1 É ghɛŋ Mɔn bhata nakɔ ɛtuŋa yii etɛn nɛ ebá nabɛkaa luk kɔ tak ɛ, wɔ gwaa, gwoo zɛdi kup tɔ ba mɔɔ pes ɛwala. 2 Tin, mɛ eezɛbee efofop etɛn nɛ ebá metetel sok bhwoob ɛ Zɛɛb. Bɛ naazɛdjɛ bɛ etɔŋ etɛn nɛ ebá.

3 Dhiiti fofop eezɛtyaa é ngwoob mesa-ebuwa, nyɛ nadi ɛ́ nɛ mɔɔ buku nasaaa nɛ lɔɔd étɛp ɛdik epu e ele na mbɛɛ mɛnuub ɛ. Bɛ eezɛdjɛ nyɛ bɛtɛ nɛ epu e ele na mbɛɛ mɛnuub di edikaa ɛ, étɛp nyɛ neeka yɛ lɔɔg wat nɛ mendjaala mɛ bot ɛ zedum koŋ nɛ Zɛɛb, kɔ mesa-ebuwa nasaaa nɛ lɔɔd di sok bhwoob bóó mɛkoozi ɛ. 4 É di'enek, eguluk ndika epu e ele na mbɛɛ mɛnuub fofop dik ɛ, nadi edus tɔ mbɔ'ɛ, byet sok bhwood Zɛɛb, dɔɔ nɛ mendjaala mɛ bot ɛ zedum koŋ nɛ Zɛɛb ɔ. 5 Tin, wɔ gwaa fofop zɛnɔɔ mɔɔ buku tak, nyɛ eezɛlwoodal yɛ nɛ du nyɛ nanɔɔ kɔ mesa-ebuwa ɛ, nyɛ eezɛwus yɛ kɔ bɔs. Wɔ gwaa, ghɛl ɛko zɛbam, bhyeed gék, mengwyes gwyes, bɔs dheegel.

6 Tin, efofop etɛn nɛ ebá nadi nɛ etɔŋ etɛn nɛ ebá ɔ, nadi ekomsa étɛp ɛlɔɔ etɔŋ.

7 Fofop mɛkɛn eezɛlɔɔ tɔŋ. Wɔ gwaa, bhi na bɛtɛ nɛ mɛtaadak nɛ du puuza nɛ ghiya zɛnɔ kɔ bɔs. Kyee wat tɔ mɛkɛɛ mɛlɛl bɔs, nɛ kyee wat tɔ mɛkɛɛ mɛlɛl ele, zɛnɔɔ eka e bes djas, naazɛdyak.

8 Bhii tak, fofop yii ebá eezɛlɔɔ tɔŋ. Dhiiti sonok tyee boo ɛtsok nɛ ngel kɔ tak naazɛghaaga tɔ boo dii mɛsɔn. Wɔ gwaa, kyee wat tɔ mɛkɛɛ mɛlɛl boo dii mɛsɔn zokazɛliiza ghiya. 9 É di'enek, wɔ gwaa, ɛdhuu ɛ wat tɔ mɛdhuu mɛlɛl mɛ edjema djas nadi nɛ tsik tɔ boo dii mɛsɔn ɔ, zokazɛgwyɛ. Dɔɔ nɛ kyee ɛdhuu ɛ wat tɔ mɛdhuu mɛlɛl mɛ mɛsuwa nadi kɔ boo dii mɛsɔn ɛ, zokazɛtwaalel.

10 Fofop yii elɛl naazɛlɔɔ tɔŋ, wɔ gwaa boo kwyikwyen zɛdus pɛ ɛko, bil pɛ si. Kwyikwyen tak nadi egel dáa boo ngel lama. Ye nadus ɛ́ pɛ ɛko, wɔ gwaa, ye zɛkwyit tɔ kyee wat eboo mɛdhii tɔ ekyee elɛl dɔɔ nɛ tɔ esɔɔgɔ. 11 Din ɛ kwyikwyen tak nabɛ ɛ́ Absɛt*. Kyee wat mɛdhii tɔ ekyee elɛl moo tin ɛgwyeeɛpe. É di'enek, bɛtɛ nɛ bot ɛ nadɛ mɛdii mɛ tak ɔ naagwyɛ, etɛɛ náá mɛdii mɛ tak nabɛ ɛ́, ye moo nɛ sa di egó bot ɛ tɔ tak ɛ.

12 Fofop yii ená eezɛlɔɔ tɔŋ. Wɔ gwaa, ye zɛnyuŋa é kyee wat tɔ ekyee elɛl e gwyes, nɛ kyee wat tɔ ekyee elɛl e ngɔn, baazɛnɔɔ kyee wat tɔ ekyee elɛl e ekwyikwyen. Tin, mwos tokapɛ nɛ kyee wat tɔ ekyee elɛl e mɛkas mɛ, pum pe tokapɛ nɛ kyee wat tɔ ekyee elɛl e mɛkas mɛ.

13 Tin, mɛ eebaazɛgwyák, mɛ eebee bhyel wat é pilal pɛ ɛko, mɛ eegwak nyɛ etsim ɛlyelɛpe: «Haaa mezuk! Haaa mezuk! Haaa mezuk nɛ bot ɛ bɔs, é ghɛŋ efofop elɛl kalik ɔ aalɔɔ yɔbɔ etɔŋ ɛ!»