1 Bhii tak, wɔ gwaa bɛ zɛdjɛ mɛ le ghwaazok di egekaa mɛdjaa mɛ esonok nɛ yɛ ɛ, ye nɔŋel ɛ́ nɛ mɔɔ bil le. É di'enek, bɛ eezɛke nɛ nam: «Wyɛla, tɔ́ kɛgek mɛdjaa mɛ Di na Dɛɛ e Zɛɛb, dɔɔ nɛ mesa-ebuwa, da wɔ ɛ́ laa mɛtaŋ mɛ bot ɛ di eduwal Zɛɛb ɔ. 2 Tin, da wɔ ɛ́ bet ɛbɛsɛɛ mɛkɛn kok ndjaa-ebuwa ààgek yɛ, etɛɛ náá, bɛ naazedjɛ yɛ nɛ bot ɛ membyak mɛ sis, bot aanyal ghaada na dɛɛ tɔ bɛngɔn mɛkam-mɛná nɛ ebá ɔ (42). 3 Mɛ waadhis bɛtyaasɛs bam bɛbá, bɛ waabɔt ekaad e pil. Bɛ waagoola bhaadal dus pɛ daa Zɛɛb ɛ, mɛlu mil wat nɛ bɛdhet-ɛbá nɛ mɛkam-mɛtɛn nɛ kam wat (1 260).»

4 Bɛtyaasɛs binɔk bɛbá ɛ́ ele e oliv ebá, nɛ elama ebá di sok bhwoob Ghɛŋ nakuma bɔs ɛ. 5 Mot ɛ kwyɛl ɛsa bɛ ɛbiyo ɔɔ, du ɛ́ waawyis tɔ enuub bɔɔ, yɛ ɛ́ dik bot ɛ mɛbhuka mɔɔ. Yɛ ɛ́ deenek ɛ́ bot aakwyɛl ɛsa bɛ ɛbiyo ɔ aagwyɛ. 6 Bɛtyaasɛs binɔk ɛ́ nɛ ghwyil ɛbee bhi, é mɛlu djas bɛ aadi egoola bhaadal dus pɛ daa Zɛɛb ɛ. Bɛ ɛ́ nɛ ghwyil ɛliig mɛdii zyɛ ghiya. Bɛ ɛ́ nɛ ghwyil ɛsa náá, bhwak djas ni tɔ membi mɛ eboo egum djas, esok nɛ esok dáa elyem bɔɔ di ekwos ɛ.

7 Tin, é ghɛŋ bɛ aasilal ɛgoola bhaadal yɔɔ ɛ, tit di ewyis tɔ boo guk na dim-dim di ààbɛ nɛ ɛsik ɔ, waalumla dɛɛb nɛ nɔɔ. Nyɛ waakwak bɛ, nyɛ waagó bɛ. 8 Myoŋ mɔɔ waakaaa é di bot djas di esɛɛga tɔ boo ghaada ɔ, di Ghɛŋ'ɔɔ nabemaa kɔ mɛlaaba ɔ. Di yenek lyaal ɛ́ ghaada Sodɔm nɛ kyee dik Eziptɛ. 9 Bot djas, membyak djas, elii djas, nɛ mɛdhik djas ɛ́ waabee myoŋ mɔɔ mɛlu mɛlɛl nɛ pes. Tin, bɛ aanàmyaal náá, myoŋ mɔɔ kɛwaaa tɔ ɛvit*. 10 Bot ɛ di kɔ ɛko ɛ bɔs ɛ́ waamyaala nɛ ɛsyee ɛ lɔɔ, bɛ aadi ɛ́ tɔ ɛbyoŋ, bɛ waapɛkel nɛ esa pak'ɔɔ, etɛɛ náá, bɛngoolel ɛ Mɛkpa ɛ Zɛɛb bɛbá binɔk naadyeebaazuk bot.

11 Tin, bhii mɛlu mɛlɛl menek nɛ pes, eswos e tsik eezɛdus pɛ daa Zɛɛb ni tɔ lɔɔ. Wɔ gwaa, bɛ zɛwyɛl tyaa metetel, tin, bwoo naazɛmɛt bot ɛ nadi ebee bɛ ɔ ɛlyelɛpe. 12 Bɛngoolel ɛ Mɛkpa ɛ Zɛɛb bɛbá binɔk naazɛgwak dhiiti boo gwood ebam pɛ tɔ gwoo: «Goka wak!» É di'enek, bɛ naabyet tɔ́ tɔ gwoo tɔ eguud, é mis mɛ bot ɛ mɛbhuka mɔɔ. 13 É di'enek, wɔ gwaa bɔs zɛdheegel ɛlyelɛpe. Kyee wat tɔ ekyee kam ghaada zokazɛbik. Bot bɛmil ɛtɛn nɛ ɛbá (7 000) zokagwyɛ nɛ kukuu bɔs nadheegel ɛ. Bwoo naazɛsa bot ɛ natsak ɔ, é di'enek, bɛ naazɛdjɛ duu nɛ Zɛɛb, mot di tɔ gwoo ɔ. 14 Mezuk mɛ bhɔɔba eedhaa, tin, mezuk mɛ elɛl moo aakan.

15 Tin, fofop yii etɛn nɛ ebá eezɛlɔɔ yɛ tɔŋ. Eboo bhyeed eezɛgék ɛlyelɛpe tɔ gwoo eke náá: «Ɛyoŋ ɛ bɔs'ak moo ɛ́ yii Ghɛŋ'es, nɛ Mɛsia mɛ. Nyɛ waakɔk kɔ bɔs kɔm-kɔm sii nɛ kɔm!» 16 Tin, bɛpaa mɛkam-mɛmbá nɛ ená, nadi mendiidel kɔ mɛbhóó mɛ ekukuma bɔɔ sok bhwoob ɛ Zɛɛb ɔ, bɛ eezɛghaaga bhwoob si, kwyit mɛboŋ mɔɔ étɛp ɛduwal ɛ Zɛɛb, 17 bɔɔ nɛ nɛ náá:

«Ghɛŋ Zɛɛb Mɛkaake,

wɔy mot di ɔ, wɔy mot nadi ɔ,

bis ɛpeghaapɛɛ wɔ,

etɛɛ náá, wɔ eesa nɛ mɛbwala mɔ náá,

mɛkoozi mɔ be di nenak.

18 Bot ɛ mɛdhik naakpaa ɛbuk,

nenak, yɛ ɛ́ ɛbuk ɛ lɔ ɛ kadi enyen.

Ɛwala ɛ ɛpɛ́ɛ bot ɛ nazegwyɛ ɔ eezedjala.

Yɛ ɛ́ ɛwala ɛ wɔ aadjɛ bot ɛ mɛsa mɔ,

bɛngoolel ɛ Mɛkpa ɛ Zɛɛb,

nɛ bot ɛ di elooba nɛ nɔ ɔ, zɛnɔɔ bot ɛ di bɔ ɔ, efute,

ye nakoozodi bot ɛ mbyok nɛghu bot ɛ di ààdi bot ɛ mbyok ɔ.

Ɛwala ɛ ɛsaab bot ɛ di esaab bɔs ɔ, yɛ eezedjala!»

19 Pɛ tɔ gwoo, Di na Dɛɛ Zɛɛb naazɛbɛŋel, tin, tot ɛbhɛŋ zokatuula, mengwyes, bhyeed, bham ghɛl ɛko zɛgék, bɔs dheegel zɛnɔɔ bhi boo mɛtaadak nee.