1 Tin, mɛ eezɛbee gwoo na bes nɛ bɔs na bes. É di'enek, gwoo nadi é mɛkɛn nɛ bɔs nadi é mɛkɛn ɛ́ naadiib, boo dii mɛsɔn nabɛ ɛ́ ààkabaadi tak. 2 Bhii tak, mɛ eezɛbee ghaada na dɛɛ, Yeluzalɛm na bes yii Zɛɛb nadhis ɛ, edus pɛ tɔ gwoo. Ye nabɛ ɛ́ ye moo babeega dáa moma zekomsa étɛp nyɛ neekɛboma nɛ ngom'ɛ ɛ. 3 Mɛ naagwak dhiiti lyel-lyel gwood edus pɛ kyee bóó mɛkoozi: «Nenak, pɛt ɛbhɛŋ ɛ Zɛɛb moo ɛ́ é di wat nɛ bot! Nyɛ aakadidi ɛ́ sama wat nɛ nɔɔ, deenek, bɛ aakadi ɛ́ bot bɛ. Tin, Zɛɛb nyɛy ɛmet aadi ɛ́ sama nɛ nɔɔ, nyɛ aadi ɛ́ Zɛɛb'ɔɔ. 4 Nyɛ waasuŋal miŋal mis mɔɔ djas. Ɛsyee aanàkabaadi tak, pil aanàkabaadi, ààbɛ nɛ elɛka, ààbɛ nɛ mezuk. Deenek, esa e na mwa djas aanàkabaadi tak.»

5 É di'enek, mot di ndiidel kɔ bóó mɛkoozi ɔ naake: «Nenak yak, mɛ ɛpekus esa e na bes.» Bhii tak, nyɛ eezɛke: «Kwyala dáak, etɛɛ náá, mɛkpa mak ɛ́ etsɛɛtsɛ, ye goka ɛ́ nɛ ɛwaaa ɛbwaalel é tak.»

6 Nyɛ eebaazɛke: «Yɛ eezesael! Mɛ ɛ́ Alfa nɛ Omegha, mɛkɛn nɛ mɛsik. Mot ɛ di nɛ gwyes mɛdii ɔɔ, mɛ aadjɛ nyɛ mɛdii di edus tɔ sɔɔgɔ di edjɛ tsik ɛ, ààbwaal dhiiti sonok nɛ nɛ. 7 Nɛ mot aakwak ɔɔ, mɛ waadjɛ nyɛ esa e lyak binek. Mɛ aadi ɛ́ Zɛɛb'ɛ, nyɛy kadi ɛ́ mɔn'am. 8 Yɛ kabɛ bɛtsak-bel ɔɔ, bot ɛ di ààkɛ tɔ esosoob ɔ, bot ɛ di egó bot ɔ, bot ɛ di ekus ɛzɛm ɔ, bot ɛ mɛzɔ, bot ɛ mɛlyeeb, bot ɛ di eduwal bɛnaghisɛ ɔ, nɛ bot ɛ etsal djas, bɛ waamwasaa tɔ boo tok du di nɛ mɛsii mɛ na goo-goo, yɛ ɛ́ di ɛsyee yii bhɔɔba.»

9 Fofof ngɔt tɔ efofop etɛn nɛ bɛbá, nadi nɛ ebuku etɛn nɛ ebá lwoodela nɛ egum e mɛsik ɔ, nyɛ eezɛke nɛ nam: «Dha, mɛ aalyaal wɔ dhɛɛga, mwaa Mɔn bhata.»

10 Sisim naazɛmɛt mɛ. Wɔ gwaa, fofop zɛtɔ́ nɛ nam kɔ dwol dhiiti boo ɛtsok ɛ na vyɛɛg-vyɛɛg. Nyɛ naatel mɛ ghaada na dɛɛ, yɛ ɛ́ Yeluzalɛm nadi edus pɛ tɔ gwoo, yii Zɛɛb nadhis ɛ, 11 ye nadi ɛ́ nɛ duma ɛ Zɛɛb. Ɛkas ɛ ghaada tak nadi enɔŋel ɛ́ nɛ ɛkok ɛ mɛtaŋ di edjóoaa yaspɛ ɛ, djhaaz-djhaaz dáa ɛkok ɛ mɛtaadak. 12 Ghaada tak nabɛ ɛ́ tɔ boo peeb, nɛ mɛniel kam nɛ ebá, ɛniel nɛ ɛniel nadi ɛ́ nɛ fofop ngɔt ebaal yɛ. Deenek, kɔ mɛniel mɛ tak, ye naakwyalaa min mɛ membyak kam nɛ ebá bot ɛ kyee dik Yisalaɛl. 13 Deenek, é epap e epeeb tak, ye nabɛ ɛ́ nɛ mɛniel mɛlɛl-mɛlɛl. Pɛ ɛdjem ɛ dwoo elɛl, pɛ ɛsila dwoo elɛl, pɛ ɛko ɛ bɔs elɛl, pɛ kyɛ ɛbil ɛ dwoo elɛl. 14 Epap e epeeb ghaada tak, nasumaa ɛ́ pɛ kɔ mɛkok kam nɛ ebá, kɔ mɛkok mɛ tak, ye nadi ɛ́ nɛ ekwyala e min mɛ bot ɛ lwoma kam nɛ bɛbá ɛ Mɔn bhata.

15 Fofop nadi elii nɛ nam ɔ, nyɛ nabɛ ɛ́ nɛ mɔɔ le ghwaazok nasael nɛ lɔɔd ɛ é mbɔ. Mɛsa mɛ mɔɔ le tak nabɛ ɛ́, étɛp ɛgek mɛdjaa mɛ ghaada, epap nɛ mɛniel mɛ tak. 16 Mɛdjaa mɛ epap e ghaada tak djas nadi ɛ́ djala. Tin, fofop nagek ghaada ɛ́ nɛ le ghwaazok'ɛ: Mɛdjaa mɛ tak nabɛ ɛ́, ekilomɛtɛlɛ bɛmil ɛbá nɛ bɛdhet-ɛbá (2 200), mɛbɔk mɛ tak nabɛ ɛ́ ekilomɛtɛlɛ bɛmil ɛbá nɛ bɛdhet-ɛbá (2 200), mɛvyɛɛg mɛ tak nabɛ ɛ́ ekilomɛtɛlɛ bɛmil ɛbá nɛ bɛdhet-ɛbá (2 200). 17 Fofop naazɛgek mɛpip mɛ pap, ye nabɛ ɛ́ emɛtɛlɛ mɛkam-mɛtɛn nɛ wat nɛ etɛn (65). Nyɛ nagek yɛ ɛ, dáa bot di ezyɛ nɛ ɛgek sok ɛ. 18 Tin, peeb nasumaa ɛ́ nɛ mɛkok mɛ mɛtaŋ di edjóoaa yaspɛ ɛ. Ghaada nyɛy nyɛ ɛmet nakasumaa ɛ́ nɛ tɛtɛ lɔɔd di ààpuuza nɛ dhiiti sonok ɛ, ɛdjhaazɛpe dáa mɛtaadak. 19 Ghus-zumal epap e ghaada tak nasɔnaa ɛ́ nɛ membi mɛ mɛkok mɛ mɛtaŋ djas. Yii ghus-zumal mɛkɛn nabɛ ɛ́ nɛ mɛkok mɛ mɛtaŋ di edjóoaa yaspɛ ɛ, yii bhɔɔba nabɛ ɛ́ nɛ mɛkok mɛ mɛtaŋ di edjóoaa safiid ɛ, yii elɛl nabɛ ɛ́ nɛ mɛkok mɛ mɛtaŋ di edjóoaa aghat ɛ, yii ená nabɛ ɛ́ nɛ mɛkok mɛ mɛtaŋ di edjóoaa emelood ɛ. 20 Yii etɛn nɛ mɛkok mɛ mɛtaŋ di edjóoaa oniks ɛ, yii etɛn nɛ wat nɛ mɛkok mɛ mɛtaŋ di edjóoaa saaldwan ɛ, yii etɛn nɛ ebá nɛ mɛkok mɛ mɛtaŋ di edjóoaa kiizolit ɛ, yii etɛn nɛ elɛl nɛ mɛkok mɛ mɛtaŋ di edjóoaa beelil ɛ, yii etɛn nɛ ená nɛ mɛkok mɛ mɛtaŋ di edjóoaa topaaz ɛ, yii kam nɛ mɛkok mɛ mɛtaŋ di edjóoaa kiizopaalas ɛ, yii kam nɛ wat nɛ mɛkok mɛ mɛtaŋ di edjóoaa tulkwaaz ɛ, yii kam nɛ ebá nɛ mɛkok mɛ mɛtaŋ di edjóoaa amɛtis ɛ. 21 Mɛniel kam nɛ ebá binek nabɛ ɛ́, bɛmɛyaka kam nɛ ebá. Ɛniel nɛ ɛniel nasael ɛ́ nɛ mɛyaka wat. Di bot djas di esɛɛga tɔ boo ghaada ɔ, ye nasael ɛ́ nɛ tɛtɛ lɔɔd di ààpuuza nɛ dhiiti sonok ɛ, ɛdjhaazɛpe dáa mɛtaadak.

22 Mɛ nabɛ ɛ́ ààbee ndjaa-Zɛɛb tɔ ghaada tak, etɛɛ náá, Di na Dɛɛ ghaada tak ɛ́ Ghɛŋ, Zɛɛb Mɛkaake dɔɔ nɛ Mɔn bhata. 23 Ghaada tak tok nɛ mɛkas mɛ gwyes nɛghu mɛkas mɛ ngɔn, etɛɛ náá, duma Zɛɛb nadi ekas, Mɔn bhata ɛ́ di lama yɛ. 24 Bot ɛ mɛdhik ɛ́ waakɛ si mɛkas mɛ, bɛmɛkoozi mɛ bɔs ɛ́ waazyɛ nɛ ekum bɔɔ. 25 Tin, mɛniel mɛ ghaada aadi ɛ́ mbek tu dwoo. Deenek, yɛ aanàkabaadiyalaa etɛɛ náá, ɛgwyitok aanàbaagwyiidela. 26 Bɛ waazyɛ nɛ duma nɛ duu mɛvu mɛ bot ɛ mɛdhik mɛ sis. 27 Deenek, ye tok nɛ sa wat edhuud aani tɔ ghaada tak, ààkobɛ-bɛak bot ɛ di nɛ embee mɛsa ɔ nɛghu bot ɛ etsal. É di'enek, bot aani tɔ ghaada tak ɔ, yɛ aadi ɛ́ bot ɛ min mɔɔ di kwyala tɔ mɛkana mɛ tsik ɛ Mɔn bhata ɔ.