1 «Kwyala fofop zɛɛga mendjaala ghaada Efɛɛz mɛkana náá:

Mot di nɛ ekwyikwyen etɛn nɛ ebá tɔ mbɔ eghɛŋ bɛ ɔ, mot di ekɛ kuku lama na mengel etɛn nɛ ebá nalulaa nɛ lɔɔd ɔ, lɛɛ ɛ́ náá: 2 Mɛ nɛ gu mɛsa mɔ, mɛ nɛ gu mezuk mɔ, mɛ nɛ gu zii wɔ di nɛ yɛ ɛ. Mɛ nɛ gu náá, wɔ ààmaad bot ɛ di esa ɛbiyo ɔ. Wɔ naasaa ɛgu ɛ bot ɛ di ekɔɔ bot náá, bɛ ɛ́ bot ɛ lwoma ɔ, batakɛgu náá, bɛ tok bot ɛ lwoma, bɛ kɔɔ bot ɛ́ kɔɔak. 3 Wɔ ɛ́ nɛ zii, wɔ naazuk étɛp'am, é di'enek, wɔ nabɛ ɛ́ nɛ mɛghaaz. 4 Tin, mɛ ɛpelɛka nɛ nɔ: wɔ ààkakwyɛl mɛ dáa wɔ nadi ekwyɛl mɛ é mɛkɛn ɛ. 5 Taala wɔy wɔ ɛmet di wɔ nadi ɛ, ɛsok nɛ náá, wɔ wo ze! Swoola mɛfulu mɔ, da wɔ ɛ́ sa mɛsa mɛ wɔ nasesa sok é mɛkɛn ɛ. Tin, wɔ byen ɛswoola ɔɔ, mɛ aazyɛ pɛ daa lɔ, da mɛ ɛ́ dis lama yɔ é di ye di ɔ. 6 Tin, wɔ ɛ́ nɛ sa wat mɛ di emyaala nɛ nɔ kɔ ɛsu ɛ tak ɛ: Yɛ ɛ́ náá, wɔ nɛ bhina mɛsa mɛ zɛɛga bot ɛ di edjóoaa eNikolayit ɔ, yii mam ɛmet di ebhina pe ɛ.

7 Beta náá, mot ɛ di nɛ mɛlɔ ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!

Tin, nɛ mot aakwak ɔɔ, mɛ aadjɛ nyɛ bɛ bum le tsik di tɔ paladi Zɛɛb ɛ.»

8 «Kwyala fofop zɛɛga mendjaala ghaada Simiin mɛkana náá:

Mot di mɛkɛn nɛ mɛsik ɔ, mot nagwyɛ da gom ɔ, lɛɛ ɛ́ náá: 9 Mɛ nɛ gu mezuk mɔ nɛ edjel bɔ. Gua náá, wɔ ɛ́ mot ekum. Mɛ nɛ gu mɛbhekel mɛ bot ɛ di eke náá, bɛ ɛ́ bot ɛ mbyak eYuda, di ebyak wɔ ɔ. Bela náá, bɛ tok bot ɛ mbyak eYuda, bɛ ɛ́ bot ɛ zɛɛga mendjaala ɛ Satan. 10 Nabem kɛŋ nɛ mezuk mɛ wɔ aaboma nɛ yɛ ɛ. Gwaka: Dim mot mɛkɔŋ ɛ́ waawa bin tɔ mɛbhowal, nyɛ waawa bɛtɛ nɛ bot pak'en tɔ membok, bi ɛ́ waatiigaa é di mɛlu kam. Tin, dia sosoob kɛkum dwoo ɛsyee ɛ lɔ, é di'enek, mɛ aadjɛ wɔ kɔtɔ duu tsik na kɔm-kɔm.

11 Beta náá, mot ɛ di nɛ mɛlɔ ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!

Nɛ mot aakwak ɔɔ, nyɛ aanàkwaakabaagwyɛ ngwyɛa sis.»

12 «Kwyala fofop zɛɛga mendjaala ghaada Pɛɛlgham mɛkana náá:

Mot di nɛ pɛl na wol-wol é mbɔ ɔ, lɛɛ ɛ́ náá: 13 Mɛ nɛ gu di wɔ di ɔ, yɛ ɛ́ di Satan di ndiidel kɔ bóó mɛkoozi mɛ ɔ. Wɔ ɛ́ sosoob nɛ nam, wɔ ààpakat ɛdum ɛ koŋ ɛ lɔ nɛ nam, ye nakoozobɛ é ghɛŋ Antipas, mot nadi tyaasɛs'am tɔ esosoob nagóaa pɛ daa len, é di Satan di ɔ. 14 Tin, mɛ ɛ́ nɛ edhiiti ba bɔɔ esonok di náá, mɛ di elɛka nɛ nɔ étɛp tak ɛ. Tɔ zɛɛga mendjaala mɔ, wɔy ɛ́ nɛ bɛdhiiti bot ɛ di náá, bɛ ɛpedu mɛlyo mɛ Bhalaam ɔ. Bhalaam ɛ́ mot nadi ebesal mɛkoozi Bhalak náá, nyɛ laab bɔn ɛ Yisalaɛl étɛp bɛ needɛ bɛtit ɛ nakaaa bɛnaghisɛ ebuwa ɔ, nɛ ɛdjaaz bɛ é mɛzɔ. 15 Deenek, yɛ ɛ́ pe ɛ́ nɛ bɛdhiiti bot ɛ di náá, bɛ ɛpedu mɛlyo mɛ eNikolayit pɛ daa lɔ. 16 Swoola mɛfulu mɔ. Yɛ di ààbɛ deenek ɔɔ, mɛ aanàbɔya nɛ ɛzyɛ pɛ daa lɔ, da mɛ ɛ́ lumla nɛ bot binɔk nɛ pɛl di ewyis tɔ nuub'am ɛ.

17 Beta náá, mot ɛ di nɛ mɛlɔ mɛ ɛgwak ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!

Nɛ mot aakwak ɔɔ, mɛ aadjɛ nyɛ edee syela di edjóoaa "man" ɛ. Mɛ waadjɛ mot nɛ mot ɛkok ɛ na puu. Pɛ kɔ ɛkok ɛ tak ɛ́ nɛ kwyala din na bes bot di ààgu ye di ààbɛ mot di ebela yɛ ɔ.»

18 «Kwyala fofop zɛɛga mendjaala ghaada Tyatiid mɛkana náá:

Mɔn ɛ Zɛɛb, mot mis mɛ di egel dáa boo ngel du ɔ, mot mɛko mɛ di tɔɔbelaa dáa gwooz di djóoaa blɔɔz tɔ boo du ɛ, lɛɛ ɛ́ náá: 19 Mɛ nɛ gu mɛsa mɔ, nɛ kwyɛl'ɔ, nɛ esosoob bɔ, mɛ nɛ gu dáa wɔ di ewa lyem tɔ ɛsa mɛsa ɛ, mɛ nɛ gu zii wɔ di nɛ yɛ ɛ. Deenek, mɛ eezegu náá, mɛsa mɛ wɔ kadi esa mos'aak, yɛ eedhaa yii mɛkɛn. 20 Tin, mɛ ɛpelɛka nɛ nɔ: wɔ ɛpedjɛs Zezabɛl, moma di ekɔɔ bot náá, nyɛ ɛ́ ngoolel-Mɛkpa ɛ Zɛɛb ɔ. Mɛlyo mɛ ɛpesa náá, bot ɛ mɛsa mam wo ze, yɛ ɛ́ ɛpedjɛs bɛ tɔ mɛzɔ nɛ ɛdɛ bɛtit ɛ nakaaa bɛnaghisɛ ebuwa ɛ. 21 Mɛ eebet nyɛ ba mɔɔ pes ɛwala etɛɛ náá, nyɛ neeswoola mɛfulu. Tin, nyɛ ààkwyɛl ɛkat mɛzɔ mɛ. 22 Étɛp tak ɛ di náá, mɛ aadum nyɛ si kɔ goŋ mezuk. Mɛ waawa bot ɛ di egyee sama nɛ nɛ tɔ mɛzɔ ɔ tɔ boo mezuk. Yɛ di náá, bɛ eeswoola mɛfulu mɔɔ, da bɛ ɛ́ bet ɛdu ɛ nyɛ ɔɔ, mezuk mɛ tak aanàbela bɛ. 23 Mɛ waagó bɔn bɛ. Tin, ezɛɛga mendjaala djas aagu náá, yɛ ɛ́ mam ɛ di egu esiiza nɛ mɛkwosak mɛ bot ɛ bɔs. Mɛ waadjɛ mot nɛ mot efute dum nɛ mɛsa mɛ nyɛ nasa ɛ. 24 Yɛ kabɛ biyɔ bot ɛ zɛɛga mendjaala ghaada Tyatiid ɔɔ, biyɔ bot ɛ di ààdu mbee mɛlyo menek ɔɔ, biyɔ bot ɛ di ààsaa ɛgu ɛ́ sa di edjóoaa "esa e syela e Satan" ɔɔ, gwakeka sa mɛ di elɛɛ nɛ nen ɛ: mɛ ààpabaadjɛ bin dhiiti ɛbɛp. 25 Tin, sa bi zebela ɛ, mɛtka yɛ ghiŋ kɛkum ɛwala ɛ mɛ aazyɛ ɛ.

26 É di'enek, nɛ mot aakwak ɔ, mot aasa ɛkwosak ɛ lam kɛkum dwoo mɛsik ɔ, mɛ waadjɛ nyɛ ghwyil kɔ membyak djas. 27 Nyɛ aadjɛɛd bɛ ɛ́ nɛ sek ghwooz, nyɛ waatwaal bɛ dáa mɛbhe mɛ dyak. 28 Saagam ɛ nadjɛ mɛghwyil tak. Mɛ waadjɛ mot aakwak ɔ kwyikwyen mɛlem.

29 Beta náá, mot di nɛ mɛlɔ mɛ ɛgwak ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!»