1 «Kwyala fofop zɛɛga mendjaala ghaada Saaldɛs mɛkana náá:

Mot di nɛ esisim etɛn nɛ ebá e Zɛɛb, nɛ ekwyikwyen etɛn nɛ ebá ɔ, lɛɛ ɛ́: Mɛ nɛ gu mɛsa mɔ, mɛ nɛ gu náá, wɔ ɛ́ nɛ dék dáa mot di nɛ tsik ɔ, ghuna wɔ eezegwyɛ. 2 Dia ndjem, djɛa mɛghaaz nɛ sa lik tɔ lɔ ɛ, yɛ ɛ́ zɛkɛgwyɛ. Etɛɛ náá, mɛ eebee náá, wɔ tok nɛ embɛɛ mɛsa mɛ di ɛnyɔɛpe é mis ɛ Zɛɛb'am ɛ. 3 Taala mɛlyo mɛ wɔ nazebela ɛ, nɛ tyee wɔ nazegwak ɛ. Dia sosoob nɛ yɛ, da wɔ ɛ́ swoola mɛfulu mɔ. Tin, wɔ di ààdi ndjem ɔɔ, wɔ aasɛka mɛ pɛ daa lɔ ɛ́ zaka dáa mot djii, wɔ àànakwaagu ɛwala ɛ mɛ aatuula ɛ. 4 É di'enek, yɛ ɛ́ nɛ bɛdhiiti bɔn-nyoog pɛ ghaada Saaldɛs di náá, bɛ ààpasa náá, ekaad bɔɔ ni mendi ɛ. É di'enek, bɛ ɛ́ bot ɛ di egoka nɛ ɛbɔt ɛ ekaad e na puu, étɛp bɛ neekɛ lɔɔg sama nɛ nam ɛ.

5 Tin, nɛ mot aakwak ɔɔ, nyɛ waabɔt ekaad e na puu. É di'enek, mɛ aanàkwaadis din ɛ lɛ tɔ mɛkana mɛ tsik, mɛ waamyaal é mis ɛ Saagam, nɛ é mis ɛ efofop náá, nyɛ ɛ́ ngbam.

6 Beta náá, mot ɛ di nɛ mɛlɔ mɛ ɛgwak ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!»

7 «Kwyala fofop zɛɛga mendjaala ghaada Filadhɛlfi mɛkana náá:

Mot edɛɛ, mot etsɛɛtsɛ lɛɛ ɛ́: nyɛ ɛ́ mot di nɛ sap ɛ mɛkoozi Dhavid ɔ, é ghɛŋ nyɛ di edii ɛbɛ ɛ ndjaŋ ɛ, ye tok nɛ mot di nɛ ghwyil ɛdiyal yɛ, é ghɛŋ nyɛ di ediyal yɛ ɛ, ye tok nɛ mot di nɛ ghwyil ɛdii yɛ: 8 Mɛ nɛ gu mɛsa mɔ, sok bhwoob'ɔ mɛ eedii ɛbɛ ɛ ndjaa di náá, dhiiti mot tok nɛ ghwyil ɛdiyal ɛ. Etɛɛ náá, wɔ tok nɛ ghwyil ɛbuɛpe, é di'enek, wɔ eelooba nɛ mɛkpa mam, wɔ ààpaswonal mɛ. 9 Beea sa mɛ aasa nɛ bot ɛ zɛɛga mendjaala ɛ Satan ɛ, bot ɛ di ekɔɔ bot náá, bɛ ɛ́ bot ɛ mbyak eYuda, ghuna bɛ tok bot ɛ mbyak eYuda ɔ: Mɛ waapus bɛ nɛ bhel náá, bɛ zɛkwyit mɛboŋ si mɛko mɔ étɛp bɛ neegu náá, mɛ nɛ kwyɛl wɔ. 10 Dáa ye di náá, wɔ eelooba nɛ ɛtiŋ ɛ lam yii ɛdi ɛ nɛ zii ɛ, mam pe ɛ́ waabaal wɔ é ghɛŋ mezuk aazyɛ kɔ ɛko ɛ bɔs étɛp ɛwa bot tɔ mɛbhowal ɛ. 11 Mɛ moo aazyɛ, baala sa wɔ di nɛ yɛ ɛ ɛnyɔɛpe, etɛɛ náá, mot needi ààdɛk kɔtɔ duu yɔ.

12 Nɛ mot aakwak ɔɔ, mɛ waasa náá, nyɛ di ɛgwyiŋ tɔ ndjaa-Zɛɛb'am, nyɛ aanàbaawyis tinaak. Mɛ waakwyal din ɛ Zɛɛb'am kɔ lɛ, dɔɔ nɛ din ɛ ghaada Zɛɛb'am, Yeluzalɛm na bes di edus pɛ tɔ gwoo pɛ daa Zɛɛb'am ɛ. Mɛ waakwyal dɔɔ nɛ din ɛ lam na bes pɛ kɔ lɛ.

13 Beta náá, mot di nɛ mɛlɔ mɛ ɛgwak ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!»

14 «Kwyala fofop zɛɛga mendjaala ghaada Laodhise mɛkana náá:

Mot di edjóoaa Amɛn ɔ, sosoob tyaasɛs ɔ, etsɛɛtsɛ ɔ, mot mɛkɛn kɔ esa ee Zɛɛb nakus kɔ bhwak ɔ, lɛɛ ɛ: 15 Mɛ nɛ gu mɛsa mɔ, mɛ nɛ gu náá, wɔ ààtela, wɔ ààgoo pe. Ye waagoka ɛ́ náá, wɔ di tɔ mɛgoo nɛghu tɔ mɛtela! 16 Tin, dáa ye di náá, wɔ ààgoo, wɔ ààtela ɛ, dáa wɔ di pak mɛgoo nɛ mɛtela ɛ, mɛ waagó wɔ dáa mot di egó dhoo ɛ. 17 Wɔ ke ɛ́ náá: "Mɛ ɛ́ kum mot, mɛ moo ɛ́ nɛ bɛtɛ nɛ mɛvu, mɛ tok tɔ ɛsɛɛga ɛ dhiiti sonok." É di'enek, wɔ ààgu mbi mot mezuk, mot mɛbɔs, djel mot, mot edhim, mot eduuba wɔ di ɛ. 18 Dum nɛ tɛp tak ɛ mɛ di edjɛ wɔ mɛlyo náá, wɔ bɔm pɛ daa lam tɛtɛ lɔɔd di náá, yɛ eezedisaa mendi nɛ du ɛ. Yɛ ɛ́ deenek ɛ wɔ aadi tɛtɛ kum mot. Da wɔ ɛ́ baabɔm ekaad e na puu, étɛp ɛsyel nyel'ɔ, étɛp wɔ needi ààbɛ nɛ sen ɛdi ɛ́ ben toto. Wɔ ɛ́ bɔm dɔɔ nɛ met mɛ ɛgwom ɛ mis mɔ étɛp, wɔ neenyaasok. 19 Mɛ nɛ biyo nɛ bot ɛ mɛ di ekwyɛl ɔ, mɛ nɛ wa bɛ é feŋ. Tin, dia nɛ zii tɔ mɛsa, da wɔ ɛ́ swoola mɛfulu. 20 Gwaka, mɛ eetyaa é ɛbɛ ɛ ndjaa, mɛ ɛpediig. Mot ɛ gwak gwood'am, da nyɛ ɛ́ dii ɛbɛ ɛ ndjaŋ'ɛ ɔɔ, mɛ waani tɔ ndjaŋ'ɛ. Tin, mɛ waadɛ edee é di wat bis nɛ nɛ, nyɛy nɛ nam.

21 É di'enek, nɛ mot aakwak ɔɔ, mɛ waasa náá, nyɛ di sama nɛ nam kɔ bóó mɛkoozi mam. Yɛ ɛ́ dáa mam, mɛ eekwak, bhii tak, mɛ eebe di sama nɛ Saagam kɔ bóó mɛkoozi mɛ.

22 Beta náá, mot ɛ di nɛ mɛlɔ mɛ ɛgwak ɔɔ, nyɛ gwak, sa Sisim di elɛɛ nɛ ezɛɛga mendjaala ɛ!»