1 Bhii tak, mɛ eezɛbee dhiiti tit wat ewyis tɔ boo dii mɛsɔn. Nyɛ nadi ɛ́ nɛ melak kam, nɛ elo etɛn nɛ ebá. Kɔ melak kam yenek, ye nabɛ ɛ́ nɛ ekɔtɔ bɛghɛŋ kɔ tak. Pɛ kɔ elo binek, ye nabaadi ɛ́ nɛ ekwyala e min di elee Zɛɛb ɛ. 2 Tit mɛ nabee ɛ́ nadi enɔŋel nɛ ghee, mɛko mɛ nadi ɛ́, dáa mɛko mɛ tit di edjóoaa ulsɛ ɛ, nuub'ɛ nakadi ɛ́ dáa yii boo ghee. Dhalaghɔŋ* naazɛdjɛ tit'enɔk mɛbwala mɛ, nɛ bóó mɛkoozi mɛ, zɛnɔɔ boo eghɛŋ bɛ. 3 Lo wat tɔ elo e tit'enɔk nadi ɛ́ nɛ pyoŋ ɛkɛɛ bɛ naabi nyɛ dhaa tyɛ, sa ɛkunaa nɛ ɛsyee. Tin, pyoŋ tak naazɛgel. Deenek, bhwak djas naadyeebamyaala nɛ nɛ, wɔ gwaa, bɛ du nyɛ. 4 Tin, bot djas nabɛ ɛ́, bɛ moo eduwal dhalaghɔŋ, etɛɛ náá, nyɛ naadjɛ eghɛŋ nɛ tit. Bot djas nabaadi eduwal tit, bɔɔ náá: «Yɛ ɛ́ ɛzɛ di enɔŋel nɛ tit, ɛzɛ di nɛ ghwyil ɛlumla dɛɛb nɛ nɛ?»

5 Tit naabela ghwyil ɛwyisal mɛkpa mɛ ɛbet, nɛ ɛnyek din ɛ Zɛɛb, nyɛ nazɛbela ghwyil ɛsa deenek ɛ́ tɔ bɛngɔn mɛkam-mɛná nɛ ebá (42). 6 Tin, nyɛ moo enyek Zɛɛb, elee din ɛ lɛ, lee dɔɔ nɛ Di na Dɛɛ yɛ, zɛnɔɔ sa djas di tɔ gwoo ɛ. 7 Nyɛ naabaladjɛaa ze ɛlumla dɛɛb nɛ bɔn ɛ Zɛɛb, da kwak bɛ. Nyɛ naadjɛaa eghɛŋ kɔ bot djas, membyak djas, elii djas, nɛ mɛdhik djas. 8 Tin, bot djas kɔ ɛko ɛ bɔs ɛ́ waaduwal nyɛ, bot ɛ di náá, min mɔɔ tok kwyala tɔ mɛkana mɛ tsik kana bɔs nakusel ɛ. Mɛkana mɛ tsik tak ɛ́ mɛkana mɛ Mɔn bhata nakaaa buwa ɔ.

9 «Mot ɛ di nɛ mɛlɔ mɛ ɛgwak ɔɔ, nyɛ gwak ɛnyɔɛpe! 10 Mot ɛ di náá, nyɛ aadi ɛ́ mot membok ɔɔ, nyɛ waani é mbok. Mot ɛ di náá, nyɛ aagwyɛ ɛ́ nɛ pɛl ɔɔ, nyɛ aazogwyɛ ɛ́ nɛ pɛl. Étɛp tak ɛ di náá, bɔn ɛ Zɛɛb goka ɛ́ nɛ ɛdi nɛ zii nɛ ɛdum ɛkoŋ nɛ Zɛɛb.»

11 Bhii tak, mɛ eezɛbee dhiiti tit é wyis tɔ bɔs. Nyɛ nabɛ ɛ́ nɛ melak mɛmbá dáa yii mɔɔ bhata, tin, nyɛ nadi elii ɛ́ dáa dhalaghɔŋ. 12 Nyɛ nabɛ ɛ́ nɛ eghɛŋ e tit mɛkɛn djas, nyɛ nadi etel eghɛŋ binek ɛ́ é mis mɛ tit'enɔk. Nyɛ nadi ebesal bɔs nɛ bot ɛ di kɔ bɔs ɔ náá, bɛ duwal tit mɛkɛn nabaalaa boo pyoŋ nawaagó nyɛ, da yɛ ɛ́ gel ɔ. 13 Deenek, tit nawyis tɔ bɔs ɔ nadi esa eboo esa e mɛbwala. Nyɛ naabatasa náá, du dus tɔ gwoo, sul é bɔs é mis mɛ bot djas. 14 Deenek, nyɛ nadi ekɔɔ bot ɛ bɔs nɛ endem e mɛbwala mɛ nyɛ nadi esa é mis mɛ tit mɛkɛn ɛ. Nyɛy nɛ nɔɔ náá, bɛ kpak naghisɛ étɛp ɛduwal tit nabaalaa nɛ pɛl, da nyɛ ɛ́ tsak ɔ. 15 Tin, tit bhɔɔba yenɔk naadjɛaa ghwyil ɛsa náá, naghisɛ yenɔk di nɛ tsik, ye lii, da yɛ ɛ́ gó bot djas di ààduwal yɛ ɔ. 16 É di'enek, tit'enɔk naazɛbesal bot djas, bot ɛ di nɛ mbyok nɛ bot ɛ di ààbɛ nɛ mbyok ɔ, djel mot nɛ kum mot, kwom nɛ mot di ààdi kwom ɔ, náá, bɛ waaa geka kɔ mɛmbɔ mɛ eghɛŋ bɔɔ nɛghu kɔ ebhata-bhwoob bɔɔ. 17 Deenek, mot tok nɛ ghwyil ɛbɔm nɛghu ɛbɔmsa dhiiti sonok, nyɛ di ààdi nɛ geka yenek ɔ, nɛghu din ɛ tit, nɛghu mɛtaŋ mɛ di enɔŋel nɛ din ɛ lɛ ɛ.

18 Deenek, ye goka ɛ́ mot di nɛ etsoŋ. Mot ɛ di etselal ɔɔ, nyɛ ɛ́ nɛ ghwyil ɛgu sa ɛlɛɛga ɛ tit'enɔk di elɛɛ ɛ, etɛɛ náá, ɛlɛɛga ɛlenek ɛ́ ɛlɛɛga ɛ din ɛ mot. Ɛlɛɛga ɛ tak ɛ́ bɛdhet-ɛtɛn nɛ wat nɛ mɛkam-mɛtɛn nɛ wat nɛ etɛn nɛ wat (666).