1 Mɛkana mak ɛ́ nɛ etɛp nadi tɔ sɔ yii Yezu Klisto nawyisal yɛ popoopwon ɛ. Zɛɛb natel nyɛ etɛp tak ɛ, étɛp nyɛ neelyaal bot ɛ mɛsa mɛ sa di náá, yɛ eezekɔ nɛ ɛsael ɛ. Deenek, Klisto naakyeed fofop'ɛ pɛ daa Zaŋ mot-mɛsa mɛ, etɛɛ náá, nyɛ neetel nyɛ etɛp binek. 2 Mam tyaasɛs Zaŋ, mɛ lɛɛ ɛ́ náá, etɛp djas mɛ nabee ɛ, yɛ ɛ́ Mɛkpa ɛ Zɛɛb nɛ etsɛɛtsɛ ee Yezu Klisto natel mɛ ɛ. 3 Mɛmyaala nɛ mot di elaa mɛkana mak ɔ, mɛmyaala nɛ mot di egwak mɛkpa mɛ di edus pɛ daa Zɛɛb, da nyɛ ɛ́ di elooba ɛnyɔɛpe nɛ etɛp di kwyala wak ɛ! Etɛɛ náá, ɛwala di náá, etɛp binek djas aasael ɛ́ yɛ eezekunaa.

4 Yɛ ɛ́ mam Zaŋ, mɛ eeswos bot ɛ ezɛɛga mendjaala etɛn nɛ ebá di pɛ kyee dik Azi ɛ.

Beta náá, Zɛɛb mot di ɔ, mot nadi ɔ, mot di ezyɛ ɔ, dɔɔ nɛ esisim etɛn nɛ ebá dyeebadi sok bhwoob bóó mɛkoozi ɔ, djɛ bin enɛm nɛ embɛɛ nɛ egwyem. 5 Beta náá, Yezu Klisto, mot di tyaasɛs tɔ esosoob ɔ, mot di mot mɛkɛn nagomelaa pak myoŋ ɔ, mot di mɛkoozi bɛmɛkoozi mɛ di kɔ ɛko ɛ bɔs'ak ɔ, djɛ bin enɛm nɛ embɛɛ nɛ egwyem.

Klisto nɛ kwyɛl mena, nyɛ naapɛk mena tɔ mesyem dum nɛ buwa nyel'ɛ met nyɛ naka ɛ. 6 Nyɛ eesa náá, mena dika ɛyoŋ ɛ bɛghaa-Zɛɛb étɛp ɛsa mɛsa mɛ Zɛɛb Sɛɛg. Beta náá, duu nɛ mɛbwala di nɛ nɛ kɔm-kɔm sii nɛ kɔm! Amɛn.

7 Beeka, nyɛ ɛpezyɛ tɔ eguud! Bot djas ɛ́ waabee nyɛ nɛ mis mɔɔ, dɔɔ nɛ bot ɛ nalum nyɛ nɛ ɛkɔɔ ɔ. Membyak djas di kɔ ɛko ɛ bɔs ɛ waadje mɛgwyɛ kɔ ɛsu ɛ lɛ. Tsɛɛtsɛ! Amɛn.

8 Ghɛŋ Zɛɛb ke ɛ́ náá: «Mɛ ɛ́ Alfa nɛ Omegha*», mot di ɔ, mot nadi ɔ, mot di ezyɛ ɔ, Zɛɛb Mɛkaake.

9 Yɛ ɛ́ mam Zaŋ, mɔn-nyɛɛg'en, mot di egyee nɛ nen tɔ mezuk, tɔ Ɛyoŋ ɛ Zɛɛb, nɛ tɔ zii sama nɛ Yezu ɔ. Mɛ naakyeedaa nɛ bhel pɛ kyee dik ghola Patmɔs, kɔ ɛsu ɛ esosoob bam tɔ ɛgoola Mɛkpa ɛ Zɛɛb, nɛ etsɛɛtsɛ ee Yezu natel mɛ ɛ. 10 Tin, é ɛlu ɛ Ghɛŋ, Sisim na Dɛɛ naazɛmɛt mɛ. Mɛ naazɛgwak dhiiti gwood elɔɔ bhii koŋ'am ɛlyelɛpe tyee boo tɔŋ. 11 Gwood tak nake nɛ nam ɛ́ náá: «Etɛp ee wɔ di ebee ɛ, kwyala yɛ tɔ mɛkana, da wɔ ɛ́ kyeed yɛ pɛ ezɛɛga mendjaala etɛn nɛ ebá bak: zɛɛga mendjaala ghaada Efɛɛz nɛ yii Simiin, nɛ yii Pɛɛlgham nɛ yii Tyatiid nɛ yii Saaldɛs nɛ yii Filadhɛlfi zɛnɔɔ yii Laodhise.» 12 Tin, mɛ naazɛliigel étɛp ɛgwyák mot nadi elii nɛ nam ɔ. Wɔ gwaa, mɛ zɛbee elama etɛn nɛ ebá nasaa nɛ lɔɔd ɛ*. Elama etɛn nɛ ebá

13 Kuku elama etɛn nɛ ebá binek, ye nadi ɛ́ nɛ dhiiti djema di enɔŋel nɛ mɔn mot ɛ✝. Nyɛ nabɔt ɛ́ dhiiti ndjookuwa na ghɔlɔlɔɔ, nɛ bhɛtɛ nasaaa nɛ lɔɔd ɛ. 14 Bhoo lo'ɛ nadi ɛ́ mɛpum dhaa tyɛ dáa ɛpyaab, mis mɛ nadi ekas dáa gel du, 15 mɛko mɛ nadi ɛ́ tɔɔbelaa dáa gwooz di djóoaa blɔɔz ɛ tɔ boo du. Gwood'ɛ nadi egek ɛ́ dáa bhuuge boo dii mɛsɔn. 16 Tɔ mbɔ eghɛŋ bɛ, nyɛ namɛt ɛ́ ekwyikwyen etɛn nɛ ebá. Nuub'ɛ nadi ewyisal pɛl na wol-wol. Bhwoob'ɛ nadi ekas ɛlyelɛpe dáa mɛkas mɛ gwyes di enyan é kuku dwoo ɛ.

17 É ghɛŋ mɛ nabee nyɛ ɛ, wɔ gwaa, mɛ zɛghaaga si mɛko mɛ, ɛkɛɛ mot di náá, nyɛ eezegwyɛ ɛ. Tin, nyɛ eezɛkɛl mbɔ eghɛŋ bɛ kɔ lam. É di'enek, nyɛy nɛ nam náá: «Nàbem ba, mam ɛ́ di Mɛkɛn nɛ Mɛsik. 18 Mam ɛ di mot di nɛ tsik ɔ, mɛ naagwyɛ, tin, nenak, mɛ moo ɛ́ nɛ tsik kɔm-kɔm sii nɛ kɔm. Deenek, mam ɛ́ di nɛ ghwyil kɔ ɛsyee. Mam ɛ di nɛ ghwyil kɔ dɛl ɛ edim e bot ɛ nazegwyɛ ɔ. 19 Kwyala sa wɔ bee ɛ: sa di nenak ɛ, nɛ sa aazyɛ ɛ. 20 Gwaka ɛsuk ɛ mɛbwala mɛ ekwyikwyen etɛn nɛ ebá wɔ bee tɔ mbɔ eghɛŋ bam ɛ, nɛ ɛsuk ɛ mɛbwala mɛ eboo elama etɛn nɛ ebá nasaa nɛ lɔɔd di ekwyɛl ɛlɛɛ ɛ. Ekwyikwyen etɛn nɛ ebá kwyɛl ɛlyaal ɛ́, efofop e ezɛɛga mendjaala etɛn nɛ bɛbá. Tin, elama etɛn nɛ ebá binek kalyaal ɛ́, ezɛɛga mendjaala etɛn nɛ ebá.»