1 Bhii tak, mɛ eezɛbee dhiiti fofop edus tɔ gwoo, esul pɛ si. Nyɛ nabɛ ɛ́ nɛ boo ghwyil, tin, duma yɛ nadi edjɛ mɛkas kɔ bɔs djas. 2 Nyɛ naazɛtsim nɛ mɛghaaz djas: «Yɛ eewyɛɛza, yɛ eewyɛɛza, boo Bhabhilɔn eewyɛɛza! Nenak, ye moo ɛ́ di embee esisim di ɔ. Ye moo ɛ́ mɔɔ kyee di esisim edhuud djas di ekɛsɔwa ɔ. Ye moo ɛ́ pɛ kyee enen nɛ bɛtit ɛ di nɛ edhuud di ààdjɛ gwyes ɛbee ɔ, di ɔ. 3 Membyak djas di kɔ ɛko ɛ bɔs ɛ naadɛ mɛnyok mɛ vin mɛ gwam-gwam mɛzɔ mɛ. Bɛmɛkoozi mɛ bɔs'ak naazɛso nyel tɔ mɛzɔ bɛ nɛ nɛ. Tin, bot ɛ di ebɔmsa esonok kɔ ɛko bɔs'ak ɔ naazɛvu kɔ ɛsu ɛ kwyɛl nyɛ nadi nɛ yɛ nɛ esa e ghoŋ dhaa nyel ɛ.»

4 Bhii tak, mɛ eebaagwak dhiiti gwood nadi edus pɛ tɔ gwoo, eke náá: «Wyiska tɔ lɛ, bot ɛ mbyak'am, bi ɛzɛkɛbeeaa dáa bot ɛ di sama nɛ nɛ tɔ mesyem mɛ ɔ, etɛɛ náá, bi needi ààbee eboo egum ee nyɛ aaboma nɛ yɛ ɛ. 5 Etɛɛ náá, mesyem mɛ ɛpedyeebabu yak kɔ yii, batakɛkum pɛ tɔ gwoo. Deenek, Zɛɛb ààpadjisa embee mɛsa mɛ. 6 Saka nyɛ dáa nyɛ nasa nɛ bɛdhiiti bot ɛ, nyɛ goka ɛ́ nɛ ɛboma nɛ yɛ tyee esok ebá nɛ dáa nyɛ nasa nɛ bot ɛ. Lwoodalka mɔɔ buku yɛ nɛ mɛnyok mɛ di enyan dhaa yii nyɛ nadjɛ nɛ bɛdhiiti bot ɛ. 7 Nyɛ naadyeebakwyɛl duma nɛ mɛvu. Deenek, zukeka nyɛ nɛ boo mezuk nɛ mɛsyee. Tin, nyɛ nadi eke nyɛ ɛmet náá: "Mɛ ɛ́ wak ɛ́ dáa moma mɛkoozi, mɛ tok kus moma, mɛ aanàkwaabɔt ɛpum." 8 Dum nɛ tɛp tak ɛ, egum djas nazenɛɛgaa étɛp'ɛ, yɛ waasoaa nyɛ é nyel é dwoo wat: Ɛbɛ́ di gó bot ɛ, ɛsyee nɛ pwom edee. Nyɛ aagóaa ɛ́ nɛ du; etɛɛ náá, yɛ ɛ́ Ghɛŋ Zɛɛb mot mɛbwala ɛ pɛ́ɛ nyɛ.» 9 Bɛmɛkoozi mɛ bɔs'ak, bot ɛ nasɛɛga goŋ nɛ nɛ, nɛ ɛmyaala nɛ esa e ghoŋ bɛ ɔ, bɛ waadje mɛgwyɛ, bɛ waakɛl mɛmbɔ kɔ elo, é sok bɛ aabee eguluk ebyet pɛ ɛko ɛ ghaada bɛ dik ɛ. 10 Bɛ waatyaa ɛtsetaɛpe étɛp ɛkaab boo mezuk ghaada aaboma nɛ yɛ ɛ. Tin, bɛ waadi eke náá: «Haaa mezuk! Haaa mezuk! Ooo Bhabhilɔn, boo ghaada nɛ mɛbwala! Ɛwala wat eedjala, etɛɛ náá, wɔ neeboma nɛ yɔ feŋ!»

11 Bot ɛ mɛbom nadi kɔ bɔs ɔ, naabaadje nɛ ɛkɛl mɛmbɔ kɔ elo kɔ ɛsu ɛ lɛ. Etɛɛ náá, ye tokapɛ nɛ mot aakabaabom esa e mɛbom mɔɔ: 12 Ɛkok ɛ lɔɔd, ɛkok ɛ́ bɛ di esa epata nɛ yɛ ɛ, mɛkok mɛ mɛtaŋ, mɛyaka, nɛ ekaad di djóoaa lɛn ɛ, embɛɛ ekaad na tɔɔbelaa zɛnɔɔ ekaad di djóoaa swa ɛ, membi mɛ ele di ààbelaa mbɛs ɛ, membi mɛ esa djas nasael nɛ mɛdjɛ mɛ bɛzok ɛ nɛ ele e mɛtaŋ, esa ee nasael nɛ ghwooz na tɔɔbelaa di djóoaa blɔɔz ɛ, nɛ eghwooz nɛghu nɛ mbɛɛ mɛkok, 13 nadjeebe, nɛ edhiiti esa ee di ekoobelaa edee nɛ yɛ ɛ, nɛ bɛmɛnanas, nɛ mbi mɛnanas di edjóoaa miid ɛ, zɛnɔɔ epu ele na mbɛɛ mɛnuub di edikaa ɛ, bɛmɛnyok mɛ vin, mul, faalin, embɛɛ mɛbhek, engombɛ nɛ ebhata, eyaaga nɛ embem e yaaga, ekwom nɛ bot ɛ membok. 14 Bot ɛ mɛbom ke nɛ ghaada ɛ́ náá: «Membi mɛ esa djas wɔ nadi nɛ gwyes tak ɛ, moo ɛ́ ààkabɛ pɛ daa lɔ, mɛvu djas nɛ esa bɔ yii ghoŋ djas tokapɛ, tin, bot aanàkwaakobaabee yɛ!» 15 Bot ɛ mɛbom mɛ nazevu kɔ ɛsu ɛ esa e mɛbom yii bɛ nadi ebɔmsa pɛ tɔ ghaada tak ɛ, bɛ waatyaa ɛtsetaɛpe, ekaab feŋ di náá, yɛ ɛ́ yɔbɔ ɛ. Bɛ waadje nɛ ɛkɛl mɛmbɔ kɔ elo. 16 Tin, bɛ waadi eke: «Haaa mezuk! Haaa mezuk nɛ boo ghaada! Nyɛ nabebɔt ɛ́ ekaad ee di edjóoaa lɛn ɛ, nɛ embɛɛ ekaad na tɔɔbelaa, nyel'ɛ nadi ɛ́ dipela nɛ mɛvunga mɛ lɔɔd, mɛkok mɛ mɛtaŋ zɛnɔɔ bɛmɛyaka. 17 Tin, tɔ mɔɔ ɛwala wat, mɛvu menek djas tokapɛ!»

Ekomanda mɛsuwa, nɛ bot di etɔ́ mɛdjoŋ tɔ tak ɔ, nɛ bot ɛ di esa mɛsa pɛ tɔ boo dii mɛsɔn ɔ, zɛnɔɔ bot djas di ebela efute tɔ mɛsa tɔ boo dii mɛsɔn ɔ, bɔɔ djas nadi ɛ́ ɛtsetaɛpe. 18 Bɛ naazɛtsim é sok bɛ nabee eguluk e ghaada bɛ nadik ɛ: «Ye tok nɛ dhiiti ghaada dáa boo ghaada yak!» 19 Tin, bɛ nadi eso piib kɔ elo, bɛ nadi edje, elɛka, etsim náá: «Haaa mezuk, haaa mezuk nɛ boo ghaada! Yɛ ɛ́ dum nɛ ekuma bɛ ɛ, bot djas nadi nɛ bɛmɛsuwa kɔ boo dii mɛsɔn ɔ navu. Tin, ɛwala wat eedjala, étɛp mɛvu menek djas neediib!»

20 Gwoo, myaala nɛ dáa ghaada di ewaazel ɛ! Bot ɛ zedum koŋ nɛ Zɛɛb ɔ, bot ɛ lwoma nɛ bɛngoolel ɛ Mɛkpa ɛ Zɛɛb myaalaka. Etɛɛ náá, Zɛɛb eepɛ́ɛ ghaada dum nɛ mɛsa mɛ nyɛ nasa ɛ!

21 Wɔ gwaa, dhiiti fofop na mɛbwala zɛnɔɔ boo ɛkok dáa ɛkok ɛ bɛ di esii bhum ble nɛ yɛ ɛ, mwas tɔ boo dii mɛsɔn, eke náá: «Yɛ ɛ́ deenek ɛ́ boo ghaada Bhabhilɔn aamwasaa nɛ bhel djas, tin, bot aanàkabaabee yɛ! 22 Bot aanàkabaagwak ebwoma e bot ɛ di ebwom ngɔmbi, elɔɔ toŋ, etii mɛdjeeb ɔ pɛ daa lɔ. Tin, bot ɛ́ aanàkabaabela membi mɛ bot djas di esa mɛsa mɛ mɛmbɔ ɛ, bot aanàkabaagwak ɛtap ɛ ɛkok ɛ di esiiaa ebhum e ble nɛ yɛ ɛ. 23 Mɛkas mɛ elama aanàkabaadi pɛ yɔ, bot aanàkabaagwak bhyeed mengbaaz nɛ mɛsyes di náá, bɛ aalóo nɛ ɛbá ɔ. Étɛp tak ɛ di náá, bot ɛ nadi ebɔmsa esa ɔ, bɔɔ ɛ nadi bɛghɛŋ kɔ bɔs, mɛsimba mɔ naakɔɔ bot ɛ bɔs djas.»

24 Yɛ ɛ́ kɔ ghaada Bhabhilɔn ɛ ghiya bɛngoolel ɛ Mɛkpa ɛ Zɛɛb nɛ yii bot ɛ zedum koŋ nɛ Zɛɛb ɔ nasee, ghiya bot djas nagóaa kɔ ɛko ɛ bɔs ɔ, naasee.