12 एल्हेरेलेइ तुस अपने जानी मां पापेरी इच्छान राज़ केरने न देथ, ते तुस तैन केरे मुताबिक न च़ला। 13 ते अपने जिसमेरे अंगन बुरे कम्मां केरे लेई पापे न सौंफा, पन अपने आपे मुड़दन मरां ज़ींते सेमझ़तां परमेशरे सौंफा। ते अपने जिसमेरे अंगन धार्मिकतारे कम्मां केरे लेई परमेशरे सौंफा। 14 ते तुसन पुड़ पापेरू राज़ न भोल्हु, किजोकि तुस मूसेरे कानूनेरे अधीन नईं बल्के अनुग्रहेरे अधीन आथ।

15 त कुन भोव कि अस एल्हेरेलेइ पाप केरम, कि असां मूसेरे कानूनेरे अधीन नईं बल्के अनुग्रहेरे? नईं, कधे नईं। 16 तुस ज़ानथ, कि ज़ैखन तुस ज़ेसेरो हुक्म मन्नेरे लेई अपनो आप गुलामां केरे ज़ेरे सौंफतथ त तुस तैसेरे गुलाम आथ। चाए पापेरी ज़ेसेरो अन्त मौते, चाए हुक्म मन्नेरे ज़ेसेरो अन्त धार्मिकताए। 17 तुस त पेइले पापेरे गुलाम थिये पन हुनी तुसन ज़ै शिक्षा मैल्होरी थी तैस पूरे दिले सेइं मन्नेबाले भोए, एल्हेरेलेइ अवं परमेशरेरू शुक्र केरताईं। 18 ते हुनी परमेशरे तुस पापेरी शेक्ति करां छुटेइतां आज़ाद किये, ते तुस परमेशरेरे गुलाम बने ताके तुस ज़ैन रोड़ू तैन केरि बटथ।