1 Bɔn-nyɛɛg bam, biyɔ bot ɛ mɛ di ekwyɛl ɛbaabee ɔ, biyɔ ɛ́ di esa náá, bum lyem’am di tɔ mɛmyaala, biyɔ ɛ́ di kɔtɔ duu yam. Deenek, bɔn-nyɛɛg bam, dika sosoob tɔ ɛgwakel nɛ Ghɛŋ.

2 Wɔy Evodhi nɛ wɔy Sɛɛtis, mɛ ɛpedjaala nɛ nen, dika tɔ ɛgwakel pak’en sama nɛ Ghɛŋ. 3 Dɔɔ nɛ wɔy, mot di sosoob tɔ ɛsa mɛsa lɔɔg wat nɛ nam ɔ, mɛ ɛpewaab nɛ nɔ náá, wɔ kwyee boa bɛbá binɔk. Etɛɛ náá, bɛ naadyeebasa mɛghaaz mɛ ɛkwyee mɛ tɔ mɛsa mɛ ɛgoola Mbɛɛ Bhaadal. Yɛ ɛ́ tyee wat nɛ Kelemɔ nɛ bɛdhiiti bot ɛ mɛsa, yii min mɔɔ di tɔ mɛkana mɛ tsik ɛ.

4 Dika tɔ mɛmyaala é mɛwala djas kɔ ɛsu ɛ ɛgwakel ɛ len nɛ Ghɛŋ. Mɛ ɛpebaabasal, dika nɛ mɛmyaala! 5 Beta náá, bot bee enɛm esa bin, etɛɛ náá, ɛbula ɛ Ghɛŋ eezekunaa. 6 Nàbemka ba nɛ dhiiti sonok, ye nakoozodi dáa. É mɛwala djas, waabka nɛ Zɛɛb esonok djas bi di nɛ gwyes nɛ yɛ ɛ tɔ mendjaala. Saka yɛ nɛ lyem duu tɔ ɛbulal ɛ́ bhɔɔ nɛ Zɛɛb. 7 Beta náá, egwyem e Zɛɛb di edhaa etsoŋ djas ɛ, baal elyem bin nɛ ɛbaal esiiza bin tɔ ɛgwakel nɛ Yezu Klisto.

8 Deenek, bɔn-nyɛɛg bam, waka lyem tɔ sa djas di enyɔ ɛ, nɛ sa djas di egoka nɛ ɛkwyɛlaa ɛ. Bi goka ɛ́ nɛ ɛwa lyem tɔ sa djas di tsɛɛtsɛ ɛ, sa di egoka nɛ duu ɛ, sa djas di piki ɛ, sa djas di dɛɛ ɛ. Deenek, bi goka ɛ́ nɛ ɛwa esiiza bin tɔ esa djas di egoka nɛ ɛduwalaa nɛghu ɛwaaa lyem ɛ. 9 Esa djas bi nadjek nɛ nam ɛ, nɛ esa djas bi nagwak nɛ nam, zɛnɔɔ esa djas bi nabee mɛ esa ɛ, waka yɛ tɔ mɛsa. Tɔ etɛp binek djas, Zɛɛb mot di edjɛ egwyem ɔ, nyɛ aadi nɛ nen sama.

10 Mɛ dyeebagwak mɛmyaala ɛbuɛpe kɔ ɛsu ɛ Ghɛŋ ɛ, etɛɛ náá, bi eelyaal mɛ lyaala sis kwyɛl bi di nɛ yɛ nɛ nam ɛ. Mɛ ààpake deenek, etɛɛ náá, bi ààkataala mɛ. Tin, yɛ ɛ́ náá, bi nabɛ ɛ́ ààbela mɔɔ ɛpɛɛd ɛ ɛwala étɛp ɛlyaal mɛ kwyɛl tak. 11 Tin, mɛ ààlii deenek etɛɛ náá, mɛ ɛ́ tɔ ɛsɛɛga. Bela náá, mɛ naadjek dáa mot di egoka nɛ ɛmyaala nɛ sa nyɛ zodi nɛ yɛ ɛ. 12 Mɛ nɛ gu dáa mɛ di egoka nɛ ɛdi tɔ edjel nɛghu tɔ mɛnyɔ ɛ. Mɛ naadjek mɛpek mɛ ɛdi tɔ mɛmyaala é mɛwala djas ye nakoozodi náá, mɛ ɛ́ nɛ za nɛghu mɛ ɛ́ nɛ djil. Ye nakoozodi náá, mɛ ɛ́ tɔ mɛvu nɛghu tɔ ɛsɛɛga. 13 Tin, mɛ ɛ́ nɛ ghwyil ɛsa esa binek djas, etɛɛ náá, Klisto ɛpedjɛ mɛghwyil. 14 Deenek, bi naasa ɛnyɔɛpe é sok bi nadi egek mɛ ghoŋ kɔ ɛsu ɛ mezuk mam ɛ.

15 Biyɔ bot ɛ ghaada Filip, bi nɛ gu biyɔ bɛmet náá, é ghɛŋ mɛ nadus kɔ ghaada Masedwan ɛ, é sok mɛ nakan ɛgoola Mbɛɛ Bhaadal ɛ, bi nabɛ ɛ́ sim zɛɛga mendjaala mɛ wat nakwyee mɛ ɔ. 16 É sok mɛ nadi tɔ ghaada Tesalonik ɛ, ye nabɛ ɛ́ bi naadhis mɛ esonok djas mɛ nadi nɛ gwyes tak ɛ. 17 Ye tok náá, mɛ saŋ ɛ náá, bi gheedhis mɛ mɛtom. Tin, mɛ kwyɛl ɛ́ náá, Zɛɛb sa bin enɛm kɔ ɛsu ɛ sa bi nadjɛ mɛ ɛ. 18 Mɛ naabela esa djas yii bi nadhis mɛ yɛ ɛ, ye nadi ɛ́ ɛbuɛpe kɛdhaa. Mɛ naazebela yɛ é mɛmbɔ mɛ Epafolodhit, mɛ tokapɛ nɛ gwyes dhiiti sonok. Tin, esa ee bi dhis mɛ yɛ ɛ, yɛ ɛ́ dáa ɛtom na mbɛɛ mɛnuub, yɛ ɛ́ buwa Zɛɛb di emyaala nɛ yɛ ɛ, buwa nyɛ di ekwyɛl ɛ. 19 Zɛɛb’am ɛ́ waadjɛ bin esa djas yii bi aadi nɛ gwyes tak ɛ, dum nɛ duma mɛvu mɛ nyɛ di nɛ yɛ, tɔ ɛgwakel ɛ len nɛ Yezu Klisto ɛ.

20 Beta náá, duu di nɛ Zɛɛb Sɛɛg’enaka kɔm-kɔm sii nɛ kɔm! Amɛn.

21 Swoska bot djas di edum koŋ nɛ Zɛɛb ɔ nɛ din ɛ Yezu Klisto. Bɔn-nyɛɛg bin, bot ɛ bis nɛ bɛnɔɔ di ɔ, bɛ eeswos bin. 22 Bot djas zedum koŋ nɛ Zɛɛb ɔ, bɛ eeswos bin, daŋ-daŋ ɛ́ bot ɛ́ di esa mɛsa tɔ ndjaa boo mɛkoozi Sezaad ɔ.

23 Betka náá, enɛm nɛ embɛɛ Ghɛŋ’enaka Yezu Klisto di tɔ esisim bin!