्च़रे मसीहे तुस कबूल कियोरेथ; एल्हेरेलेइ एन केरा ताके लोक परमेशरेरी बडीयाई केरन। 8 अवं ज़ोताईं, कि ज़ैना वाधे दादन पड़दादन दित्तोरे थिये, तैना वाधे पूरे केरनेरे लेई ते इन बांदू केरनेरे लेई कि परमेशर सच़्च़ो, मसीह खतनो कियोरे लोकां केरो (यानी यहूदी केरो) सेवक बनो। 9 ते गैर कौमां भी परमेशरेरे दयारे वजाई सेइं परमेशरेरी बडीयाई केरन, ज़ेन्च़रे पवित्रशास्त्रे मां लिखेरूए,

"गैर कौमन मां अवं तेरू शुक्र केरेलो,

ते तेरे नंव्वेरू भजन केरेलो।"

10 फिरी होरि ठैरी लिखेरूए,

"हे गैर कौमां केरे लोकव, परमेशरेरे लोकन सेइं साथी आनन्द केरा।"

11 ते फिरी पवित्रशास्त्रे ज़ोते,

"हे गैर कौमां केरे लोकव, प्रभुएरी बडीयाई केरा;

ते हे मुल्खां-मुल्खां केरे सब लोकव; तैसेरी बडीयाई केरा।"

12 ते फिरी यशायाह नबी पवित्रशास्त्रे मां लिखेरूए;

"यिशैरू अक वंश निसेलू,

ते तै गैर कौमन पुड़ हुकूमत केरेलो।

तैस पुड़ गैर कौमां उमीद रखेली।"

13 अवं प्राथना केरताईं परमेशर ज़ै उमीदरो देनेबालोए तुसन तैस पुड़ विश्वास केरनेरे वजाई सेइं सब किसमेरे आनन्द ते शैन्ति सेइं भरे, कि पवित्र आत्मारी शेक्ति सेइं तुश्शी उमीद बद्धती गाए।

14 हे मेरे ढ्लाव ते बेइनव, अवं एप्पू भी तुश्शे बारे मां ज़ानताईं, कि तुस भी भलियैई सेइं भेरतथ, ते तुसेईं कुन कियेरू लोड़े तुस रोड़े च़ारे ज़ानतथ ते एक्‍की होरि शिखैली बटतथ। 15 फिरी भी मीं ज़ैखन कैखन याद करानेरे लेई तुसन बड़े दिलेरी सेइं लिखू, इन तैस अनुग्रहेरे वजाई सेइं भोवं, ज़ै परमेशरे मीं दित्तोरोए। 16 कि अवं गैर कौमां केरे लेई यीशु मसीहेरो सेवक भोइतां परमेशरेरे खुशखेबरारी सेवा याजकेरी ज़ेरि केरि; ज़ैस सेइं गैर कौमां केरे लोक परमेशरे दानेरे रूपे मां दित्ते गाले, ज़ैस सेइं तै खुश भोल्हो, ज़ैना पवित्र आत्मा पवित्र बनेवरेन। 17 अवं यीशु मसीहेरे वजाई सेइं परमेशरेरी सेवाई पुड़ घमण्ड केरि बटताईं। 18 किजोकि तैन गल्‍लां केरे अलावा मीं होरि कोन्ची गल्‍लां केरे बारे मां ज़ोनेरी दिलेरी नईं, ज़ैना मसीहे गैर कौमन केरे लेई वचन, ते कर्म, 19 ते निशान ते बड्डां-बड्डां कम्मां केरे शेक्ति सेइं, ते पवित्र आत्मारे शेक्तरे ज़िरिये कियां, इड़ी तगर कि मीं यरूशलेम नगरे मरां देइतां च़ेवरे पासन इल्‍लुरिकुम इलाके तगर मसीहेरो खुशखेबरारो पूरो-पूरो प्रचार कियो। 20 पन मेरे मनेरी उमंगे, कि ज़ैड़ी-ज़ैड़ी यीशु मसीहेरी खुशखबरी प्रचार नईं भोवरी, तैड़ी खुशखबरी शुनेईं; एरू न भोए होरेरे मुनीयादी पुड़ घर बनेइं। 21 पन ज़ेन्च़रे पवित्रशास्त्रे मां लिखेरूए, तेन्च़रे भोए,

"ज़ैन तैसेरे बारे मां कधी नईं ज़ोवरू, तैना लाहेले,

ते ज़ैनेईं तैसेरे बारे मां नईं शुनोरू तैना समझ़ेले।"

22 एल्हेरेलेइ अवं तुसन कां एजनेरे लेई बार-बार रुकोरो राव। 23 पन हुनी मीं इन इलाकन मां तैन लोकन खुशखबरी शुनेइतां अपनु कम पूरू कियूं, ज़ैनेईं मसीहेरे बारे मां न थियूं शुनोरू, ते मीं बड़े सालां केरि तुसन कां एजनेरी इच्छाए। 24 एल्हेरेलेइ ज़ैखन अवं इसपानिया मुल्खे मां गेइ त तुसन मेइं एइतां गेइलो, किजोकि मीं उमीदे, कि तैस सफरे मां तुसन सेइं मिली, ते ज़ैखन तुसन सेइं मिली त अवं खुश भोईं, ते अवं चाताईं तुस मेरे इसपानिया गानेरे सफरेरे लेई मेरी मद्दत केरा। 25 पन हुनी त परमेशरेरे लोकां केरि सेवा केरनेरे लेई यरूशलेम नगरे गाताईं। 26 किजोकि मकिदुनिया ते अखाया इलाकेरे केरे विश्वासी लोकन इन रोड़ू लग्गू, कि यरूशलेम नगरेरे परमेशरेरे लोकां केरे लेई ज़ैना गरीब आन, किछ चन्दो केरन। 27 तैनेईं एन खुशी सेइं कियूं, तैना यरूशलेम नगरेरे लोकां केरे कर्ज़दारन, यहूदी लोकेईं गैर कौमरे लोकन परमेशरेरे तरफां रोड़ी चीज़ां दित्ती, ते इन रोड़ी कि गैर कौमां केरे लोक इस दुनियारी रोड़ी चीज़ां यहूदन देन। 28 अवं पेइलो यरूशलेम नगरे जो च़लोरोईं ताके ज़ै चन्दो अकोट्ठो कियोरोए तैन देईं, तैट्ठां पत्ती अवं तुसन कां रोम नगरे मां एइतां इसपानिया मुल्खे जो गेइलो। 29 ते अवं ज़ानताईं, कि ज़ैखन तुसन कां एज्जेलो, त मेरे एजनेरे वजाई सेइं मसीह तुसन पूरे तरीके सेइं बरकत देलो।

30 ते हे ढ्लाव ते बेइनव, प्रभु यीशु मसीह पुड़ इश्शे विश्वासेरे वजाई सेइं ते पवित्र आत्मारे दित्तोरे प्यारेरे वजाई सेइं अवं तुसन कां बिनती केरताईं, कि मीं सेइं साथी मेरे लेई परमेशरे कां लगातार प्राथना केरा। 31 कि अवं यहूदिया प्रदेशेरे गैर विश्वासी लोकन करां बच़ोरो रेईं, परमेशरेरे तैना लोक ज़ैना यरूशलेम नगरे मां आन खुशी सेइं तै मद्दत कबूल केरन ज़ै अवं तैन कां नेइलो। 32 ते अवं परमेशरेरी मेर्ज़ी सेइं आनन्दे कां एज्जी ते मीं तुसन साथी आराम मैल्हे। 33 अवं प्राथना केरताईं, कि शान्ति देनेबालो परमेशर तुसन सेब्भन सेइं साथी भोए। आमीन।