1 Bhii tak, mɛ eezɛbee dhiiti boo ndem sis tɔ gwoo, mɛ naadjoka. Ye nabɛ ɛ́, efofop etɛn nɛ ebá ɛ nazyɛ nɛ egum etɛn nɛ ebá. Yɛ ɛ́ egum mɛsik, etɛɛ náá, yɛ ɛ́ nɛ mezuk menek ɛ, ɛbuk ɛ Zɛɛb aadjala. 2 Bhii tak, mɛ eebaabee kwaambi dhiiti boo dii mɛsɔn edjhaazal dáa ɛkok ɛ mɛtaadak, boo dii tak ɛ́ puuza nɛ du. Tin, bot djas nakwak tit nɛ naghisɛ, nɛ ɛlɛɛga ɛ di elyaal din ɛ lɛ ɔ, bɛ nadi ɛ́ metetel é ngwoob boo dii mɛsɔn menek. Bɛ nadi ɛ́ nɛ engɔmbi ee Zɛɛb nadjɛ bɛ ɛ é mɛmbɔ. 3 Bɛ nadi etii djeeb ɛ Moiiz mot-mɛsa ɛ Zɛɛb, nɛ djeeb ɛ Mɔn bhata:

«Ghɛŋ Zɛɛb Mɛkaake,

mɛsa mɔ nɛ bɔk, ye nɛ nyɔ!

Wɔ ɛ́ Mɛkoozi mɛ membyak djas,

étɛp bɔ ɛ́ epiki nɛ etsɛɛtsɛ!

4 Ɛzɛ aakodi ààkaab wɔ Ghɛŋ?

Ɛzɛ aakopɛɛ ɛdjɛ wɔ duma?

Etɛɛ náá, yɛ ɛ́ wɔy, wɔ ɛmet ɛ di dɛɛ,

bot ɛ membyak djas ɛ́ aazyɛ zɛduwal wɔ,

etɛɛ náá, mɛsa mɛ epiki bɔ naazelyaalaa bɛ popoopwon.»

5 Bhii tak, mɛ eezɛbee Di na Dɛɛ di nɛ pɛt ɛbhɛŋ tɔ tak ɛ, ebɛŋel pɛ tɔ gwoo. 6 Deenek, efofop etɛn nɛ bɛbá ee nadi emɛt egum é mɛmbɔ ɔ naazɛwyis tɔ Di na Dɛɛ di pɛ tɔ gwoo ɛ. Bɛ naabɔt embɛɛ ekaad e na puu ekas dhaa tyɛ, nɛ embaab nasael nɛ lɔɔd ɛ, epɛta é kuu. 7 Ngɔt tɔ edjema ená di nɛ tsik ɔ naazɛdjɛ efofop etɛn nɛ bɛbá bɔɔ ebuku etɛn nɛ ebá nasael nɛ lɔɔd ɛ, tɔɔɔ nɛ ɛbuk ɛ Zɛɛb, nyɛy mot di nɛ tsik kɔm-kɔm sii nɛ kɔm ɔ. 8 Eguluk naalwood tɔ Di na Dɛɛ. Eguluk binek lyaal ɛ́ mɛbwala nɛ duma ɛ Zɛɛb. Ye nabɛ ɛ́ ààbɛ nɛ mot nadi nɛ ghwyil ɛni tɔ Di na Dɛɛ, kɛkum dwoo egum etɛn nɛ ebá yii efofop nazyɛ nɛ yɛ ɛ, aadjala ɛ.