1 Fofop ngɔt tɔ efofop etɛn nɛ ebá nadi nɛ bɔɔ ebuku etɛn nɛ ebá é mɛmbɔ ɔ, naazyɛ zɛlɛɛ mɛ náá: «Dha, mɛ tel wɔ feŋ moma na ghaa-mɛzɔ aabela ɛ, yɛ ɛ́ boo ghaada di suma é ngwoob bɛtɛ nɛ boo mɛdhii ɛ. 2 Bɛmɛkoozi mɛ bɔs'ak naaso mɛnyel tɔ mɛzɔ bɛ nɛ moma tak, bot ɛ bɔs nabɛ ɛ́, bɛ moo tɔ elangi e mɛnyok mɛ vin mɛ mɛzɔ mɛ.»

3 Tin, Sisim naazɛmɛt mɛ, wɔ gwaa, fofop zɛnɔɔ mɛ tɔ́ nɛ nam pɛ kyee dik bɛsyɛ di ààbɛ nɛ mɛdii ɛ. É di'enek, mɛ naazɛbee dhiiti moma ndiidel kɔ tit na zoooŋ. Nyel'ɛ nadi ɛ́ kpeeeŋ nɛ ekwyala e min mɛ di enyek Zɛɛb ɛ. Tit tak nadi ɛ́ nɛ elo etɛn nɛ ebá, zɛnɔɔ melak kam. 4 Moma tak nabɔt ɛ́ ekaad e ghoŋ na zoooŋ, nyɛ nadi ɛ́ nɛ mɛvunga, nɛ mɛsum mɛ nasael nɛ lɔɔd ɛ, nɛ mɛkok e mɛtaŋ zɛnɔɔ bɛmɛyaka. É mbɔ'ɛ, nyɛ namɛt ɛ́ mɔɔ buku nasael nɛ lɔɔd ɛ tɔɔɔ nɛ embee esesɛɛ, nɛ edhuud e mɛzɔ mɛ nyɛ di esa ɛ. 5 Tin, bhata-bhwoob'ɛ nabɛ ɛ́ nɛ kwyala din. Sa nadi syela tɔ din ɛ tak nabɛ ɛ́: «Boo ghaada Bhabhilɔn ɛ́ nyɛɛg boa mɛzɔ nɛ embee esesɛɛ ee di esael kɔ bɔs djas ɛ.» 6 Mɛ naabee náá, moma mɛzɔ tak nadi ɛ́, tɔ elangi e ghiya bot ɛ zedum koŋ nɛ Zɛɛb ɔ, nɛ ghiya bot ɛ nazegóaa kɔ ɛsu ɛ esosoob bɔɔ nɛ Yezu ɔ.

Beea mɛ nabee nyɛ ɛ, mɛ naadyeebadjoka ɛbuɛpe. 7 Tin, fofop eezɛke nɛ nam náá: «Étɛp yé wɔ di edjoka? Mɛ waatel wɔ etɛp ee di syela dum nɛ moma yak, nɛ tit di ebɛp nyɛ yenɔk, mot di nɛ elo etɛn nɛ ebá, nɛ melak kam yenɔk. 8 Tit wɔ di ebee yenɔk nadi ɛ́ nɛ tsik, nenak yak, nyɛ tokapɛ nɛ tsik. Nyɛ goka ɛ́ nɛ ɛwyis tɔ boo guk na dim-dim di ààbɛ nɛ ɛsik ɔ, tin, nyɛ waagóaa nɛ tsɛɛtsɛ. Bot ɛ di náá, min mɔɔ tok kwyala tɔ mɛkana mɛ tsik kana bhwak nɛ ɛkusel ɔ, bɛ waadjoka beea bɛ aabee tit ɛ. Etɛɛ náá, nyɛ nadi sok ɛ́ nɛ tsik, nenak nyɛ eezegwyɛ, tin, nyɛ waabaatuula.

9 Wak, ye goka ɛ́ mot di nɛ mɛtselal nɛ etsoŋ. Elo etɛn nɛ ebá binek ɛ́ mɛtsok mɛtɛn nɛ ebá yii moma yenɔk di ndiidel kɔ tak ɛ. Ye baalyaal ɛ́ bɛmɛkoozi mɛtɛn nɛ ebá. 10 Pɛ tɔ bɛmɛkoozi mɛ tak, bɛtɛn naazegwyɛ. Nenak ngɔt ɛ́ kalik kɔ bóó mɛkoozi. Mot aadi mɛkoozi mɛ yii etɛn nɛ ebá ɔ, nyɛ dinaa ààpazyɛ. É sok nyɛ aazyɛ ɛ, nyɛ aanàkwaadyeebabɔya. 11 Tit nabɛ é ghɛŋ sok, kadi mos náá, nyɛ tokapɛ ɛ, nyɛy, nyɛ ɛmet ɛ di mɛkoozi mɛ etɛn nɛ elɛl. Nyɛ ɛ́ pe ɛ́ ngɔt tɔ sama bɛmɛkoozi mɛtɛn nɛ ebá, tin, nyɛ moo aagwyɛ.

12 Melak kam wɔ bee yenek, yɛ ɛ́ bɛmɛkoozi kam, bɛmɛkoozi mɛ tak dinaa ààpadilaa kɔ mɛbhóó mɛ mɛkoozi mɔɔ. Tin, bɛ waabela eghɛŋ ɛkɔk é ɛwala wat nɛ tit yenɔk. 13 Bɔɔ djas ɛ́ nɛ esiiza wat, bɛ ɛpedjɛ ghwyil nɛ mɛbwala mɔɔ nɛ tit. 14 Bɛ waaduu nɛ Mɔn bhata, tin, Mɔn bhata ɛ́ waakwak bɛ. Etɛɛ náá, nyɛ ɛ́ Ghɛŋ bɛghɛŋ, nyɛ ɛ́ Mɛkoozi mɛ bɛmɛkoozi. Deenek, nyɛ waakwak bɛ nɛ bot bɛ djas nyɛ nazedjóo nɛ ɛsɛ́ɛ ɔ, bot ɛ di sosoob nɛ nɛ ɔ.»

15 É di'enek, fofop eebaake nɛ nam: «Mɛdhii mɛ wɔ bee yenek, é di moma mɛzɔ di yenek, yɛ ɛ́ bot ɛ bɔs, yɛ ɛ́ mɛdhuu mɛ bot ɛ mɛdhik djas zɛnɔɔ elii djas. 16 Melak kam, nɛ tit wɔ bee ɛ, bɛ waabhina moma mɛzɔ. Bɛ waadjii nyɛ ekum djas, tin bɛ waanɛɛg nyɛ syɛɛɛ ààbɛ nɛ ekaad, bɛ waadɛ epuud bɛ, yii yɛ aabwak ɛ, bɛ waamwas yɛ tɔ du. 17 Etɛɛ náá, Zɛɛb naawa tɔ ebhum e lyem bɔɔ, egwyes ɛsa ɛkwosak ɛ lɛ. Tin, bɔɔ djas ɛ́ waagwakel náá, bɛ nɔɔ ghwyil nɛ ekukuma bɔɔ, da bɛ ɛ́ sa mɛsa mɛ tit nɛ yɛ, kɛkum ɛwala di náá, esa ee di kwyala tɔ mɛkana ɛ Zɛɛb aasael ɛ.

18 Deenek, moma wɔ bee'aak, yɛ ɛ́ boo ghaada di ekɔk kɔ bɛmɛkoozi mɛ bɔs ɔ.»