Etɛp e syela Sisim natel Zaŋ ɛ 10

Fofop nɛ mɔɔ mɛkana

1 Bhii tak, mɛ eezɛbee dhiiti fofop na mɛbwala dhaa nyel edus pɛ tɔ gwoo, esul pɛ si. Eguud naabutal nyɛ dáa kaad. Tin, dhiya nadii nyɛ é lo. Bhwoob’ɛ nadi ekas dáa gwyes, mɛko nadi ɛ́ ɛlyelɛpe dáa mɛgwyiŋ ekas dáa ngel du. 2 Tɔ mbɔ’ɛ, nyɛ nadi ɛ́ nɛ mɔɔ mɛkana mbek, nyɛ naakɛl ko eghɛŋ bɛ kɔ boo dii mɛsɔn, ko ɛmyɛl ɛ lɛ kɔ bɔs. 3 Tin, nyɛ naazɛtsim ɛlyelɛpe dáa boo ghee di ekɛɛd ɛ. Bhii nyɛ natsim ɛ, wɔ gwaa, bham bɛghɛl ɛko etɛn nɛ ebá zokazɛgék. 4 Bhii bham bɛghɛl ɛko, mɛ nadi ekwyɛl ɛkwyal sa bham bɛghɛl ɛko nadi elii ɛ. Mɛ eezɛgwak dhiiti gwood tɔ gwoo eke: «Syela sa bham bɛghɛl ɛko ɛtɛn nɛ ɛbá binek lɛɛ wɔ ɛ, sa wɔ ààkwyal yɛ.»

5 Wɔ gwaa, fofop mɛ nabee tetel kɔ boo dii mɛsɔn, nɛ kɔ bɔs ɛ, zɛben mbɔ eghɛŋ bɛ pɛ ɛko, 6 tin, nyɛ eezɛtuwal myoŋ nɛ mɛsoŋ nɛ din ɛ Zɛɛb, mot di kɔm-kɔm sii nɛ kɔm ɔ, mot nakus gwoo nɛ bɔs, nɛ boo dii mɛsɔn, nɛ esa djas di kɔ ɛko ɛ bɔs ɔ. Fofop eezɛke: «Ɛwala ɛ tak ààkabɔya!» 7 Tin, dwoo bot aagwak fofop yii etɛn nɛ ebá elɔɔ yɛ tɔŋ ɛ, esa e Zɛɛb nasyel bot ɛ bɔs ɛ, waanyen popoopwon. Yɛ aasael dáa nyɛ naloolɛɛ bot ɛ mɛsa mɛ, bɛngoolel ɛ mɛkpa ɛ.

8 Bhii tak, mɛ eebaagwak gwood mɛ nazegwak edus tɔ gwoo ɛ, yɛ eebaazɛlii nɛ nam liia sis: «Tɔ́, kɛnɔɔ mɔɔ mɛkana di mbek tɔ mbɔ ɛ fofop di tetel kɔ boo dii mɛsɔn, nɛ kɔ bɔs ɛ.»

9 Mɛ naazɛtiila pɛ daa fofop, mɛ eezɛke nɛ nɛ náá, nyɛ djɛ mɛ mɔɔ mɛkana. Nyɛy nɛ nam náá: «Nɔŋa yɛ, da wɔ ɛ́ dɛ, ye waagwyee wɔ tɔ mɔ, tin, ye waases wɔ tɔ nuub dáa ego.»

10 Mɛ eezɛnɔɔ mɔɔ mɛkana nadi tɔ mbɔ fofop ɛ, dɛ yɛ. Mɛses mɛ tak tɔ nuub’am nadi ɛ́ dáa ego. Tin, dáa mɛ namin yɛ ɛ, ye nabɛ ɛ́ ye moo ɛgwyeeɛpe tɔ mɔ’am.

11 Bhii tak, nyɛ eebaazɛke nɛ nam: «Ye goka ɛ́, wɔ baagoola-goola sis dáa ngoolel-Mɛkpa ɛ Zɛɛb, sa Zɛɛb nakɛk nɛ bɛtɛ nɛ ekyee e mɛdhik, membyak, zɛnɔɔ elii, nɛ bɛmɛkoozi ɛ.»