1 Bhii tak mɛ eebee mɛkana wola dáa bum tɔ mbɔ mot nadi ndiindel kɔ bóó mɛkoozi ɔ. Mɛkana mɛ tak nabɛ ɛ́ nɛ ekwyala tɔ tak nɛ é koŋ tak. Ye nabɛ ɛ́ tiŋela, nɛ mɛtuŋa etɛn nɛ ebá bɛ nabɛk luk kɔ tak ɛ. 2 Bhii tak, mɛ eebaazɛbee dhiiti fofop na mɛbwala etuud ɛlyelɛpe náá: «Ɛzɛ di egoka nɛ ɛkɔ mɛtuŋa mɛ nabɛkaa luk kɔ tak ɛ, da nyɛ ɛ́ dii mɛkana?» 3 Tin, ye nabɛ ɛ́ ààbɛ nɛ mot pɛ tɔ gwoo, nɛ pɛ kɔ bɔs, zɛnɔɔ si bɔs nadi nɛ ghwyil ɛdii mɛkana, da laa yɛ. 4 É di'enek, mɛ moo tin edje ɛbuɛpe etɛɛ náá, ye tok nɛ dhiiti mot nadi egoka nɛ ɛdii mɛkana menek, da nyɛ ɛ́ laa yɛ. 5 Tin, wɔ gwaa paa ngɔt zɛke nɛ nam náá: «Sa wɔ ààdje. Beea: Boo ghee bot ɛ mbyak eYuda, dha ɛ mɛkoozi Dhavid, nyɛ eekwak, nyɛ ɛ́ di egoka nɛ ɛdii mɛkana mɛ tsik nɛ ɛkɔ mɛtuŋa mɛtɛn nɛ ebá binek.» 6 Bhii tak, mɛ eezɛbee Mɔn bhata ngɔt tetel é ngwoob bóó mɛkoozi, kuku ɛbwak ɛ edjema ená di nɛ tsik ɔ, zɛnɔɔ bɛpaa. Mɔn bhata tak nadi ɛ́ tyee tit nagóaa étɛp buwa ɔ. Nyɛ nadi ɛ́ nɛ melak mɛtɛn nɛ ebá, nɛ mis mɛtɛn nɛ ebá. Mis mɛtɛn nɛ ebá binek lyaal ɛ, esisim etɛn nɛ ebá yii Zɛɛb nazedhis kɔ ɛko ɛ bɔs djas ɛ. 7 Wɔ gwaa, Mɔn bhata zɛtiila étɛp ɛzɛnɔɔ mɛkana nadi tɔ mbɔ eghɛŋ mot nadi ndiindel kɔ bóó mɛkoozi ɔ. 8 É ghɛŋ nyɛ nanɔɔ mɛkana ɛ, wɔ gwaa edjema ená di nɛ tsik ɔ, nɛ bɛpaa mɛkam-mɛmbá nɛ ená (24) zokazɛghaaga si, sok bhwoob Mɔn bhata. Mot nɛ mot nabɛ ɛ́ nɛ sandjo é mbɔ, nɛ ebɛɛlɛ nasaaa nɛ lɔɔd ɛ tɔɔɔ nɛ epu e ele na mbɛɛ mɛnuub di edikaa ɛ. Epu e ele na mbɛɛ mɛnuub yenek lyaal ɛ́ mendjaala mɛ bot ɛ na dɛɛ. 9 Tin, bɛ nadi etii djeeb na bes:

«Wɔ goka ɛ́ nɛ ɛnɔɔ mɛkana,

da wɔ ɛ́ kɔ mɛtuŋa nabɛkaa luk kɔ tak ɛ.

Etɛɛ náá, wɔ naagóaa tyee buwa, nɛ ghiya yɔ,

wɔ eepɛk bot étɛp Zɛɛb,

bot djas, membyak djas, elii djas, nɛ mɛdhik djas.

10 Wɔ eesa náá, bɛ di ɛyoŋ ɛ bɛghaa-Zɛɛb étɛp ɛsa mɛsa mɛ Zɛɛb'enaka,

bɛ waakɔk kɔ ɛko ɛ bɔs djas.»

11 Mɛ nabaadi ɛ́ mɛ dinaa egwyák, wɔ gwaa, mɛ zɛgwak bhyeed mɛdhuu mɛ efofop: Ye nabɛ ɛ́ efofop mɛdhuu-mɛdhuu ààbɛ nɛ dáa laa. Bɛ nadi ɛ́ é mengwoob mɛ bóó mɛkoozi, nɛ edjema ená di nɛ tsik ɔ, nɛ bɛpaa tsii boma. 12 Bɛ nadi etsim ɛlyelɛpe náá:

«Mɔn bhata nagóaa étɛp buwa ɔ,

nyɛ ɛ́ di egoka nɛ ɛbela,

mɛbwala, nɛ mɛvu, nɛ etsoŋ,

nɛ ghwyil, duu, nɛ duma, nɛ mɛdjeeb!»

13 Mɛ naabaagwak esa djas nakusaa di pɛ tɔ gwoo ɛ, nɛ esa ee di kɔ bɔs ɛ, nɛ esa di si bɔs ɛ, nɛ yii di tɔ eboo mɛdhii mɛ mɛsɔn ɛ, esa e bhwak djas nadi edjeeb náá:

«Nɛ mot di ndiindel kɔ bóó mɛkoozi ɔ, dɔɔ nɛ Mɔn bhata,

beta náá, mɛdjeeb, nɛ duu, nɛ duma, nɛ mɛbwala di nɛ nɛ kɔm-kɔm sii nɛ kɔm!»

14 Tin wɔ gwaa, edjema ená di nɛ tsik ɔ, zɛbɔɔza: «Amɛn!» É di'enek, bɛpaa eezɛghaaga, da kwyit mɛboŋ si, étɛp ɛduwal ɛ Mɔn bhata.