1 Bhii tak, dhiiti sonok naazɛtelaa mɛ, wɔ gwaa mɛ zɛbee dhiiti ɛbɛ ɛ ndjaa zokazɛbɛŋel pɛ tɔ gwoo.

Tin, gwood mɛ nagwak elii nɛ nam sok ɛ, gwood nadi egek dáa tɔŋ ɛ, yɛ eezɛke nɛ nam: «Byeta pɛ kak, mɛ lyaal wɔ sa aatuula bhii tak ɛ.» 2 Kasɛka ɛ́, Sisim eezɛmɛt mɛ. Ye nabɛ ɛ́ nɛ bóó mɛkoozi pɛ tɔ gwoo, kɔ bóó tak, ye nabɛ ɛ́ nɛ mot ndiindel. 3 Mot nadi ndiindel kɔ bóó mɛkoozi tak ɔ, bhwoob'ɛ nadi ɛ́ ɛkasɛpe dáa mɛkok mɛ mɛtaŋ di edjóoaa yaspɛ nɛ saaldwan* ɛ. É di'enek, dhiya na kas-kas dáa ɛkok ɛ di edjóoaa emelood* naadii bóó mɛkoozi tak. 4 É mengwoob mɛ bóó mɛkoozi tak, ye nabɛ ɛ́ nɛ edhiiti mɛbhóó mɛkam-mɛmbá nɛ ená (24). Tin, pɛ kɔ mɛbhóó menek, bɛpaa mɛkam-mɛmbá nɛ ená (24) nadi ɛ́ mendiindel kɔ tak. Bɛ nadi ɛ́ nɛ ekaad e na puu é mɛnyel, nɛ ekɔtɔ bɛghɛŋ nasaaa nɛ lɔɔd ɛ é elo. 5 Mengwyes, bhyeed nɛ bɛghɛl ɛko nadi ewyis kɔ bóó mɛkoozi yenek. Sok bhwoob bóó mɛkoozi, ye nabɛ ɛ́ nɛ elama etɛn nɛ ebá nadi egoo ɛlyelɛpe ɛ, mengel mɛ elama binek ɛ́ esisim etɛn nɛ ebá ɛ Zɛɛb. 6 Sok bhwoob bóó mɛkoozi yenek, ye nabɛ ɛ́ nɛ dhiiti sonok ɛkɛɛ boo dii mɛsɔn ɛdjhaazɛpe dáa ɛkok ɛ mɛtaadak, dáa ɛkok na djhaaz-djhaaz.

Tin, kuku bóó mɛkoozi nɛ é mengwoob mɛ tak, ye nabɛ ɛ́ nɛ edhiiti membi mɛ edjema ená di nɛ tsik ɔ. É mɛnyel mɔɔ, ye nadi ɛ́ nɛ ebhum e mis pɛ mɛbhwoob nɛ pɛ ekoŋ bɔɔ. 7 Djema di nɛ tsik ɔ, yii mɛkɛn pak'ɔɔ nadi enɔŋel ɛ́ nɛ boo ghee, yii bhɔɔba nadi enɔŋel ɛ́ nɛ mɔn ngɔmbɛ, yii elɛl, bhwoob'ɛ nadi ɛ́ dáa yii mot, yii ená, nakadi enɔŋel ɛ́ nɛ bhyel é pilal. 8 Pak edjema ená di nɛ tsik binɔk, ngɔt-ngɔt nadi ɛ́ nɛ mɛbhap etɛn nɛ wat, mɛnyel mɔɔ nɛ si mɛbhap mɔɔ nadi ɛ́ kpeeeŋ nɛ mis é tak. Tin, mwos nɛ pum bɛ nadi edjeeb ààwala:

«Dɛɛ, dɛɛ, dɛɛ ɛ́ Ghɛŋ, Zɛɛb Mɛkaake,

nyɛy mot di ɔ, mot nadi ɔ, mot di ezyɛ ɔ!»

9 É mɛwala djas, edjema di nɛ tsik ɔ binɔk nadi edjeeb étɛp ɛdjɛ duma, nɛ duu, nɛ ɛbulal bhɔɔ nɛ mot di ndiindel kɔ bóó mɛkoozi ɔ, mot di nɛ tsik kɔm-kɔm sii nɛ kɔm ɔ. 10 É mɛwala djas, bɛpaa mɛkam-mɛmbá nɛ ená (24) naazɛghaaga si, sok bhwoob mot di pɛ kɔ bóó mɛkoozi ɔ, bhii tak bɛ eezɛkwyit mɛboŋ mɔɔ si, sok bhwoob mot di nɛ tsik kɔm-kɔm sii nɛ kɔm ɔ. Bɛ naadis ekɔtɔ bɛghɛŋ bɔɔ, lóo yɛ sok bhwoob bóó mɛkoozi, bɔɔ eke náá:

11 «Ghɛŋ, Zɛɛb'es, wɔy ɛ́ di egoka,

nɛ ɛdjɛaa duma, nɛ duu zɛnɔɔ mɛbwala,

etɛɛ náá, wɔy ɛ́ nakus esonok djas,

esonok binek nakusaa ɛ́, é ɛkwosak ɛ lɔ!»