1 Bhii tak, mɛ naazɛbee efofop ená metetel é etuma ená yii bɔs. Deenek, bɛ nadi esa náá, epup ee nadi edus pɛ edum e bɔs ɛ di ààpupal kɔ bɔs, ààpupal kɔ boo dii mɛsɔn, ààkodeeg-deegak le wat. 2 Bhii tak, mɛ naabee dhiiti fofop edus pɛ kyee ɛdjem ɛ dwoo. É mbɔ'ɛ, nyɛ nadi emɛt geka wat yii Zɛɛb, mot di nɛ tsik ɔ. Wɔ gwaa, nyɛ zɛbam ɛlyelɛpe nɛ efofop ená binɔk, bot ɛ Zɛɛb nadjɛ bɛ ghwyil étɛp ɛsa ɛbiyo kɔ bɔs nɛ tɔ boo dii mɛsɔn ɔ náá: 3 «Sa bi ààleesa sa ɛbiyo kɔ ɛko ɛ bɔs, nɛ tɔ boo dii mɛsɔn, nɛghu é le wat, ɛsok nɛ mena nɛ waka geka kɔ bhata-bhwoob bot ɛ mɛsa ɛ Zɛɛb'enaka.» 4 É di'enek, mɛ naazɛgwak mɛtaŋ mɛ bot ɛ nabela geka Zɛɛb é bhata-bhwoob'ɔɔ. Ye nabɛ ɛ́, bot bɛmil dhet nɛ bɛmil mɛkam-mɛná nɛ ɛná (144 000), tɔ bot ɛ membyak mɛ bɔn ɛ Yisalaɛl djas. 5 Tin, geka yenek nasaa ɛ́:

tɔ bot bɛmil-kam nɛ bɛmil ɛbá (12 000) tɔ bil dɛl ɛ Yuda,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Lubɛn,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Ghaad,

6 tɔ bot bɛmil-kam nɛ bɛmil ɛbá (12 000) tɔ bil dɛl ɛ Asɛɛd,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Nɛftali,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Manase,

7 tɔ bot bɛmil-kam nɛ bɛmil ɛbá (12 000) tɔ bil dɛl ɛ Simeyɔŋ,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Levi,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Isakaad,

8 tɔ bot bɛmil-kam nɛ bɛmil ɛbá (12 000) tɔ bil dɛl ɛ Zabulɔŋ,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Zozɛf,

tɔ bot bɛmil-kam nɛ bɛmil ɛbá (12 000) tɔ bil dɛl ɛ Bhɛzamɛ.

9 Bhii tak, mɛ naazɛbee zukamwaa nɛ mot, mɛtaŋ mɛ wat di náá, mot tok nɛ ghwyil ɛlaŋ ɛ. Ye nabɛ ɛ́, bot djas, membyak djas, elii djas, nɛ mɛdhik djas. Deenek, bɛ nadi ɛ́ metetel sok bóó mɛkoozi, sok bhwoob ɛ Mɔn bhata. Bɔɔ djas nabɔt ɛ́ elɔbɔ e na puu nɛ elɛɛ e mɛbhi é mɛmbɔ. 10 Bɛ nadi etsim ɛlyelɛpe: «Tsik dus ɛ́ pɛ daa Zɛɛb'enaka, mot di kɔ bóó mɛkoozi ɔ, nɛ Mɔn bhata!» 11 Efofop djas naadii bóó mɛkoozi, nɛ bɛpaa, zɛnɔɔ edjema ená di nɛ tsik ɔ. Bɛ naazɛkwyit mɛboŋ bhwoob si sok bóó mɛkoozi étɛp ɛduwal ɛ Zɛɛb. 12 Bɔɔ eke:

«Amɛn! Beta náá, mɛdjeeb, nɛ duma,

nɛ etsoŋ, nɛ ɛbulal ɛ bhɔɔ,

nɛ duu, nɛ mɛbwala, nɛ ghwyil,

di nɛ Zɛɛb'enaka kɔm-kɔm sii nɛ kɔm! Amɛn!»

13 Ngɔt tɔ bɛpaa eezɛdji mɛ: «Bot ɛ zebɔt elɔbɔ na puu binɔk ɛ́ bɛzɛ? Bɛ dus paa?» 14 Mɛ eezɛbɔɔza: «Yɛ ɛ́ wɔy ɛ di egu, Ghɛŋ'am!» Wɔ gwaa, nyɛ zɛke nɛ nam: «Yɛ ɛ́ bot ɛ naboma nɛ eboo mɛtiiga ɔ. Bɛ naagwyii elɔbɔ bɔɔ nɛ ɛsa náá, ye pum nɛ ghiya Mɔn bhata. 15 Dum nɛ tɛp tak ɛ, bɛ di metetel sok bóó mɛkoozi ɛ Zɛɛb, tɔ ɛduwal nyɛ mwos nɛ pum tɔ Di na Dɛɛ yɛ. Tin, mot di ndiindel kɔ bóó mɛkoozi ɔ, nyɛy nyɛ ɛmet ɛ́ waabaal bɛ é di tak. 16 Deenek, bɛ aanàbaagwak za nɛ gwyes mɛdii. Mɛkas mɛ gwyes nɛ belaa aanàdik bɛ. 17 Etɛɛ náá, Mɔn bhata di kuku bóó mɛkoozi ɔ, nyɛ waabaal bɛ dáa mot di ebaal ebhata ɛ. Tin, nyɛ waadjɛɛd bɛ tɔ esɔɔgɔ ee di edjɛ tsik ɛ. É di'enek, Zɛɛb nyɛ ɛmet ɛ́ waasuŋal bɛ miŋal é mis.»