1 Dáa ye di náá, bi ɛ́ bɔn ɛ Zɛɛb di ekwyɛl ɛ, bi goka ɛ́ nɛ ɛdi dáa nyɛy. 2 Dika tɔ kwyɛl pak’en, dáa Klisto di nɛ kwyɛl nɛ nena ɛ. Dum nɛ kwyɛl tak ɛ, nyɛ naka nyel’ɛ met buwa kɔ ɛsu ɛ lena. Buwa tak nabɛ ɛ́ tyee mɛnanas mɛ di nɛ mbɛɛ mɛnuub pɛ daa Zɛɛb ɛ. 3 Nenak, bi moo ɛ́ bot ɛ zedum koŋ nɛ Zɛɛb ɔ. Tin, yɛ ààgoka náá, mɛzɔ, sa di edjɛ edhuud ɛ, dɔɔb, nɛ egwyes esonok djas baadi tɔ len. 4 Yɛ ààgoka náá, bi lóo embee mɛkpa, mɛkpa mɛ mɛlee, mɛkpa mɛ endjemet. Deenek, bi goka ɛ́ nɛ ɛbulal bhɔɔ nɛ Zɛɛb. 5 Guka náá, bot ɛ di tɔ mɛzɔ ɔ, bot ɛ di esa edhiiti esa ee di edjɛ edhuud ɔ, bot ɛ di ewyeeb esa e bot ɔ, bɛ aanàkwaabela esa e lyak tɔ Ɛyoŋ ɛ Klisto, Ɛyoŋ ɛ Zɛɛb. Tin, ye moo ɛ́ tyee náá, bɛ ɛpeduwal bɛnaghisɛ.

6 Sa bot ààkɔɔ bin nɛ elɛŋ e mɛkɔŋ. Yɛ ɛ́ embee esonok binek ɛ di edjɛ Zɛɛb ɛbuk kɔ bot ɛ di ààlooba nɛ nɛ ɔ. 7 Tin, sa bi ààkɛ sama wat nɛ mbi binɔk bot, 8 etɛɛ náá, é ghɛŋ sok, bi nadi ɛ́ tɔ ghooghom, nenak kɔ ɛsu ɛ ɛgwakel ɛ len nɛ Ghɛŋ, bi moo ɛ́ tɔ mɛkas. Tin, kɛka dáa bot ɛ di tɔ mɛkas ɔ. 9 Mɛ ke deenek ɛ́, etɛɛ náá, mɛkas mɛ tak ɛ́ waadjɛ mena embɛɛ esa djas, esa e piki zɛnɔɔ esa e tsɛɛtsɛ. 10 Saka mɛghaaz étɛp ɛgu sa Ghɛŋ di emyaala nɛ yɛ ɛ. 11 Nàdika é di wat nɛ bot ɛ di esa mɛsa mɛ di ààdjɛ bhum ɛ, mɛsa mɛ di esael tɔ ghooghom ɛ. Bi goka ɛ́ nɛ ɛpana yɛ. 12 Yɛ ɛ́ tsɛɛtsɛ, esa ee bot binɔk di esa tɔ ghooghom ɛ, ye nɛ sa sen é ɛbaŋa é mis mɛ bot. 13 É sok, bot di ebaŋa sa bɛ di esa ɛ, mɛfulu mɔɔ nɛ nyen popoopwon, 14 etɛɛ náá, mɛkas ɛ di esa náá esonok djas nyen popoopwon. Dum nɛ tɛp tak ɛ, ye di ekeaa náá:

«Wɔy, mot di egɔ́ ɔ, djema,

wyɛla pak myoŋ,

etɛɛ náá, Klisto neewa wɔ tɔ mɛkas.»

15 Tin, bi ɛ́ kobaka nɛ tyee bi di ekɛ ɛ. Sa bi ààkɛ tyee bot ɛ di ààbɛ nɛ etsoŋ ɔ, bi goka nɛ ɛkɛ ɛ́ dáa bot ɛ etsoŋ. 16 Lelka ɛsa mɛsa tɔ ba mɔɔ ɛpɛɛd ɛ ɛwala zedjɛaa bin ɛ, etɛɛ náá, mena mooka ɛ́ é mbee mɛlu. 17 Nàdika dáa bot ɛ di ààbɛ nɛ etsoŋ ɔ, bi goka ɛ́ nɛ ɛgu ɛkwosak ɛ Ghɛŋ.

18 Nàdika tɔ elangi, etɛɛ náá, elangi ɛ dhaa nyel ɔɔ, yɛ ɛ́ nɛ ghwyil ɛpus mot náá, nyɛ sa etɛp mbɛs. Tin, bi goka ɛ́ bi di tɔɔɔ nɛ Sisim na Dɛɛ. 19 Djɛelka mɛghaaz pak’en tɔ mɛdjeeb mɛ di edjɛ ɛbwaalel, nɛ mɛdjeeb mɛ di edjɛ duu nɛ Zɛɛb, nɛ mɛdjeeb mɛ Sisim na Dɛɛ di etel ɛ. Tiika, myaalaka nɛ Ghɛŋ’en nɛ lyem wat. 20 Bulalka bhɔɔ nɛ Zɛɛb Sɛɛg’enaka é mɛwala djas, é edi djas, nɛ din ɛ Ghɛŋ’enaka Yezu Klisto.

21 Biyɔ bot ɛ di elooba nɛ Klisto ɔ, dika nɛ mɛsila pak’en. 22 Biyɔ boa, loobaka nɛ botom bin, dáa bi di elooba nɛ Ghɛŋ ɛ. 23 Saka deenek etɛɛ náá, motom ɛ di ekɔk kɔ myɛl, dáa Klisto di ekɔk kɔ zɛɛga mendjaala ɛ. Klisto ɛ́ mot di etsik zɛɛga mendjaala di náá, yɛ ɛ́ dáa nyel’ɛ ɔ. 24 Boa goka ɛ́ nɛ ɛlooba nɛ botom bɔɔ, dum nɛ etɛp djas, dáa zɛɛga mendjaala di elooba nɛ Klisto ɛ.

25 Biyɔ botom, kwyɛlka bɛl bin dáa Klisto di ekwyɛl zɛɛga mendjaala ɛ, nyɛy batagwyɛ kɔ ɛsu ɛ tak. 26 Deenek, nyɛ nakwyɛl ɛ́ náá, zɛɛga mendjaala di dɛɛ, yɛ ɛ́ étɛp tak ɛ nyɛ nadis yɛ edhuud nɛ mɛdii nɛ mɛkpa mɛ. 27 Nyɛ nakwyɛl ɛ́ náá, bot ɛ di edum koŋ nɛ Zɛɛb ɔ tyaa sok bhwoob’ɛ, nɛ boo duma, ààbɛ nɛ ɛtɔn, ààbɛ nɛ di wat zekwaada ɛ. Nyɛ nakwyɛl ɛ́ náá, bot ɛ zɛɛga mendjaala mɛ, di bot ɛ edɛɛ, étɛp, ye needi ààdi nɛ mot di elii ɛbiyoɛpe dum nɛ mɛsa mɔɔ. 28 Deenek, botom goka ɛ́ nɛ ɛkwyɛl bɛl bɔɔ, dáa bɛ di ekwyɛl mɛnyel mɔɔ met ɛ. Mot di ekwyɛl myɛl ɔ, nyɛ kwyɛl ɛ́ nyel’ɛ met. 29 Etɛɛ náá, mot tok nɛ ghwyil ɛbhina nyel’ɛ met. Tin, nyɛ nɛ be nyel’ɛ ɛnyɔɛpe, dáa Klisto di esa nɛ zɛɛga mendjaala ɛ. 30 Etɛɛ náá, menaka ɛ́ ekyes e nyel’ɛ. 31 Ekwyala lɛɛ ɛ́ náá:

«Motom ɛ́ waadus tɔ ndjaa sɛɛg nɛ nyɛɛg,

étɛp kɛdi sama nɛ myɛl.

Bɔɔ djas bɛbá aakadi ɛ́ mot ngɔt✝.»

32 Tin, yɛ ɛ́ boo tɛp di syela tɔ ɛlaŋel ɛlak ɛ. Yɛ ɛ́ deenek ɛ́ mɛ di elɛɛ nɛ nen náá, tɛp tak ɛ dum nɛ Klisto nɛ zɛɛga mendjaala. 33 Tin, mɛ ɛpebaabaal nɛ biyɔ botom, mot nɛ mot goka ɛ́ nɛ ɛkwyɛl myɛl dáa nyɛ di ekwyɛl nyel’ɛ met ɛ. Yɛ ɛ́ tyee wat nɛ boa mɛba, bi goka ɛ́ nɛ ɛduwal botom bin.