1 Mɛ nadi ebaabee, wɔ gwaa, mɛ zɛbee Mɔn bhata tetel kɔ ɛtsok ɛ Siyɔŋ. É di nyɛ nadi ɔ, ye nabɛ ɛ́ nɛ bɛdhiiti bot bɛmil dhet nɛ bɛmil mɛkam-mɛná nɛ ɛná (144 000), nadi nɛ din ɛ lɛ nɛ yii Sɛɛg kwyala kɔ ebhata-bhwoob bɔɔ ɔ. 2 Mɛ eezɛgwak dhiiti gwood tɔ gwoo é swak dáa eboo mɛsok, dáa boo bham ghɛl ɛko. Tin, ɛtap ɛ mɛ nagwak ɛ nadi ɛ́ dáa yii bot ɛ di ebwom ngɔmbi ɔ. 3 Bɛtɛ nɛ bot binɔk nadi etii djeeb na bes sok bhwoob bóó mɛkoozi, sok bhwoob edjema ená di nɛ tsik ɔ, zɛnɔɔ bɛpaa. Mot nabɛ ɛ́ ààbɛ nɛ ghwyil ɛdjek djeeb tak, yɛ di ààbɛ bot bɛmil dhet nɛ bɛmil mɛkam-mɛná nɛ ená (144 000) nadi kɔ bɔs ɔɔ, bot ɛ Mɔn bhata natsik ɔ.

4 Bot binɔk nabɛ ɛ́, bot ɛ nadi ààsaab mɛnyel mɔɔ nɛ mɛzɔ kɔ ɛko ɛ bɔs ɔ, bɛ naabaal mɛnyel mɔɔ tɔ edɛɛ. Bɛ ɛpedu Mɔn bhata é edi djas nyɛ di etɔ́ ɛ. Bɛ naadjɛaa tsik tɔ sama bot ɛ nadi kɔ ɛko ɛ bɔs ɔ, étɛp bɛ needi bot ɛ mɛkɛn aadjɛaa Zɛɛb bɛ nɛ Mɔn bhata ɔ. 5 Bɛ ààwyisal etɛp e etsal tɔ enuub bɔɔ, bɛ tok nɛ ghwyil kwyeselaa ndjɛ sɔs.

6 Bhii tak, mɛ naazɛbee dhiiti fofop epilal ɛvyɛɛgɛpe pɛ tɔ gwoo. Nyɛ nabɛ ɛ́ nɛ Mbɛɛ Bhaadal na kɔm-kɔm nyɛ nadi ekwyɛl ɛgoola nɛ bot ɛ bɔ djas, membyak djas, elii djas, nɛ mɛdhik djas ɛ. 7 Nyɛ nadi etuud ɛlyelɛpe ɛ́ náá: «Kaabka Zɛɛb, djɛka nyɛ duma! Etɛɛ náá, ɛwala nyɛ di epɛ́ɛ bot ɛ bɔs ɛ, yɛ eezedjala. Duwalka mot nakus gwoo nɛ bɔs ɔ, mot nakus boo dii mɛsɔn nɛ esɔɔgɔ djas ɔ!»

8 Fofop bhɔɔba nadi edu fofop mɛkɛn ɔ nadi eke náá: «Yɛ eewyɛɛza, boo ghaada Bhabhilɔn eewyɛɛza! Nyɛy mot di edjɛ bot ɛ mɛdhik djas mɛnyok mɛ vin mɛ gwam-gwam mɛzɔ mɛ ɔ!»

9 Tin, fofop yii elɛl, mot nadi ebɔɔba bɛbá binɔk ɔ, nadi etsim ɛlyelɛpe náá: «Mot ɛ duwal tit nɛ naghisɛ yɛ ɔɔ, da nyɛ ɛ́ bela geka kɔ bhata-bhwoob nɛghu kɔ mbɔ ɔɔ, 10 nyɛy pe ɛ́ waadɛ mɛnyok mɛ vin mɛ boo ɛbuk ɛ Zɛɛb. Mɛnyok mɛ vin mɛ tak aadi ɛ́ na nyan-nyan, tin, Zɛɛb ɛ́ waaso yɛ tɔ mɔɔ buku ɛbuk ɛ lɛ. Deenek, nyɛ waabee boo mezuk tɔ du nɛ mɛsii mɛ na goo-goo di djóoaa sufɛlɛ ɛ, é mis mɛ efofop na dɛɛ, dɔɔ nɛ é mis mɛ Mɔn bhata. 11 Eguluk e du di ezuk bɛ ɛ, yɛ ɛpebyet pɛ ɛko kɔm-kɔm. Bot ɛ di eduwal tit nɛ naghisɛ yɛ ɔ, bot ɛ bela geka din ɛ lɛ é bhata-bhwoob ɔ, bɛ ɛpeni tɔ mezuk mwos nɛ pum, ààbɛ nɛ ɛwala.»

12 Dum nɛ tɛp tak ɛ, bot ɛ edɛɛ goka ɛ́ nɛ ɛlyaal náá, bɛ ɛ́ nɛ zii, bɛ nɛ looba nɛ mɛtiŋ mɛ Zɛɛb, bɛ ɛpedum koŋ nɛ Yezu.

13 Bhii tak, mɛ eezɛgwak dhiiti gwood tɔ gwoo eke nɛ nam: «Kwyala dáak:

"Kana mos, mɛmyaala nɛ bot ɛ di egwyɛ,

bɔɔ tɔ mɛsa mɛ Ghɛŋ ɔ!"

Deenek, Sisim lɛɛ ɛ́ náá:

"Mɛmyaala nɛ nɔɔ.

Bɛ eebela ɛwala dum nɛ elyel-lyel mɛsa mɛ bɛ nasa ɛ,

etɛɛ náá, bɛ waabela efute e mɛnyɔ mɛ mɛsa mɛ bɛ nazesa ɛ!"»

14 Mɛ nadi ebaagwyák, wɔ gwaa, mɛ zɛbee eguud na puu. Tɔ eguud tak, mɛ naabee dhiiti mot é nɔŋel nɛ mɔn mot. Nyɛ nabɔt kɔ lo ɛ́ kɔtɔ bɛghɛŋ nasael nɛ lɔɔd ɛ, é mbɔ yɛ, nyɛ namɛt ɛ́ ɛghɔɔb wat na wol-wol. 15 Tin, dhiiti fofop eezɛwyis tɔ Di na Dɛɛ, nyɛ eezɛtsim ɛlyelɛpe nɛ mot nadi ndiidel tɔ eguud ɔ náá: «Nɔŋa ɛghɔɔb ɛ lɔ, disa mɛbhek, etɛɛ náá, ɛwala ɛ tak eezedjala, mɛbhek mɛ bɔs eezewoozal étɛp ɛdis!» 16 É di'enek, mot nadi ndiidel kɔ eguud ɔ naazɛwus ɛghɔɔb ɛ lɛ kɔ bɔs, tin, mɛbhek mɛ bɔs djas naadisaa.

17 Dhiiti fofop sis naazɛwyis tɔ Di na Dɛɛ di tɔ gwoo ɛ, nyɛy pe nabɛ ɛ́ nɛ yɛ ɛghɔɔb na wol-wol é mbɔ. 18 Dhiiti fofop sis, mot di nɛ ekukuma kɔ du ɔ naazɛdus pɛ kyee mesa-ebuwa. Wɔ gwaa, nyɛ zɛtsim ɛlyelɛpe nɛ mot nadi nɛ ɛghɔɔb na wol-wol ɔ náá: «Nɔŋa ɛghɔɔb ɛ lɔ na wol-wol, tsaala mɛghɛŋ mɛ bhum vin di kɔ bɔs ɛ, etɛɛ náá, bhum e tak eezewoozal.» 19 Fofop tak naazɛdhaa nɛ ɛkpaŋ ɛ́ mɛghɛŋ mɛ bhum vin nadi kɔ ɛko ɛ bɔs ɛ nɛ ɛghɔɔb ɛ lɛ. Wɔ gwaa, nyɛ zɛso yɛ djas tɔ syaala di elyaal ɛbuk ɛ Zɛɛb ɛ. 20 Bhum e vin natwaalaa ɛ́ tɔ syaala di ɛtsetaɛpe nɛ ghaada ɛ. Tin, ghiya nadi eswol tɔ syaala. É di'enek, yɛ eezɛwo kɛkum ekilomɛtɛlɛ bɛdhet ɛlɛl (300). Tin, ghiya nadi ebyet, mɛdim mɛ tak ɛkɛɛ yɛ aasik yaaga é tsuŋ.