1 Dáa ye di náá, Zɛɛb eedjɛ mena di epiki é mis mɛ, kɔ ɛsu ɛdum ɛ koŋ ɛ lena nɛ nɛ ɛ, yɛ ɛ́ mena dika mos tɔ ɛgwakel nɛ nɛ kɔ ɛsu ɛ Ghɛŋ'enaka Yezu Klisto'aak. 2 Yɛ ɛ́ kɔ ɛsu ɛ ɛdum ɛ koŋ nɛ Yezu ɛ mena belaka ze ɛbela enɛm nɛ embɛɛ e Zɛɛb ee mena dika mos ghiŋ tɔ tak'aak. Yɛ ɛ́ étɛp tak ɛ mena dika tɔ mɛmyaala mɛ ɛbwaalel ɛdi ɛ́ tɔ duma ɛ Zɛɛb. 3 Ɛbaanyɔ náá, mena baamyaalaka é sok mena dika tɔ mezuk ɛ, etɛɛ náá, mena nɛ guka náá, mezuk nɛ sa náá, mena dika nɛ ɛmaad ɛ lyem. 4 Ɛmaad ɛ lyem nɛ sa náá, mena dika nɛ ghwyil ɛpyet tɔ mɛbhowal nɛ zii, da ghwyil ɛpyet tɔ mɛbhowal ɛsa náá, mena dika nɛ ɛbwaalel. 5 Bela náá, ɛbwaalel ɛlenek ààkɔɔ mena. Etɛɛ náá, é ze ɛ Sisim na Dɛɛ Zɛɛb nadjɛ mena ɛ, nyɛ eesa náá, mena dika nɛ kwyɛl nɛ nɛ tɔ ebhum elyem bena.

6 Tin, é ghɛŋ mena nadika mena dinaa ààbɛ nɛ ghwyil ɛ, é di'enek ɛ, Klisto nagwyɛ étɛp bot ɛ mesyem, é ɛwala ɛ Zɛɛb nalɛɛ ɛ. 7 Tin, ye nɛ lyel náá, mot myaal ɛsyee étɛp sɔ mot, ye nakoozodi náá, sɔ tak ɛ́ mot epiki. Deenek, mot ɛ́ nɛ ghwyil ɛbela mɛghaaz mɛ ɛgwyɛ, étɛp mot di esa enɛm esa ɔ. 8 Tin, Zɛɛb naatel dáa nyɛ di ekwyɛl mena ɛ: Klisto nagwyɛ ɛ́ kɔ ɛsu ɛ lena, é ghɛŋ mena nadika mena dinaa bot ɛ mesyem ɛ. 9 Dáa ye di náá, yɛ ɛ́ kɔ ɛsu ɛ buwa nyel'ɛ ɛ, mena moo nenak bot ɛ epiki é mis ɛ Zɛɛb, tin, yɛ ɛ́ tsɛɛtsɛ náá, Klisto aabaatsik mena si ɛbuk ɛ Zɛɛb. 10 É ghɛŋ mena nadika mena dinaaka bot ɛ mɛbhuka ɛ Zɛɛb ɛ, nyɛ naabulal ɛgwakel nɛ nena dum nɛ ɛsyee ɛ Mɔn'ɛ. Nenak, dáa ye di náá, Mɔn'ɛ ɛ́ nɛ tsik ɛ, nɛ dáa di náá, nyɛ eebulal ɛgwakel nɛ nena ɛ, yɛ ɛ́ tsɛɛtsɛ náá, nyɛ waatsik mena. 11 Ye tok yenek nɛ yenek, mena ɛpebaamyaalaka nɛ Zɛɛb dhaa nyel, kɔ ɛsu ɛ Ghɛŋ'enaka Yezu Klisto, nyɛy ɛ́ mot nanɛɛg mena tɔ ɛgwakel nɛ Zɛɛb ɔ.

12 Dáa ye di náá syem nani kɔ ɛko ɛ bɔs ɛ, kɔ ɛsu ɛ mot ngɔt, Adam, da syem ɛ́ zɛdul ɛsyee kɔ bɔs ɛ, yɛ ɛ́ deenek ɛ́ ɛsyee nazɛbela bot djas, etɛɛ náá, bot djas naasyem. 13 Ɛsok nɛ Zɛɛb nɛ djɛ etsi nɛ Moiiz, syem nadi ɛ́ ye moo kɔ bɔs. Tin, dáa etsi nadi ye dinaa ààbɛ tak ɛ, Zɛɛb nabɛ ɛ́ ààdi ebee mesyem mɛ bot ɛ bɔs. 14 Bela náá, kana é ghɛŋ ɛ Adam, kɛkum é ghɛŋ ɛ Moiiz, ɛsyee nabɛ ɛ́ nɛ ghwyil kɔ bot djas dɔɔ nɛ bot ɛ nadi ààsyem dáa Adam mot nadi ààlooba nɛ sa Zɛɛb nalɛɛ nyɛ ɛ.

Adam nabɛ ɛ́ mbaŋa-mbaŋa mot nadi egoka nɛ ɛzyɛ ɔ. 15 Tin, ɛdjak ɛ Adam tok nɛ ghwyil ɛdi tyee wat nɛ ɛkɛɛ ɛ enɛm nɛ embɛɛ ee Zɛɛb zedjɛ mot kɔ toto ɛ. Yɛ ɛ́ tsɛɛtsɛ náá, zukamwaa nɛ mot naagwyɛ kɔ ɛsu ɛ ɛdjak ɛ mot ngɔt. Tin, enɛm nɛ embɛɛ ee Zɛɛb nadjɛ mena kɔ toto ɛ, yɛ ɛ́ nɛ mɛtaŋ ɛbuɛpe. Ɛkɛɛ ɛ tak nadjɛaa ɛ́ nɛ bot ɛbuɛpe kɔ ɛsu ɛ mot ngot Yezu Klisto. 16 Deenek, ɛkɛɛ ɛ Zɛɛb di edjɛ ɛ, ye tok tyee wat nɛ syem mot ngɔt nasa ɛ. Syem ɛ Adam naasa náá, Zɛɛb kwyesal bot ɛ bɔs ndjɛ sɔs. Tin, ɛkɛɛ ɛ Zɛɛb nadjɛ bot kɔ toto ɛ, ye naasa náá, bot di epiki é mis mɛ, ye nakoozodi náá bɛ ɛ́ nɛ bɛtɛ nɛ mesyem. 17 Yɛ bɛ náá, syem mot ngɔt naasa náá, ɛsyee di nɛ ghwyil kɔ bot ɛ bɔs ɔɔ, tin, kɔ ɛsu ɛ mot ngɔt Yezu Klisto, bot eebela enɛm nɛ embɛɛ ɛbuɛpe, nɛ ɛkɛɛ ɛ epiki di esa náá, bot di nɛ tsik, nɛ ɛdi ɛ́ bɛmɛkoozi sama nɛ Yezu Klisto.

18 Nenak, syem mot ngɔt Adam eesa náá, bot djas kwyeselaa ndjɛ sɔs, yɛ ɛ́ tyee wat, nɛ mɛsa mɛ epiki mɛ mot ngɔt Yezu Klisto nasa náá, bot ɛ bɔs djas di bot ɛ epiki, nɛ ɛdjɛ bɛ tsik ɛ. 19 Dáa mot ngɔt nadi ààlooba ɛ, ye naasa náá, bɛtɛ nɛ bot ni tɔ mesyem, deenek, ɛlooba ɛ mot ngɔt nalooba ɛ, yɛ eesa náá, bɛtɛ nɛ bot di bot ɛ epiki é mis ɛ Zɛɛb.

20 É ghɛŋ etsi natuula ɛ, mesyem naabaazɛbu. Tin, é di mesyem di ebu ɔ, enɛm nɛ embɛɛ Zɛɛb ɛpebaabu dhaa tyɛ. 21 Tin, dáa mesyem natel ghwyil'ɛ tɔ ɛsyee ɛ, yɛ ɛ́ deenek ɛ́ enɛm nɛ embɛɛ e Zɛɛb di etel ghwyil'ɛ tɔ epiki, étɛp ɛdjɛ mena tsik na kɔm-kɔm kɔ ɛsu ɛ Yezu Klisto Ghɛŋ'enaka.