1 Yɛ ɛ́ mam Zuud, mot-mɛsa ɛ Yezu Klisto, mɔn-nyɛɛg ɛ Zak.

Mɛ kwyal ɛ́ biyɔ mɛkana mak, biyɔ bot ɛ Zɛɛb nazedjóo ɔ, biyɔ bot ɛ Zɛɛb Sɛɛg di ekwyɛl ɔ, biyɔ bot ɛ Yezu Klisto di ebaal ɔ.

2 Beta náá, Zɛɛb djɛ bin bɛtɛ nɛ lyem ghoŋ, egwyem nɛ kwyɛl.

3 Bɔn-nyaagam mɛ di ekwyɛl ɔ, mɛ nabɛ ɛ́ nɛ gwyes ɛkwyal bin mɛkana kɔ ɛsu ɛ tsik na kɔm-kɔm Zɛɛb natsik menaka ɛ. Deenek, ye goka ɛ́ náá, mɛ kwyal bin mɛkana mak étɛp ɛdjɛ bin mɛghaaz, bi needuu tuub étɛp ɛdum ɛ koŋ nɛ Zɛɛb nazedjɛaa kɔm-kɔm nɛ bot ɛ na dɛɛ ɔ. 4 Tin, bɛdhiiti bot ɛ na mbee mɛpek eezeni pak’en syaab. Bɛ ɛpeliig sa enɛm nɛ embɛɛ Zɛɛb’enaka di elɛɛ ɛ, étɛp bɛ neediyal mɛnyel dum nɛ embee mɛfulu mɔɔ. Deenek, bɛ eelum koŋ nɛ Yezu Klisto sim Ghɛŋ’enaka, sim lyoel’enaka. Tin, Ekwyala naazeloolɛɛ mbi feŋ di ebwood bɛ ɛ.

5 Bela náá, bi eezegu etɛp binek djas ɛnyɔɛpe. Deenek, mɛ kaada bin ɛ́ dáa Ghɛŋ natsik bɔn ɛ Yisalaɛl pɛ kyee dik Eziptɛ ɛ, bhii tak, nyɛ naazɛgó bot ɛ nadi ààdum koŋ nɛ nɛ ɔ. 6 Pookotaalaka sa nasɛɛ nɛ bɛdhiiti efofop ɛ: Bɛ nabɛ ɛ́ ààbaal ghwyil bɛ nadi nɛ yɛ ɛ. Bɛ naadus é di Zɛɛb nanɛɛg bɛ ɛ. Wɔ gwaa, Zɛɛb zɛkɔl bɛ tɔ mbok na kɔm-kɔm, nyɛ eezɛdiyal bɛ tɔ ghooghom kɛkum é boo dwoo epɛ́ɛ bɔɔ. 7 Taalaka dɔɔ nɛ eghaada Sodɔm nɛ Ghomɔɔd, zɛnɔɔ eghaada nadi é mengwoob ɔ: Bot ɛ eghaada tak nadi ɛ́ nɛ embee mɛfulu dáa efofop binɔk, bɛ nadi ɛ́ nɛ mbee mɛzɔ, nɛ dhiiti mɛzel mɛ ɛdi ɛba yii Zɛɛb di ààkwyɛl náá, ye sael ɛ. Tin, bɛ ɛ́ tɔ feŋ du na kɔm-kɔm. Yenek ɛ́ dáa Zɛɛb di edul menabɛlka djas mɛlɔ ɛ.

8 Bot ɛ nazeni tɔ len syaab ɔ, yɛ ɛ́ deenek ɛ bɛ dyeebasa. Nɛ mbee esiiza bɛ di nɛ yɛ ɛ, bɛ ɛpesyem nɛ mɛnyel mɔɔ, bɛ ɛpebyasal eghɛŋ e Zɛɛb, bɛ ɛpenyek duma efofop ee di tɔ gwoo ɔ. 9 Tin, konyel Mesɛl kukuma efofop nabɛ ɛ́ ààkosa yɛ. Tɔ ɛwɔ bɛ nɛ dim mot mɛkɔŋ, é sok bɛ nadi esuu muu ɛ Moiiz ɛ, fofop Mesɛl nabɛ ɛ́ ààkolee nyɛ, nyɛ nazoke nɛ nɛ ɛ́ náá: «Beta náá, Ghɛŋ wa wɔ é feŋ!» 10 Bot binɔk lee ɛ́ sa bɛ di ààgu ɛ. Sa bɛ di egu ɛ, bɛ gu yɛ ɛ́ dáa bɛtit, bot ɛ di ààtiibal ɔ, yɛ ɛ́ etɛp binek ɛ di ebaasa náá, bɛ wo ze.

11 Haaa! Kpaa-ghoŋ nɛ nɔɔ, etɛɛ náá, bɛ naadu ko ɛ Kayin, bɛ eewo ze dáa Bhalaam etɛp epata. Tin, bɛ nagwyɛ ɛ́, etɛɛ náá, bɛ naalyel elo dáa Koole.

12 Bɛ ɛ́ bot ɛ di ekus ɛghuub, é sok bi di tɔ zɛɛga ɛbyoŋ ɛ ɛdɛ edee bi nɛ bɔn-nyɛɛg bin ɛ. É di’enek, bɛ bɔl ɛbyoŋ ɛ, ààbis mot, ààbɛ nɛ sen. Bɛ ɛ́ dáa eguud di ewo tɔ gwoo nɛ pup ɛ, eguud binek ààsa náá, bhi nɔ. Bɛ ɛ́ dáa ele di ààwum ɛ, ye nakoozodi é mbu di egoka nɛ ɛwum ɛ. Tin, yɛ guaa ɔɔ, yɛ waabaagwyɛ, gwyɛa sis. 13 Deenek, bɛ ɛ́ tyee bhuuge boo dii mɛsɔn di edheegel ɛbuɛpe ɛ, bɛ wyisal embee mɛfulu mɔɔ ɛ́ pwaleŋ é mis mɛ bot, dáa boo dii mɛsɔn dyeebawyisal ebɔkɔlɔ ee di tɔ tak ɛ. Bɛ ɛ́ dhatyee ekwyikwyen di ewo dáa ɛghwak tɔ mɛdii ɛ. Tin, Zɛɛb naazekoobal bɛ di na kɔm-kɔm tɔ di mɛghomela dhaa tyɛ.

14 Enɔk, bhaab’enaka yii etɛn nɛ ebá bhis Adam, naaloolɛɛ náá: «Beeka, Ghɛŋ ɛpezyɛ alu nɛ alu nɛ efofop bɛ na dɛɛ, 15 étɛp ɛzɛpɛ́ɛ bot ɛ bɔs djas. Tin, nyɛ waakwyesal bot ɛ mesyem ndjɛ sɔs, kɔ ɛsu ɛ embee mɛsa mɛ bɛ nadi esa nɛ Zɛɛb ɛ. Dɔɔ nɛ embee mɛkpa mɛ bot ɛ mesyem di ààkaab bot ɔ nalelóo nyɛ ɛ.» 16 Bot binɔk tok nɛ mɛmyaala tɔ elyem bɔɔ, mɛsa mɔɔ ɛ́ etaŋal, bɛ kɛ ɛ́ dáa elyem bɔɔ di ekwos ɛ. Bɛ lii nɛ bot ɛ́ nɛ ɛbet, bɛ nɛ sa mɛkɔŋ kɔ elo e bot, étɛp bɛ neebela sa bɛ di esaŋ ɛ.

17 Yɛ kabɛ biyɔ ɔɔ, bɔn-nyaagam mɛ di ekwyɛl ɔ, taalaka mɛkpa mɛ bot ɛ lwoma ɛ Ghɛŋ’enaka Yezu Klisto nagoola bin ɛ. 18 Ye nabɛ ɛ́, bɛ eelɛɛ nɛ nen náá: «É mɛsi mɛ bɔs, yɛ aadi ɛ́ nɛ bot aawyii bin ɔ, bɛ aadi ekɛ ɛ́ tɔ embee mɛkwosak mɛ elyem bɔɔ.» 19 Bɛ ɛ́ binɔk, bot ɛ di ewa mbɛk ɔ, bɛ tok nɛ Sisim Zɛɛb tɔ lɔɔ, bɛ kɛ ɛ́ nɛ ɛkwosak ɛ epuud bɔɔ tyee bɛtit.

20 Yɛ kabɛ biyɔ ɔɔ, bɔn-nyaagam mɛ di ekwyɛl ɔ, saka náá, tsik’en kɛ kɔ ɛdum ɛ koŋ ɛ len na dɛɛ. Djaalaka nɛ mɛbwala mɛ Sisim na Dɛɛ. 21 Waka lyem tɔ kwyɛl ɛ Zɛɛb, étɛp ɛbwood dwoo Ghɛŋ’enaka Yezu Klisto aadjɛ mena tsik na kɔm-kɔm kɔ ɛsu ɛ lyem ghoŋ’ɛ.

22 Dika nɛ ghoŋ nɛ bot ɛ di ààpyet ghiŋ tɔ ɛdum ɛ koŋ ɔ. 23 Deenek, yɛ ɛ́ nɛ bɛdhiiti bot ɛ di náá, bi ɛ́ nɛ ghwyil ɛtsik bɛ é ɛwyisal ɛ bɛ tɔ du epɛ́ɛ ɔ. Yɛ kabɛ bɛdhiiti bot ɔɔ, dika nɛ lyem ghoŋ nɛ nɔɔ, tin, bi ɛ́ kobaka, é ghɛŋ bi nɛ bɛnɔɔ di edi wat ɛ, ekaab náá, bɛ ɛzɛkɛsaab bin nɛ embee mɛfulu mɔɔ.

24 Duu nɛ mot di ebaal bin, étɛp bi needi ààsyem ɔ, mot di nɛ ghwyil ɛdis bin mesyem, etɛɛ náá, bi needi dɛɛ, nɛ mɛmyaala tɔ duma yɛ ɔ, 25 nɛ sim Zɛɛb ngɔt, Mɛtsik-bot menaka, kɔ lo ɛ Yezu Klisto Ghɛŋ’enaka! Beta náá, duma, nɛ mɛbwala, nɛ ngék dɔɔ nɛ ekukuma, di nɛ nɛ nenak, kɔm-kɔm sii nɛ kɔm! Amɛn.